ZKIZ Archives


前四嬸「私家廟」夠卡士

2017-04-20  NM

在《劉鑾雄講大劉》系列訪問中,大劉透露:「有人同我講,你死咗啲錢都帶唔走,叫我捐七千八百萬加幣,去加拿大一間佛堂。」

精明嘅大劉當然睬佢有味,其實捐私家廟都有藝術,真係有「卡士」唔係咁容易,四叔信道教,前妻劉惠娟信藏傳佛教,就喺溫哥華列治文區買幅農地自建私家廟——創古寺,寺內掛滿前四嬸同埋女兒李佩雯與喇嘛籌建創古寺合照,兩母女都花唔少心機在此廟上,單是擇日就夠刁鑽,動土儀式選○四年十月十日,大雄寶殿的主尊釋迦佛像入藏(註:即把寶物及經卷藏入佛像內,再逐一裝嵌),選「四久」殊勝時刻,即○九年九月九日九時正,寺內不只黃皮膚信眾在修煉,還有唔少鬼婆、鬼佬在修煉,直頭弘揚佛教到番幫,前四嬸與女兒可謂功德無量。

馬雲要威過喬布斯

已故蘋果教主喬布斯有錢又有品味,眼鏡戴德國手造Lunor品牌,生前訂造一艘七十八米長的超級遊艇,就幫襯創辦於一八四九年荷蘭FEADSHIP(Royal Van Lent)船廠,價值一億歐羅;阿里巴巴主席馬雲將公司在美國上市,又同總統「侵侵」見面,也學得蘋果教主品味,幫襯FEADSHIP,訂造一艘一百米長Super Yacht,價值一億半美金,艘船的長度及身價都超越喬布斯那艘Venus,不過千祈咪好似喬布斯咁,艘船預計二○一二年落水,未等得及,喬布斯於二○一一年就因胰臟癌要上天堂,Venus現時留番俾老婆Laurene Powell Jobs,真係睹物思人。

加州健身冇得復活

黎姿老公馬廷強搵埋商界友好,今年一月向加州健身(California Fitness)嘅臨時清盤人,購入健身器材等夜冷貨。話咁快,坊間就出現咗七間Goji Studios,傳聞就係由黎姿夫婦開嘅。而Goji的健身總監,為來自澳洲、全港第一位專業女MMA拳手Tricia Yap。Tricia曾亮相ViuTV的《G-1格鬥會》,有晒gimmick。Goji大部分分店都開喺加州嘅舊址,被指係翻版,以往加州健身教練屈客買program臭名遠播,梗係要保持距離,Goji在Facebook就強調:「我們不是再生的加州健身,與其毫無關聯(we are not California fitness reborn. We have no association with them at all.)」Goji Studios今年三月先成立,前身係去年十一月成立的Smart Fitness。Smart Fitness董事包括黎樹勳和張偉雄。兩人都係創富金融集團創辦人,由黎姿兩公婆持有的卓珈(8358)亦係由創富融資做財務顧問。小宗打探到除咗健身,仲有營養師駐場,月費五百蚊起;走高格調路線,同李玟老公Bruce Rockowitz搞的Pure Fitness有得鍊!

中環寸嘴西洋文化沉淪復活完蛋

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

復活節假第一日Good Friday,走到四季酒店lounge歎個早餐,洋人好着重復活節嘛,啲侍應都唔識得攞啲「Cross Bun」——十字包招呼吓來應吓節,真係谷鬼氣,要叫先識得攞出嚟,仲話廚房已經做咗喺度!都唔識得睇實時節去做嘢。環顧香港幾家頂級酒店,係半島酒店最有節日氣氛,話晒仲係嘉道理家族管理,文華酒店個Cross Bun都退晒步,仲賣三十二蚊一個!巡迴咁多間頂級酒店,Ritz- Carlton個Cross Bun方為最正宗,橙皮、肉桂味夠香,我喺天龍軒食晏,個副經理都由西餐廳「班」三個過嚟我試,咁為之今時今日service,否則淪為order taker。

唉,香港點做國際化城市?家陣咁搞法,香港只係淪為中國其中之一個省市,我哋呢啲港英餘孽真係睇唔順眼,有次去叫做全港最高級英式會所晚餐,個captain介紹甜品時,唔知係咪training問題,叫啲Pâté de fruit(法式軟糖)做啫喱喎,唉,嚇到我吖,要當場指正佢,食完餐晚飯,就知道香港西洋文化已經沉淪緊!

PermaLink: https://articles.zkiz.com/?id=246513

Next Page

ZKIZ Archives @ 2019