老友 A最近頻頻去成都，問佢有乜大動作，佢話大動作就冇，不過有一個大型商場在九月七日開幕，聽聞有大人物主持開幕禮，商場內有一個餐廳嘅投資集團係佢有份 嘅，故此已上去視察幾次，每次都係一晚兩日，因為成都冇乜好睇喎，除非做典型遊客，去參觀古蹟啦。咦，成都人口眾多，市內開大商場，咪一定有人流，在商場 內開設餐廳，生意不愁啦。老友 A話：「原本我都係咁諗，故此答應投資，但去多幾次之後，依家知驚嘞。香港蘭桂坊之父盛智文有份投資之成都蘭桂坊，原來除咗兩三間有靚女嘅酒吧之外，其他 餐廳水靜鵝飛，一家香港有啲名氣嘅牛扒餐廳仲更加靜過鬼。畢竟成都冇乜外國人，唔似得中環咁西化，大把英文人湧入蘭桂坊呢！」
咁講法，希望老友 A有份間餐廳，因位於新起大商場，中外咸宜，開幕後生意好啲啦，但老友 A即刻唉聲嘆氣：「唉，一啲事只會在中國發生，間大商場話在九月七日正式開幕，但直至到九月初，成個場仍然冇煤氣供應，廚房冇火，點開餐呀！」騎騎，此乃 中國特色，正是以前香港有水放水/冇水就冇水嘅年代嘅事，只要有人識做，適當地「通氣」，商場自然有「氣」。
中國之大，無奇不有，張總在巴黎老家 渡假之後，未返上海退休之家之前，又雲遊到港，準時在大學 EMBA開班，佢遊吓遊吓，遊到左丁山辦公室講起旅遊趣事，話上海浦東機場幾乎發生意外，因為一架航機（卡塔爾航空公司）呼叫因雷雨太大未能降落，在上空 盤旋多時等待降落浦東，即將缺油，要求緊急降落虹橋機場，但吉祥航空（中國一間廉航）一架班機在前，拒絕讓路，於是管制員被逼採取其他緊急措施，讓卡塔爾 航機首先降落，降落時，幾乎撞機！
咁都得？張總話吉祥航空機師好似有豹子膽，堅決不讓航道噃。張總走後次日，新華社有報道八月十三日發生此事，華 東民航局重罰吉祥航空，吊銷韓籍機師機長執照，點解韓籍機師咁硬頸不聽上海航空管制員嘅命令？木宰羊。韓籍機長在韓國會唔會咁膽粗呀？如果卡塔爾航班 QR888因缺油而在上海墜毀，中國醜死咯。