下流人生：食家
1 :
GS(14)@2012-01-18 23:11:30http://m.sharpdaily.hk/detail.ph ... 8065&category=daily
早前戥腳做盆菜試食員，對着鏡頭，挾一嚿豬皮入口，頻呼好味，還付帶「袋錢入你袋」的權威：嗱，沉底豬皮蘿蔔吸盡精華，所以最正！鏡頭之下，我一額汗，這等知識誰人不曉，煞有介事宣之於口真係當讀者是白癡，情況就如公仔箱越做越爛的飲食節目，主持人試食後評語不是好吃就是估唔到咁好吃。有時還要走到無雷公遠境地擒獲珍稀食材又點又點，你究竟想點？猶如面書/微博上那些開飯相一樣，「今日同老婆豬豬一早起身去食咗碟豬腸粉熱辣辣好好味！」你究竟想點？
近年「食家」冒起最多因為所求知識不限，不似影評樂評藝評人人以專家自居。博客群裏以食掛名者，本來自食自寫自評都算有趣，可惜突然有日受到各店公關注目，傳媒試食團之外又多了一種專供博主們聚會之局，每味菜上枱先影相再up撈，別人用口舌試味，他們用留言滿足，「嘩，你又食好嘢！嘩，呢碟嘢睇嚟勁好味喎！嘩，呢味新菜你咁快就試到！」所以呢，當我近日瀏覽一個叫「DIU LEI OPENRICER」的網站（diuleiopenricer.tumblr.com）有多開心，名字已經說明一切。
對我來說要做食家首要條件只有一樣就是錢要多，多到你想試食任何一間餐廳一味菜式都面無難色。至於普通人莫財又想食，不如爭取當《飲食男女》記者，做一期專題，可以一年一度花數十萬吃遍港九。肥佬請客，受得起有餘。
作者：曾凡
前《號外》主編，既然攀不上上流，惟有專注在下流
逢周三、 四