首播飯局被飛 陳鍵鋒：咁做好無聊!
1 :
GS(14)@2011-04-11 00:32:442011-4-7 NM
接受有線訪問，寸無綫唔夠大方的陳鍵鋒，日前出席新劇《洪武三十二》宣傳，無綫派出外事部副總監曾醒明全程傍實，若他再發炮的話，出口攔截；陳鍵鋒勇敢宣洩多年怨氣，無綫亦還以顏色，週一新劇首播，叫齊全劇演員飯局睇首播，偏偏無人通知陳鍵鋒。被飛的陳鍵鋒繼續寸嘴：「如果係刻意咁做，真係好無聊！」
身為男主角之一的陳鍵鋒，在《洪》劇海報只能靠邊站。他更在微博透露，無人通知他去飯局。
最新指引
同無綫即使再無合約，但陳鍵鋒日前用廣東話上有線做訪問，依然引起無綫大反應。據知，有線的訪問出街後，無綫經理人部門，即時發出內部新規條：「無論跟無綫簽有長約、短約、部頭約，亦不得以廣東話、普通話、英語，接受有線訪問！」一眾無綫合約藝人，接到全面封鎖的新聖旨，十分愕然。提出無綫內部新指引，陳鍵鋒禁不住扯火：「如果真係咁就好奇怪囉！本來已經唔可以去有線，唔可以講廣東話，依家連普通話、英語都唔得，咁係咪講日文、法文就得！其實無綫嘅藝人都好尊重公司，唔會貿貿然上有線，咁做好無謂！但係我睇有線網站，我又見到王祖藍都試過用廣東話做訪問，咁係咪兩個standard呢！」去年七月約滿無綫，陳鍵鋒當時仍在《洪武三十二》劇組，其時無綫曾搵人與他接觸，表示合約期屆滿夾唔到劇集八月煞科日期，希望他以舊有條件簽一份新合約。「唔明點解會拍拍吓先話發現我份約到期，要我簽約拍埋個劇，但完全無商量條件空間。」
十年零加薪
近日不少花旦小生如佘詩曼、林保怡等都決定北上賺人仔，唔再續約無綫，更早已經起步外闖的陳鍵鋒，四年前已堅持唔簽無綫經理人合約。「當時有個高層叫我去傾，其中有部分條件我唔係好接受到，除咗係年期長，當時簽約人工大概係一個大學生做咗兩年嘢嘅年薪，我提出咗個疑問，都做咗咁長時間，十年都收咁嘅人工，係咪有問題呢！對方就同我講：『如果你簽咗約，我哋會捧你，你愈嚟愈紅，會有好多外面賺錢嘢番嚟！』但我好純粹理性分析話，如果你（公司）真係捧我，我先有咁嘅可能，但如果打後五年你唔理我，我又收咁奀人工，我點生活！連屋企人都養唔到！我再要求多啲，佢哋話無得再加，我亦覺得無辦法簽落去。「嗰次傾完之後，佢哋又即刻話張約已經準備好，簽啦！依家係講緊十年八年嘅合約，我都要考慮！我話要攞番屋企考慮，佢哋就話，你考慮一晚好啦！第二朝一早，已經有人打嚟問我簽咗約未，我話要再考慮，之後就無人再聯絡我嘞！」陳鍵鋒說。
隨遇而安
無簽經理人約，唔係無綫「親生仔」，陳鍵鋒一直被不平等對待，不過，他聲言十分理解，「唔開心一定有，但我明白，佢哋簽artists，都要同佢哋交代，有分別我係理解嘅，但係唔好去做啲古靈精怪嘅嘢傷害人！」被飛出首播飯局只是第一步，陳鍵鋒隨時被cut戲份，「既來之則安之，我唔相信，三十集戲，要重新剪片好大工程，我覺得佢哋唔會花咁嘅時間同精神囉！」陳鍵鋒說。
無啖好食
在無綫十一年，陳鍵鋒拍過《衝上雲霄》、《學警》系列、《律政新人王》等人氣劇集，一度與林峯、吳卓羲、黃宗澤睇齊，但一直未有與無綫簽包薪經理人長約的他，被捧指數不斷下降，近年即使有擔正劇集出街，宣傳片亦被降格做陪襯。
主角變配角
03年，陳鍵鋒接拍《律政新人王》，同林峯齊孭男主角，收視報捷，但07年，因拒簽經理人合約，拍續集時已淪為大配角，改由馬國明擔正。
被迫演奸角
唔肯簽賣身契，形象健康的陳鍵鋒竟被安排演奸角，在《鳳凰四重奏》強姦佘詩曼三次，又在《千謊百計》中毒害徐子珊，乖仔形象一鋪清。
台慶陪跑
每年的台慶頒獎禮，陳鍵鋒都係陪跑一族，就算同期出道的林峯、黃宗澤、吳卓羲等全部有份角逐男主角，陳鍵鋒頂多有配角提名，連飛躍進步男演員都未攞過。
刪減戲份
先後拍過三輯《學警》系列的陳鍵鋒，第一輯擔正同薛凱琪做對手，第二輯與陶大宇、郭羨妮玩三角戀，戲份大減，到第三輯已淪為配角，拍奀星梁嘉琪做情侶。