📖 ZKIZ Archives

o靚模爸爸網上棟篤笑 一夜爆紅

1 : GS(14)@2011-01-22 16:49:51

http://hk.apple.nextmedia.com/te ... 104&art_id=14895381

【本報訊】「你 like唔 like?有冇 comment?」一段諷刺網民玩 facebook的網上棟篤笑自拍短片，日前突然在 YouTube爆紅，一夜間榮登本地瀏覽首位，連日累積逾 26萬點擊。片中自稱「 Lou記」的男子木口木面，對着鏡頭自言自語，卻妙語連珠，網民紛紛送上手指公喊 like。家有 o靚模女兒的 Lou記一時貪玩自拍，沒想過在江湖打滾 call客多年練就的口才，會令他一夜成名。他自嘲說「如果有人搵我拍廣告，我會考慮吓！」。
記者：梁曙光、譚志輝

原名石磊明的 Lou記，洋名 Louis，是個六十後，對於四十幾歲人就被網民喚作「阿叔」感到有點不是味兒。 Lou記在廣告界打滾 20年，目前在上環一間英文財經雜誌社當行政人員， call客搵廣告是主要工作。就如很多 sales佬一樣， Lou記轉數快，語言表達能力一流。
「我個女都好紅 o架， fans多過我！」 Lou記有一個正職當夜店 DJ、兼職做模特兒的 19歲女兒 Qewi。 Lou記一夜成名，原來也與 Qewi有關。
女兒勁笑上載分享

「我唔鍾意出去食晏，好多人，無無聊聊就匿埋喺房搵啲嘢玩」。 Lou記三個月前對着手提電腦自拍鏡頭拍下首條短片，用印在紙巾袋上的 iPhone圖案吹水調侃「 iPhone 5」，沒想過公開，但女兒看過後「笑到碌地」，翌日替他將短片放上 YouTube。 Lou記一覺醒來，發現自己在 YouTube出現，網民一致叫好，「反應好正面，大部份係讚，阿女叫我繼續拍」。
以 iPhone 5、 6、 7為題材的短片一連拍了三集，至昨日合起來逾 26萬次點擊，不過還未算能突圍而出。
即興「諗到乜講乜」

本周一，第四炮「人肉 FACEBOOK？ 20年前嘅 facebook，你又見過未?」出爐，當堂爆紅，「最初見得 500人睇，以為唔掂，到第二日上咗 YouTube本地排片榜首位，自己都嚇一跳」。片中最令人拍案叫絕的，是 Lou記示範人肉 facebook，打電話給老友 David噏了一段在 facebook找到的「感性」說話：「為甚麼寂寞總是那麼多？……」，再問對方「 like唔 like?有冇 comment?」結果被回敬：「 comment你條毛。」網民熱烈回應，有人說：「雖然係好白癡，但係好好笑！支持一下，喺大社會生活好大壓力，有佢喺度就唔怕啦！」
「冇乜創作過程 o架，玩吓啫，唔會花時間度，諗到乜就講乜，要即興」。他說，短片中的舊同學 David其實是虛構出來，當時自己只是對着電話筒自言自語。 Lou記全無演藝背景，連婚禮司儀都沒做過，口才了得，他說全因「在江湖打滾多年，食鹽多過食米」，「朋友成日話我講嘢好好笑，窒人最叻，應該係有啲 talent（天份）」。
諷用家行街捽 iPhone

拿 iPhone和 facebook來開玩笑，只因夠貼身，並不代表 Lou記反科技，事實上他亦手執 iPhone 4，照玩 facebook，「個女同男朋友鬧交，我都係睇 facebook先知」。 Lou記覺得諷刺的，是人太依賴科技，「行街都喺度捽，唔睇路，好似有自動導航咁」。在他的 facebook專頁，至昨日有 3,200人加入成為粉絲，有人更說要跟他玩人肉 facebook，將「手指公」傳真給他。他預告，若 facebook的短片點擊超過 30萬，便會兌現承諾推出已拍起的 Part 2。
爆紅短片語錄

1.（打電話給舊同學）「喂！時間緊迫，你聽住：『為甚麼寂寞總是那麼多？總習慣獨自溫習你遺留的傷痛……』，跟住有個心形，你 like唔 like呀?有冇 comment呀？」

2.「你唔知我講乜？唔緊要，我講個簡單啲嘅：『失眠，眼光光，到天光， 2 hours ago』。你 like唔 like呀？……我知失眠唔關你事……一陣間可唔可以 fax個手指公畀我呀？」

3.「我影咗一批相呀，我想寄畀你，如果你睇完啲相，你 like嘅話呢，就畫番個手指公，跟住呢就 send畀你啲朋友」

4.「我唔係癡咗線……咁你有冇 comment啫，乜嘢 comment你條毛啫，我條毛唔使你 comment啦。喂，你唔好發爛渣住先啦」

5.（收線後）「原來你親自打電話去畀你啲老友同佢哋講呢啲說話，佢哋係會發爛渣嘅！」

「人肉 FACEBOOK？
20年前既 facebook，你又見過未？」

---

2 : GS(14)@2011-01-22 16:50:36

窩蜂現象
集網民力量　易造就霎時紅人
2011年01月22日

去年 2月一場「犀利哥」的風暴，不但徹底地令網絡顛覆了現代人的審美觀，更創造了一批又一批千奇百怪的「網絡紅人」，這批其貌不揚，但言語出位、行為怪誕的無厘頭人物，剎那之間便可在網絡爆紅。然而，身處資訊爆炸的時代，這些霎時紅人，不少在很短時間內，便會被後浪冚過，瞬即便被摒棄遺忘。
近年本地最「長青」的網絡紅人，首推「巴士阿叔」，「你有壓力，我有壓力」的主角陳乙東在嘲笑聲中走紅，之後更要聲言競選特首，至於其他紅人則包括，以英語猛烈批評考官水平低劣及無能的末代會考生 Ruby，以及「大鬧元朗聯興行」的港女趙燕萍，還有「我有少少鍾意佢」的萬寧妹妹王允祈。
熱潮一過銷聲匿迹

