樂香園：經紀收最低工資
1 :
GS(14)@2012-09-04 12:59:18http://hk.apple.nextmedia.com/financeestate/art/20120904/18007258
海迪近日相約證券界朋友出嚟食飯，大家不約而同都話要慳皮啲，唔去國金軒或者鏞記喇，平平哋去老蘭附近食個simple lunch算啦！原本以為第二季已經夠難捱，點知第三季仲牛皮，情況到底有幾差？
上週初Jackson Hole前夕，有經紀朋友話，已經好多年來未試過，一朝早開市前，竟然整個Sales& Trading Department一個電話都冇響過！據悉以往一個月閒閒哋搵「幾球」的sales，近日收入大縮水；有啲年資比較淺的經紀，係收緊最低工資，即同酒樓洗碗個阿嬸冇分別。某美資大行就比較縮骨，已通知唔少經紀放冇薪假，連最低工資都慳番，任由員工自行流失。一位屬於ECM部門的美資投行賓架都話，佢那Team七、八個人，每日返去都係齋坐，或趁得閒搞嚇「客戶關係」，幫相熟的上市公司高層處理嚇文書工作、翻譯嚇之類。
Deal flow究竟幾時先會返嚟？唔少證券界人士都目標9月，新股亦想搵機會出籠。但9月歐洲有極多重要消息出爐，例如歐央行買唔買債、西班牙拯救方案細節等等，都足以影響大局。總括而言，現時證券界似乎未算太淡，仍希望最後一季可以追生意。
海迪