|
||||||
|
中環中心有間 「大班」餅店，呢間餅店嘅女經理非常落力，服務甚佳，而且唔止賣麪包，仲賣埋早餐通心粉，上午生意好到不得了，抵佢嘅！個幾月前，大班牽頭加價，每個麪包 加五毫，如果講銀碼，大家唔覺意，照畀可也，但如果講加幅，百分比高達十幾至二十幾巴仙不等，幾高o架。近日香港愛用「無良僱主」呢個詞，逢商必奸，逢老 闆必無良，逢加價必定係「狂加」，書商加價三至五巴仙就係「奸商狂加兼無良」，好多報紙編輯患上腦筋懶惰症，寫標題就像copy and paste，好容易收工。呢幾日有朋友要登廣告，仄咗一輪，發覺幾張報紙嘅廣告報價與三個月前相比，已經加咗接近二十巴仙，呢啲報紙老闆唔知又係唔係奸 商、無良、狂加呢？有苦衷嘅，報紙廣告加價都係為咗出糧畀記者編輯嘅啫，等佢地更容易罵他人加價無良吖嘛。 呢日在中環中心聽到有句流行用語：「大班無良」，即係鬧大班餅店加價，記者G就話：「大班啲麪包幾好食吖，算有良心o架嘞。」左丁山聽到有人鬧大班無良，仲以為鬧鄭大班o忝，點知日頭唔好講人，一講起鄭大班，就接到萬事德電話鬧鄭大班無良。
萬 事德與鄭大班老友鬼鬼噃，做乜來電罵鄭大班無良，萬事德講，鄭大班搏命支持李卓人搞最低工資，害苦了低下層教育程度低嘅工人，害到佢地冇工做，仲唔係好心 做壞事，變成無良心？一位六十五歲阿伯在空地露天停車場收銀，一日坐足十個小時，月薪五千，呢位阿伯話自己無一技傍身，有人請，月薪五千，已經滿足，點知 有咗最低工資法例，停車場公司計吓數，呢位阿伯要七千二百八十元一個月（十小時乘二十八元乘二十六日，乘夠三十日就要八千四），立即炒咗佢，改請一位五十 零歲，可以做埋停車場清潔與除草噴水除塵嘅男工。萬事德自己請好多工人（例如站在街頭派報紙），一㩒計數機，條數唔掂噃，已將部份工序搬上深圳，係三十年 來第一次，跟住更改僱傭合約，鄭大班知道就罵萬事德係無良僱主，叫佢加服務費，問報館老闆攞。萬事德就話鄭大班好心做壞事，報紙售價六元，十二年不加，報 館點肯增加服務費呀？ |
||||||