而在內地，則以紅爆東南亞的「犀利哥」居首，他不但被封為中國網絡第一紅人，亦被稱為史上「究極華麗第一極品路人帥哥乞丐」，其經歷更將被拍成電影，至於其他紅人，如芙蓉姐姐、鳳姐，網絡上的風頭亦一時無兩。
網絡走紅最終依靠的是網民的力量，理工大學應用社會科學系副教授何國良表示，網絡上出現的通常是一窩蜂現象，香港人的文化不適合一些較具深度的話題，所以無論正面或者負面。只要不玩深度、快而簡潔，還有是非黑白分白，瞬即便會引來一窩蜂的點擊，但「就算死人冧樓都只係講幾日」，所以網民熱潮一過，無人點擊的網絡紅人便銷聲匿迹。
該校的社會政策研究中心主任鍾劍華則說，香港之外，國內的網絡紅人更爆，除了同樣是一窩蜂的現象，還有傳媒配合全方位炒作，但同樣，網絡紅人紅得快亦退得快，很難常久，通常「笑完、踩完、滿足完就算數。」
反而外國一些網絡紅人，例如靚聲村姑 Susan Boyle通常以才藝或創意作為賣點，引來的話題亦較長久。他認為，有人在 YouTube表演棟篤笑也算是一種創意，值得嘗試。
本報記者
當日相關文章

---

3 : GS(14)@2011-01-22 16:50:48

自命平凡
最愛黃子華　搞 gag也要有訊息
2011年01月22日

「我對自己係咪棟篤笑嘅人才都懷疑緊，不過如果有老闆支持搵我拍廣告、搞棟篤笑， I don't mind！」話雖如此， Lou記亦深明網絡世界的事來去匆匆，這個星期爆紅，下個星期可能已沒有人記得。
Lou 記說，自己只是一個平凡人、無名小卒，有逾 26萬人看過自己的作品已感滿足，「（冇人記得）唔會失望，都只係貪玩，我已經達到目的……如果好有企圖要出名，通常都唔成功」。他說，近日出街不覺有人認得自己，「可能去旺角多年輕人，會有人認得，如果有人同我 say hi，叫聲我 Lou記，我都會好開心」。 Lou記笑說，朋友知道他拍片搞笑，只對他說：「你好無聊呀！係咪黐咗線？要食藥呀！」
講到棟篤笑， Lou記原來是藝人黃子華的擁躉，他認為只有黃子華演出時不唱歌跳舞，講足全場，是真正的高手，「五分鐘 gag都唔知要度幾耐，諗到頭髮都白埋」。
不會以新聞政治作題材

他說，在外國棟篤笑很普及，在酒吧每周開一兩晚場，收入也不錯，但在香港，真正有叫座力的只有一、兩個，「（短片）有 20幾萬 views，但如果要買飛入場，有幾多人會？」他希望自己可作先鋒，令更多人在網上拍片玩玩，但不要一味無厘頭，「最緊要有 message（訊息）」。
Lou記說，對日後還會以甚麼題材拍片全沒計劃，但肯定不會以新聞作題材，更不會講政治，「後生仔唔會 buy o架！」
本報記者

---

4 : abbychau(1)@2011-01-22 17:08:53

其實我覺得唔好睇

---

5 : GS(14)@2011-01-22 17:10:25

是嗎? 我無睇過wor

---

6 : punpunm(4)@2011-01-22 17:48:40

講到Iphone567我先知道
我就覺得幾好

PP by IPAD

---

7 : GS(14)@2011-01-22 17:50:46

6樓提及

---

講到Iphone567我先知道
我就覺得幾好

PP by IPAD

點好法?

---

8 : punpunm(4)@2011-01-22 18:01:44

好無聊同好有創意

PP by IPAD

---

9 : GS(14)@2011-01-22 18:08:29

兩好wor

---

10 : glassfund(802)@2011-01-22 21:08:30

我都覺得無聊, 我對睇 E D 無厘頭野無咩反應的!
金呵啦對我仲有D反應. 我一邊笑一邊氣憤

---

11 : abbychau(1)@2011-01-22 21:34:14

我對睇 E D 無厘頭野無咩反應的!
+1

---

12 : GS(14)@2011-01-23 13:09:19

我都是他上報才知

---

13 : onesee(1238)@2011-01-27 15:53:09

其實唔太好笑, 不過我支持佢繼續創作

---

14 : pars(2406)@2011-01-27 16:49:22

剛剛先睇佢啲片，我覺得iphone輯短片齋內容就唔好笑，只係佢個樣(正經)同佢手上架野(滑稽)之間的反差而令到人笑，如果唔理或無感覺就真係一啲都唔覺得好笑。佢講facebook段片其實都一樣，反而我睇番樓上版友post出黎的對方就好好笑，可能我係文字中毒者啦:)

---

15 : punpunm(4)@2011-01-27 20:17:18

相關影片

PP by IPAD

---

16 : GS(14)@2011-01-27 21:54:44

的確在娛樂道來說，金坷拉才是高手

---

17 : onesee(1238)@2011-01-27 23:55:32

我終於記得金坷拉係咩啦

---