2011-5-24 AD
|
||||||
基金經理一向係中環天之驕子,但係世事無絕對!華華班大行sales老友近日猛吐苦水,原來某家傳統基金公司,為咗節省成本同重組業務,縮皮唔再以香港為大本營,搞到香港辦事處一班基金經理雞毛鴨血。 江湖傳聞,縮皮基金公司唔止得一間,大型同中型嘅,各有1至2間。至於被開刀嘅對象,唔係普通嘍囉,而係基金經理級數。更大鑊係,要起身嘅唔係講緊一、兩丁友,而係成team人齊齊食無情雞。 據啲老友講,今次風暴同早嗰輪只係玩下執位完全係兩回事,肯定搞到基金界人心惶惶。華華班sales老友,原先識開同相熟嘅基金經理—夜間消失,都幾白色恐怖。 又係延長交易惹的禍? 更心寒係最近畀人開刀嘅,唔止基金公司。有傳聞話,受影響嘅包括搞開衍生工具班老友,特別係搞股票關連工具嘅,更加無啖好食。至於係邊間?傳聞喺中環國際金融中心內搞開窩輪嘅U字頭大行係其中之一。 有證券界前輩話,延長交易時間之後,累到市場波幅同成交都細咗,大家無啖好食,間接累窩輪成交縮埋。唔覺唔覺中環原來掀起咗一陣炒人潮,而且似乎陸續有嚟。
|