豪言大志：30億自慰
1 :
GS(14)@2012-05-08 22:16:21http://www.sharpdaily.hk/article/sup/20120508/87120
最新的打工皇帝，交稅七千九百萬元，估計收入五億！我不想賺五億，我只想有機會可以蝕五億，但我淨係知可以去家計會捐幾億，有啦！只要你加入香港影業協會，你便能輕輕鬆鬆，蝕30億。
他們說youtube有三百多段侵權影片，累計點擊人次達一千萬！以每張戲票六十元計，登登登登，蝕咗足足六億!!再配合之前曾投訴的廿四億元虧蝕，輕易蝕咗三十億！
按照呢個邏輯，我每次忘記買六合彩，其實都是虧蝕了幾千萬的頭獎機會，一年我其實蝕咗幾十億！
亞視蝕錢一定要賴無綫，如果無咗無綫，一定大把人想睇你一日播4次嘅《把鬼當歌》啦﹗
影業協會投訴被侵權的電影包括《得閒炒飯》、《天水圍的夜與霧》、《猛鬼愛情故事》、《旺角監獄》。
《得閒》票方約300萬，《天水圍》約116萬，《猛鬼》約200萬，《旺角》約500萬……你別告訴我本來《天水圍》可以有過千萬的票房，最衰就係youtube搶咗啲客！
我會覺得你其實係想拍《天水圍之博大霧》囉。
曼聯賽事youtube大把有得睇，又唔見佢入座人數下跌？本地波之前無電視台肯播，又唔見佢場場爆滿扯紅旗？
你電影業界鍾意精神自我安慰我唔反對，但你唔好用呢個做理由，要求《網絡23條》立法先得㗎；日後你用呢種方法嚟計算業界被惡搞侵權的「超乎輕微經濟損失」，到時被人拉咗，一定要搵湯家驊保釋。
曾志豪