|
||||||
|
華華成日覺得，如果港交所（388）要賣廣告，應該叫CEO李小加粉墨登場，而句slogan，一定要好似嗰啲桑拿廣告咁──新人事新作風! 過百經紀圍港交所 話 說證券及期貨專業總會會長王國安吹雞，今日中午休市嗰陣，召集過百個前線經紀，帶埋橫額齊齊衝去中環交易大堂門外示威抗議，兼交請願信，安哥估計，至少有 一二百人參加，又或者三五百人都唔定，實行逼爆交易所大堂門口咁話！但至正係小加好有吉士，打算親自接請願信，比起過往港交所任何管理層，小加真係開明到 爆燈！安哥平日講嘢比較激烈，小加亦算係寸嘴之人，兩雄正面交鋒，分分鐘擦出激烈火花！ 至於請願信內容，主要狂數小加推出嘅「李六條」（6項改革），包括出年再延長交易時間、正諮詢市場推行期貨晚市、計劃推收市後競價時段、股票機收埋經紀牌、收窄買賣差價同遙距交易；安哥話，港交所推行呢啲改革唔顧普羅投資者利益，諮詢都係假諮詢云云。 不過更搞鬼嘅係，小加今晚又約咗7個經紀業團體食飯，安哥都有份，唔通佢兩個之前已度好，日頭片完，晚頭即刻擺和頭酒乎？ 李華華 |
||||||