|
||||||
|
七一臨近，「反地產霸權」、「反通脹」等口號已捲起上街怒火，無能政府在無諮詢情況下，突然急推立法會議員「替補機制」，剝奪選民投票權。惡法未通過，大律師公會三度狠批違憲。 「當年如果廿三條通過咗，對一個民主社會好有威脅性，所以我出嚟行。」麻醉科專科醫生胡可源今年五十出頭，自言體力不佳，○三年去過七一遊行，行不了半 場，覺得太熱便離場。他像許多港人一樣，平日只關心切身的事。然而，今年七一，他再次出動，他說：「我份人好簡單，我哋擁有一人一票投票權，咪去投票選我 想選嘅人囉，點解政府有個無邏輯、咁難令人明嘅替補機制？」 「替補機制係用嚟對付上年五區公投，但既然啲錢係我哋，啲票係我哋，使乜政府幫我哋決定要點做？五個人辭職再選，係要冒險可能被叮走，但最終佢哋又選番入去，即係有民意基礎！而家監生逼我哋接受替補機制，遲啲又會唔會要我哋接受番廿三條？」胡說。 打惡法名醫也上街 醫學界中不少人都是尊貴又怕曬，但今次七一，也預備上街宣洩不滿，醫學會會長蔡堅便是其一：「嗰日朝早要參加慶回歸酒會，中午要返嚟診所處理文件，下晝再 要過海去維園，我係又怕熱又怕曬o架，仲有份碩士論文未寫完，不過唔去發洩吓，我驚我又嬲到血壓再升高啲。」「替補機制點解淨係針對民選議員？功能組別 呢？仲有特首選舉呢？如果政府話曾蔭權有咩冬瓜豆腐，由梁家傑頂上，OK，我由頭再諗過支唔支持你個替補機制？」蔡說：「我係唔支持五區公投，不過我一樣 去補選，因為投票權係我應有o架！政府策略永遠就係由上而下壓落去，有晒方案決定先嚟『聽取民意』。」不但專業人士上街，音樂人周博賢於○三年七一遊行 後，作了首歌《多謝你！下來吧！》鬧政府，今年首歌被網友放上YouTube轉載。「我唔係年年去遊行，不過呢一年發生好多事：菜園村、預算案、茉莉花革 命、地產霸權、國民教育，以至最近的替補機制，最初話搵一個落選嘅最高票人士去補呢個位，唔理對方係咪同一條隊；而家又改口，話同一名單都得，但政府有無 諗過單議席單選票，先至係最能代表市民？」周說：「警方話唔俾帶樂器嘛，我就帶水樽同埋筷子去敲打，咁樣又算唔算樂器呢？」 卅蚊一餐五個人食 除了新鮮熱辣的替補機制，貧富懸殊是最多人關心的七一議題，像住在荃灣老圍村寮屋的刁家，每日難題是：怎樣卅蚊買一餐餸。刁太說，他們一家五口以前一餐花 二十元，現在通脹狂升，再慳也要三十元：「一斤菜舊年八蚊，而家要十二蚊；豬肉以前一斤十八蚊左右，前幾日已加到廿四蚊；我每次買都係叫阿叔切十五蚊俾 我，嚿豬肉愈嚟愈細，唯有食少啲。」卅蚊一餐餸怎樣買？第一味腐竹豬肉是近日難得好餸，刁太說：「腐竹係街坊齋堂留俾我哋，佢哋好人，有時人哋拜過神嘅祭 物，無人要就俾我哋。」第二味是中午食剩的腐乳通菜，「煤氣又加、電費又加，煮一餐飯都貴過以前，依家我哋都會煮多啲，食幾餐。」就算買餸，刁太也專趁街 市收工時才買，因這時清貨，最筍價，就算買，也挑隔夜菜這些下價貨才敢買。 兩歲女兒一個月食三罐奶粉，每罐要一百六十八元，比半年前加了兩成幾。刁太有時 為了慳奶粉錢，沒按標準餵足奶，有時女兒吃飯算了，「奶粉好貴，慳得幾多得幾多。」免費派食物的食物銀行，刁先生未聽過：「社工無同我哋講過有食物派，可 能呢區無啩，如果有，每個月慳番幾百蚊已經好好。」刁太大女和二子讀六年級和五年級，「書簿費資助唔晒，每學期每人要買一千幾百蚊書，點解啲書會愈嚟愈 貴，又改版，家姐嘅書俾細佬都唔得。學校冷氣費一個學期又一百幾十，中午飯有資助，但每人每月都要貼二百蚊，總之樣樣都貴晒。」刁先生無奈說。刁太做主婦 沒有收入，刁先生本可不打工，申請八至九千元綜援舒服生活，但他自覺有手有腳，不想全靠資助度日，於是做食環署外判清潔工，月入五千多元，只拿三千多元綜 援，幫補家計。但怎努力也鬥不過通脹，「柴米油鹽樣樣貴，人工只係加好少，政府做過咩？有無打擊通脹？社會有好多低下階層，政府有無真正幫助？」刁先生批 評。 替補機制補鑊 源起政府不願再見去年五區公投，上月提出替補機制，建議日後立法會議員辭職、去世或被褫奪職位時，不再補選，改由同一選舉中最接近得票者補上。替補機制的 謬誤極多一）大律師公會指出是違反《基本法》，剝奪市民選舉和被選權二）中大政治與行政學系副教授馬嶽指出，以○八年新界東選區為例，假如社民連梁國雄辭 職，便由當年落敗的自由黨田北俊頂上，換言之投給社民連的選民，便再無議員代表，反而得票低的自由黨可入立法會，削弱立法會代表性。