疑似怪獸家長 人在中環
1 :
GS(14)@2012-08-14 15:24:13http://manincentral.blogspot.hk/2012/08/blog-post_14.html
囝囝出世之後，有一個問題我成日都諗：到底我對自己個仔既「關懷程度」，點樣先算係一個「合適水平」呢？
我嘗試從身邊既人既「觀感」，去理解老婆同我對孩子既「關懷程度」到底算唔算過火。得出黎既結論，我覺得其實有點搞笑。
1)有些朋友認為老婆同我太緊張個仔啦，算得上係怪獸家長級別。呢班朋友之中，大部份都並未為人父母。
2)另有些朋友則認為我對個仔太過carefree，對佢未來既準備闊佬懶理，還苦口婆心地勸我地兩公婆：「CK，你地咁樣唔得架…」。當然，會咁樣勸我既朋友，一般都有兒有女，亦為自己子女既教育勞心勞力過。
3)上左年紀，比我輩份高既「老人家」最搞笑。當我地星期六帶囝囝返playgroup既時候，佢地就會話我地對個仔太過緊張啦，我地做小孩子果陣果個年代，佢地做阿爸阿媽既，邊會有咁多地方俾我地去上堂？冇堂上我地咪一樣係咁樣長大？但係當囝囝返到屋企果陣，佢地又會話我地太過闊佬懶理個仔啦：「你睇？佢隻手都凍曬你都唔俾多件衫佢著？點做人老豆阿你…」
*****
囝囝響一歲半左右，就開始有返playgroup。正正係呢個動作，有d朋友認定我係個「望子成龍」既家長。「咁細個你就要佢學呢樣學果樣，仲唔係望子成龍既怪戰家長？」朋友笑我。
我只承認我查實係個好懶既家長，望子成龍，怕且有排都未輸到我。未有小孩子既朋友，唔明白小朋友既精力可以有幾旺盛。你唔搵啲地方俾佢發洩出黎，夜晚大家都冇覺好訓。我必須承認既，係我的確係條大懶蟲，幫囝囝燃燒佢既精力，最簡單既方法其實可以係帶埋個仔落樓下公園喪跑兩個鐘。懶惰既我將呢件事情「外判」，所以我幫囝囝報左個「小童足球班」同「游水班」，志在消耗佢超旺盛既精力，順便俾佢做下運動，佢又開心，我又輕鬆。
笑我「望子成龍」既朋友聽完我講之後，好似有啲明白。當然佢地只知道我地呢啲「疑似怪獸家長」，會響個仔好細既時候就帶個仔去上乜堂物堂，但背後既目的係乜，佢地都會直覺地認為，必定係我地好想個仔「快人一步」，學到三萬個英文字，八國語言，未入幼稚園就要學識計微積分…
我同好多其他班上面既家長吹水，實情大家帶囝囝囡囡去上堂，都唔係真係想佢地學到d乜野。響呢個年紀同佢地「返學」，主要都只係想消磨下佢地既時間，叫做有啲節目安排俾佢地。佢地響堂上面玩得開心，父母就乖乖地繼續俾錢。講真，送佢去上堂踢波，唔通真係期望佢大個做球星咩。
我只係覺得，今時今日既社會，大家工作壓力其實都大，放左工之後，自己剩餘既精力已經所餘無幾，要自己用心用力再去為子女諗下有啲乜嘢可以玩可以做，對好多人黎講已經有點奢侈。外面現成有人設計埋program去「娛樂」你個仔，懶惰既家長如我，自然亦樂於「外判」。我地既參與，就只係一齊陪佢上堂。
係咪其實有啲不負責任？嘿嘿，可能都係架。
不過，自己真係懶嘛。