講膠所手記：至蠢係唔老實！
1 :
GS(14)@2012-02-08 23:01:23http://www.sharpdaily.hk/article/index/15307/20120208/51054
所謂大智若愚，係讚緊人哋有智慧，只不過外表蠢啫！咁乜嘢人至係蠢？唔做嘢但又鍾意爭功抽你水嘅蛋散？開親會都廢噏嘥你時間嘅火星人？返工夢遊累你陪佢攬炒？佛地魔？YY個人就認為，唔老實嘅「豬標」係最蠢嘅！
話說某日YY同親戚去港島某商場拎車嘅時候，分別俾兩個地產經紀夾咗去睇商場裏面嘅示範單位，個親戚就好好彩，夾佢嗰個地產經紀做開豪宅，完全無亂吹水非常專業，反觀YY就慘咯，俾個「豬標」夾住，唔知係因為嗰日着得太過Causal定係乜嘢原因，嗰位仁兄當YY係一個低能兒咁Sell，無論係個盤嘅Location、景觀、附近二手呎價，同YY喺公司聽地產版手足講嘅完全唔同，更離譜嘅係，佢話收租都可能買得過嘅細單位只係得番4個，要買就趁手喎！
蝕底始終係自己
原本，因為嗰個細單位真係可以睇到維港煙花，佢未爆呢句嘢之前，YY真係有小小心動，但係嗰日個盤都仲係處於滯銷中，何來咁啱得咁翹得番4個單位？若然落疊，YY當堂咪變傻B？所以，唔好以為呃到人係叻仔，最後蝕底嘅，其實係你自己咋！
YY