下一步政府週一讓步， 改為由同一張參選名單下一名未當選的參選人補上，但仍是取消補選。修訂換湯不換藥，市民未收貨。但政府擬下月通過惡法，堅持不諮詢公眾，令人擔心廿三條隨 時照樣匆匆立法。 天台劏房熱似火爐 通脹之中，赤貧戶最怕是貴租。住在深水埗基隆街唐樓天台劏房的劉太，每天傍晚買了餸，便拖着兩個兒子「行山」回家。說劉太回家路似行山，並不誇張，唐樓沒 升降機，九歲大兒子頂着廿幾磅書包走在前面，劉太就拖住兩歲細仔和大堆餸菜，跟在後面。行到三樓，未及三呎細仔率先「發難」，扭着媽媽抱：「媽咪！我行唔 郁喇！」 細仔死抱媽媽腳，像樹熊般半拖半拉，終行完九層樓，足足二十分鐘！「每次返屋企好似打仗，個大仔成日同我講唔想住天台、唔想行咁多樓梯，我話鬼叫我哋窮， 有咩辦法？」劉太邊喘氣邊埋怨：「政府無租金管制，又唔肯建多啲公屋，啲高官點解唔嚟呢度家訪，了解吓民間疾苦呢？」 天台的家，又是劉太一家四口另一噩夢。他們住的百呎劏房，只是天台僭建鐵皮屋內劏出來的五間房之一，屋內除了一扇不會開的窗，就只一條俗稱「貓梯」的樓梯，連接一片天。 「住天台劏房唔驚就假，好似馬頭圍道大火，細路點走？外面啲房都動輒二三千蚊租，我老公做廚房雜工，月薪七千幾，點負擔得起？呢度只係千四蚊。講真，行都 唔係問題，最慘係熱似火爐，開住冷氣，啲汗都好似沖涼咁，細仔成日打開雪櫃，塞自己入去，我見到實鬧，但諗深一層，佢太熱先咁做。」劉太嘆氣。 夏天乾煎，雨天漏水，頭頂大堆電線，又怕漏電，是劉太這類無領綜援的赤貧戶唯一選擇，「兩個細路仔單單坐校車同學費，都要過千一個月，業主都係因為體恤我哋窮，先無加我哋租，如果政府拆咗呢啲天台劏房，又上樓無期，我哋一家真係要瞓街先得。」劉太無奈的說。 難敵集團商戶逼遷 不單低下層難頂貴租，在大型商場經營的小商戶亦被逼得透不過氣。屯門市廣場今年續租要加一成以上租金，個別新租戶租約比上手貴兩成至兩成半；沙田第一城及 馬鞍山廣場翻新後，平均加租百分之十七，其中醫務所加得最多，加幅達一倍。小商戶除了抵不住加租結業，亦有因為鬥不過大集團被逼遷。「如果你開個價我承唔 到無辦法，但佢哋係突然同我講，你唔可以再繼續喺呢個商場做生意，我覺得好無良。」在火炭駿景園商場經營西餐廳十一年的廖茗勵說。 駿景園商場由港鐵擁有， 並聘用新地旗下的啟勝做管理，年初廖茗勵才從其他租戶口中得知，五月約滿後鋪位會租予一間琴行。當時管理公司解釋要重整商戶組合，將補習社、琴行等歸納一 區，但個多月後卻通知她商場已沒有食肆鋪位，「我哋一直好好生意，全場幾乎最旺，舊年先用十八萬翻新個廚房，無諗過忽然話會唔續約。但附近客人想要咩，業 主唔會理，佢哋係鍾意大集團。」 廖茗勵說來仍然勞氣。本報向管理處查詢，得悉一個食肆鋪位已租予板長壽司，另有一個鋪位仍未租出，正與另一間連鎖餐廳洽 商。廖茗勵續指，作為駿景園租戶，除繳交租金外，另加冷氣管理費每呎三元半，還要上繳相等於營業額百分之十三的「分成」，但最令她氣憤是退租時還原鋪位的 苛刻要求，天花板要噴白，牆身要補窿髹過，地台更要打至見石屎，「足足打咗四吋，我從來未聽過，每晚十點後開工俾雙工，十二點後俾三工，五日工程埋單三萬 蚊。十年前兩鐵合併前，九鐵份合約無呢啲要求，但唔到你唔聽，按金喺佢度。」 熟客：幫襯十年好失落 廖茗勵將鋪搬到對面工業區的坳背灣街，從頭做起。訪問那天，熟客王先生打電話確定門外有車位才過來，「好失落，之前返工日日幫襯，依家要有時間先搭一個站 小巴或者揸車落嚟。」在駿景園工作逾十年的商戶王先生指，這裡食物咖啡合他口味，「我哋睇住佢哋開頭無客，一路守，到依家有忠實住戶捧場就要走，好可 惜。」 他認為，商戶組合調整是無可厚非，但既然有特色，不應扼殺。新鋪鋪面七百呎，座位比舊鋪多一倍，月租三萬五千元。廖茗勵指，以前晚市、假期生意最 好，現在每日五時半可以關門，星期日休息，午飯時間反而最忙，為迎合市場，午餐平均減價兩三元，一點前埋單減一元，希望多做一轉客，「之前每個月賺三、四 萬，依家要重新嚟過，不過唔使追數上繳仲舒服咗。」她期望三個月至半年可以收支平衡，但經過今次，以後都不會再租商場鋪，「明知鬥唔過，怕怕喇！」 |
||||||