好不主席：不「基」主席？ Joycelyn
1 :
GS(14)@2012-10-23 00:56:20http://hk.apple.nextmedia.com/financeestate/art/20121022/18046204
如果不是本報上星期一的一篇報道，我才犯不着要主席借歪讓位，好等我代筆。事緣坐在冇雷公咁遠的同事Mitchel特意走來跟我說：「Hey Joycelyn，你睇，呢個男人好funny呀，啲花衫好靚呀！I like him！」其時指着iPad上一則新聞，興高采烈地說他喜歡該訪問裏的男人。Mitchel是一個很細心的男孩，舉手投足都比一般港女更斯文，每次吃完飯總會塗上薄薄的潤唇膏，滋潤他像櫻桃般的小嘴。最近他因為Brad Pitt的廣告而買了Chanel No.5，芬芳氣味連遠在茶水間的阿姐也能嗅到。
我一向有閱報的習慣，每朝起身，除了嘆份豐富早餐，就是看看當日李華華的揭秘，皆因盧主席天生既不好奇又唔喜歡每事問，但係又要成日問我有乜嘢題材好寫。我惟有勤於閱報蒐集太陽底下的趣聞，以備主席不時查考功課之需。看見Mitchel飢渴的眼神，不問便知他指的是那位喜歡穿花恤衫的鬍鬚佬、乜嘢財經界黃偉文喎。
「哦，我今朝看咗。唔知佢係咪真係基嘅，說話又神神化化咁，答嘅問題亦都唔知佢喺度講乜嘢，懶係有嘢。」我冷冷地拋下一句，其實係因為主席剛下令要我半小時內電郵一份文件給他開會，心情已受影響。「唔係呀，幾cute吖。我覺得佢好幽默風趣噃。」Mitchel也不理我的漠視，繼續沉醉重複播放那條訪問片段。
說也奇怪，最近香港掀起一股「出櫃潮」，先有明哥高呼「我係基佬」，後有式芝阿桑法國結婚，政界中更有「慢必」入立會爭取同志權益，一時間維港上空劃了一道彩虹，大放異采。今次財經界忽然有個佬失驚無神跑出，未知是否受這股熱潮感召而站出來呢？
花恤衫系列 惹遐想
我Joycelyn勝在姊妹多，總有人報料。行內早有流言蜚語，質疑這花衫主席的「直」徑。皆因他除了花恤衫又有花褲、花鞋同花呔，又鍾意同啲小花影相，不單止態度親暱，仲要大模廝樣咁鋪在臉書，我哋姊妹就搭上搭咁搵嚟畀我睇。係囉，既結了婚，又冧女，咁點會係「基」呀？我夠有個姊妹，早前老公就係咁俾人搶咗，但唔係「女人」囉！據聞呢位主席每次同啲女一影完相就即刻彈開，你話乜嘢原因呀？這些怎會不是煙霧以混淆視聽。講真，邊有（正常）男人有女唔食先？再者誠如該訪問一樣，提到啲「基」調問題，他例牌含糊其辭，但其花恤衫系列無不引人遐想。
但觀乎花主席向來言行出位，同我老細實在有得揮。起碼係攣唔係，佢都唔會好似其他人咁，一聽到個「基」字就喊打喊殺，現在乜嘢世紀呀，多元包容唔係攞嚟講嘅。難得多一位主席願曲線挺「攣」，容納不同聲音，雖然可能只係惠己及人。其實我Joycelyn心底想講句，我撐你！
編按：是日由盧主席秘書Joycelyn執筆