好不主席：騎劫大象
1 :
GS(14)@2012-08-01 10:44:00http://hk.apple.nextmedia.com/financeestate/art/20120801/16565007
本來不擬連寫「國盲教育」，點知咁啱噚日食完晏嗰陣，就撞到我哋新任嘅行會召集人，林先生份人都真係謙恭有禮，我哋之前不過係喺商務場合見過幾面，可能覺得有點眼熟，所以佢都報以微笑示意。如果我唔係趕緊返去公司開會，我一定借故問吓佢，家陣隻「大笨象」點算？講緊嘅並唔係滙控（005），雖然呢兩日都有唔少新聞，而係政府可以點「收（國民教育呢一）科」。林煥光上星期接受有線電視訪問，好明顯就係想為星期日嘅遊行降溫，可惜點降都降唔到嗰日數以萬計家長嘅怒火，至於梁廚房更是熱上加熱。佢除咗話嗰本國教手冊唔合格，係次貨之外，仲講咗句：「當政府見到大象，就知道係大象。」我悟性低，從來見到大象就知係大象，並唔知道咁即係寓意政府應要判斷社會嘅反對意見，並要作出恰當決策嘅意思噃。
冇得揀焗住洗點就範
咁又唔知所謂「恰當」嘅決策，係咪就係梁總廚話終於都聽到民意，所以提出教育局可把參考教材先行放上網，畀公眾監察呢項咁有誠意嘅安排？對於家長要求先行撤回，再作商議嘅要求則繼續置若罔聞，基本上同當年處理23條立法的處境一樣，「你有你嘈，我有我做」。話時話，呢次反國教運動發展至今，已經成為國際媒體都非常關注嘅大事，而我哋嘅特首人間蒸發咗成半個月，先至出嚟回應，我仲以為佢學似有間上市公司嘅主席咁，玩失蹤，甚至要勞煩到該公司董事會中止其職務。不過既然主事人已然露面，跟住矛頭瞄準就好。
其實這兩天我也有機會接觸過一啲家長，佢哋嘅諗法，我唔係好方便兜口兜面反駁，正好藉此坦然相告。有一個話佢個寶貝仔家陣咪讀緊教會學校，夠有宗教課同埋周不時都要祈禱，咁學校咪一樣係洗緊腦。呢位阿媽嘅講法聽落係有道理，尤其當我知道佢係為咗個仔入學先去受浸，之後都冇再返過教會，當然亦冇機會「被洗腦」。因此如果間學校真係個家長自行報讀嘅話，一個願打，一個願捱，確係與人無尤。正如佢係要送個仔去左派學校讀書，咁點能怪校方嘅教學方針全面偏頗。不過嚟緊係所有學校，除咗啲達官貴人子女讀嘅國際學校，都要推行國教，喺冇有得揀嘅情況下，只能「焗」洗，試問我哋點能就範？
另外有位老竇就義正詞嚴話，呢啲嘢都係因為嗰啲別有用心嘅人喺度興風作浪，無非就係撈選舉本錢，所以佢先唔會咁政治幼稚，俾人肆意「騎劫」佢呢亭睇得咁通透嘅家長思維，所以亦豈會同其他思想簡單嘅父母咁受人蠱惑，逢中必反。我都唔知原來呢位「港爸」已熟讀早兩日黨報嘅評論文章，失敬失敬。其實有以上呢啲咁嘅家教，睇怕政府可以慳番國教。
盧先亞