隔牆有耳：房署收欠租 狂追$0.45
1 :
GS(14)@2012-04-07 14:20:43http://hk.apple.nextmedia.com/te ... 104&art_id=16212564
住喺慈雲山慈樂邨 15年嘅郭生，一直都同待業嘅阿哥住；之前因為工作需要，暫時搬咗去柴灣獨居。約 4、 5個月前返屋企時，竟然發現房署寄咗封欠租通知書嚟，話佢冇交租兩個月，所以佢拿拿臨清還合共約 3000幾蚊嘅欠租，找清條數一身輕。
點知上月初房署又寄咗封欠租通知，寫明「閣下仍未繳交租金港幣 0.45元」，郭生心諗：「家陣欠嗰 4毫子租都要出信，有冇搞錯呀？」男人老狗決定唔理呢啲婆乸數，點知房署窮追猛打，隔咗十幾日後第二度出信，郭生睇完火都嚟埋，覺得為咗嗰 4毫子而嘥埋郵費兼人力，唔係咁合乎成本效益囉，佢好不忿咁話：「人哋放貴利、財務追數都唔會追得咁密啦！」
八方講句公道話，覺得 0.45元都係錢吖，仲要係公帑，唔搞清楚又點交數上去呢，房署都係盡自己本份啫！但房署接連寄兩封信，都要用成$2.8郵費，仲多過筆欠款幾倍囉，難怪令郭生心中有氣嘅。
欠租隨時收回單位
公屋租戶如果長期欠租，房署可以要求住戶遷出㗎；若郭生堅持唔交欠租，分分鐘為咗幾毫子，連間公屋都冇得住。好彩郭生預告呢個月交租時會順便交埋餘下欠款，房署可以唔使煩咯。