|
||||||
|
獅子行會喺2月最後一日公佈2010年度全年業績，每次業績都吸引過百中外記者出席記者會，逼爆獅子行會議室。不過，呢個萬人空巷嘅情況將會成為絕響。 新 人事新作風，噚日滙控（005）話，今次業績發佈會採用視像廣播嘅新形式進行，當日香港時間晏晝5點開始，業績撮要同powerpoint會掟上 webcast，同時滙控主席范智廉、行政總裁歐智華同財務董事麥榮恩等管理層，就齊集喺倫敦主持業績發佈會，仲會透過電話會議解答記者嘅問題。 獅子行發言人話，咁做係希望全球關心滙控嘅記者，都可以參加記招，唔使特登飛嚟香港。佢仲話美資大行好似花旗、大細摩、美銀美林同高盛，都係用類似嘅做法。 不過，各位香港記者都唔使失望，事關8月管理層會齊集喺香港公佈中期業績。搞搞吓，日後范主席同歐總，會唔會學內地溫總咁，喺網上同市民真情對話呢？ |
||||||