胡孟青：股神輸在身邊人
1 :
GS(14)@2012-03-05 23:46:05http://www.sharpdaily.hk/article/index/15307/20120305/62226
人生自古誰無死，最慘就係衰收尾！也許有人只是很Consistent地的真情個性演繹，本來就係一位Accidental Chief Executive，做特首難道要斷六親？非也！
本來沒有甚麼大不了，卻遭無限放大，港人突然通通霸佔道德高地，只因披露為本精神未獲尊重，有Black & White白紙黑字才要遵守，就沒有所謂Best Practice或甚麼Whiter than white了。
高高在上，一切逆耳忠言皆聽不進去，身邊欠忠臣諫臣，難免遲早走歪，事件對政界商界高管均應引以為鑑。只可惜即使在證券界，口口聲聲話自己冇持有所提及股份多的是，說得一點沒花假，自己冇揸，身邊關連人士與一致行動人士呢？披露是做到了，誠信又有幾多？
雖說薑是老的辣，老貓燒鬚卻時有所聞。移船就磡來港親自主理基金的股神，去年連環遭投資組合中的民企跣完一鋪又一鋪，外人以為股神是不懂國情如此簡單，然而在遇人不淑以外，也有用人不善成份；如此，部份輸錢原因就係自作孽。
原來在其身邊跟出跟入之私人助理，竟然是一位看上去形同剛剛大學畢業、有如白紙一張的斯文o靚妹仔，雖然係中國人卻衰在入世未深，又怎可能協助股神過濾劣質公司，一句講晒就係未夠班。神級人馬惟有百分百靠自己功力，可惜不知是老眼昏花，抑或是上市公司氣場太勁，用在分析百年老店老牌企業身上的分析方法，根本不適用於內地民企，身邊一齊出差者若不夠醒目，自然會累老板中伏。就算堂堂國企中石化（386），有阿爺望到實，員工亦竟夠膽死去虧空公款（嚴格來說應該係挪用國有資產）炒紅酒炒茅台，甚至爆出連環被揭放高利貸；亦有國企因錢多，員工團購買房或有提議向員工放貸事件，總之無奇不有，鑊鑊新奇鑊鑊甘。
國企亦如是，何況民企？帶住件o靚妹仔北上考察廠房拜訪管理層，對方當然晨早執靚個場或佈景，股神根本無法靠睇廠窺見真象，畀人斟茶灌水讚幾句後就更飄飄然，氹兩氹就暈陀陀，OPM基金持有人的錢就是如此被攞嚟較飛。既然睇廠信不過，以財務報表評估投資價值也許更划算，上周與退休中資銀行掌管企業貸款的老賓架叙舊，就聽到幾個與上市公司相關的小故事，直覺盤數靠得住，豬乸會上樹。
胡孟青
獨立股評人