胡孟青：升到你唔信？﹗
1 :
GS(14)@2012-01-26 22:37:37http://www.sharpdaily.hk/article/index/15307/20120126/45405
得炒作時且炒作，短線反彈雖已屆假期前高位，俗稱吊頸之陰燭錘頭，配合慢隨機指標超買兼成交縮，足以叫淡友有理由繼續睇淡，好友也會有藉口唞一唞。恒指於假期前，就憑一股提振股市信心的念力，成功推上兩萬，單周升足905點，總算理想達到；說實在，港股真的要癲起上嚟，要單周甚至單日或一、兩日內要升過千點，又何難之有！要立竿見影，一切還要待阿爺發落。
完成震倉再挾上
此刻，假如有人講上望兩萬一即日線圖250天線大限所在，就會被笑「冇新意」；但只要大市歸位後，再翻炒歐債危機，回吐至19000/19300點，又會有人認為，兩萬點當真果然係銅牆鐵壁所在，惟只要指數不再穿萬九，資本大戶要舞高，空間仍不俗；難得連風水指數都話睇足21700點目標，即係話博取心理上，仍半信半疑的普羅投資者，在忐忑之間，隨時可能再度失諸交臂，神龍見首不見尾，大家相信負面因素還未在股價裡反映嗎？
新春團拜最大發現，係癡癡呆呆、坐埋一枱，難得人人冇貨，有者都只屬望鄉貨色，如此一算，大市隨時完成震倉再挾上，升到你唔信，到你眼白白見250天線亦獲收復，痕癢難耐之際，才是最危險時候。傳說中，龍的身材正好就是扭身扭勢，全年走雙底雙頂來來去去就係另外幾千點上落，恒指日線圖好似好棧，但周線及月線就唔係好妥兼走樣。當然，經濟基本面有目共睹，六千蚊easy money也不見得可循環再用之餘，乘數效應也七七八八，節後的金融界仍一片風聲鶴唳，連C9都背得出的負面因素，難道股票市場，仍會懵然不知未反映出來嗎？
由希臘以至美國都在人窮思舊債，政府不願意再津貼富人，好彩仍有會計制度，樂於賦予走棧位。現實是，能夠年賺上百萬美元者，多屬有辦法之人，情願付錢大搞tax planning，都唔想益庫房，說到利益輸送，來者不拒，但要付出當然免問，讓政府代你做善事，就要問多句有幾多有錢佬願意做無名氏。
胡孟青
獨立股評人