ZKIZ Archives


紐約客 左丁山

2011-8-5  AD




 

兩位讀者來函,一位索取名人每日吞丸「排油」之「維他命丸」名稱,呢樣恕難回答,西諺有云,我之蜜糖,汝之毒藥,吃丸唔該請教營養師、保健師、醫生,不可照抄他人之藥,人吞我又吞。另一位讀者Joe來電郵云:

「左丁山先生,說到醫生及護士人手,真係莫奈何,今天看報護士又呱呱叫辛苦,冇人手,但一說從外輸入,佢地又似醫生咁大聲反對,佢地搞保護主義冇問題,但要攪掂及少的呱呱叫,市民聽到煩,佢地將自身利益凌駕市民,我地唯有保重身體,自求多福。」

阿Joe之講法,相信係普通市民之心聲。總之如昔日金庸先生的明報社評名言:人不為己,天誅地滅。張五常教授亦講過,經濟學的基本假設就是人性自私,不理會呢個假設,無法子解釋好多微觀經濟學問題。

鐘 錶L有子長成,行將入讀哥倫比亞大學經濟學系,特登叫埋位公子與我地在上海總會吃午飯,等世叔伯「教訓」吓喎。鐘錶L在八十年代於中大商科畢業,寫咗三封 信搵工,有跨國大公司聘請,點知佢聰明到極,竟然捨大就細,不到中環威威,情願到工業區「屈就」,喺一間鐘錶廠打工,五年後就辭職自行開設山寨廠,至今擁 有內地大廠,如果佢當年選擇到中環着西裝返工,依家咪最多係大公司中國區總經理,高級打工仔而已,那裏會成為發達廠家吖。

鐘錶L曾移民加拿 大,回港時,留低兒子在彼邦讀書,今年考IB,居然考得44分(滿分45),以此成績,相信申請全世界任何一間大學都得,但細L一早申讀哥倫比亞,去年十 二月已獲得取錄,無謂再花時間申請其他大學咯,十九歲仔,已做足功課,知道哥大經濟系有三位諾貝爾獎人物,即Mundell、Stiglitz與 Phelps,還有廿六歲時就做咗哈佛正教授嘅Jeffrey Sachs,想起到四年級就會修讀呢啲大師嘅seminar,眼神為之發亮。私立大學教務長W曾在紐約長居,我地叫佢做New Yorker,教務W話:「稱得上紐約客,要滿足三個條件,第一,曾經失車,第二曾經居所失竊,第三曾經坐地鐵被人打劫,我三樣都經歷過,係不折不扣紐約 客嚟o架!」於是向細L教路,搭地鐵到哥倫比亞大學必經哈林區,如何趨吉避凶,不過聽講朱利安尼做過市長後,紐約罪案大大減少,細L唔駛咁驚啫。


PermaLink: https://articles.zkiz.com/?id=26764

Next Page

ZKIZ Archives @ 2019