好多左翼人士都怕領展賣商場會危害小商戶。只不過，中環客用另一個角度睇，領展拆售商場，其實某程度上令商場發展同管理百花齊放，扶持中小型地產商，中環客反而認為未必係壞事。
對中小型地產商嚟講，佢地想要發展一個大型商場，查實係一件好難嘅事。因為要發展大商場，就要有一個至少幾幢樓存在嘅大型屋苑支持，近年香港地價咁貴，中小型地產商有財力去發展單幢樓已經好唔錯，更何況大型商場。所以依家啲新商場，全部都係倒模咁，由幾間大地產商操縱。所以行商場係一件好沈悶乏味嘅事，依家大家行商場，都係港鐵、 領展 、太古、新地、九龍倉、信和呢幾個集團，仲要啲樣都查實好差唔多。
如今領展賣走部分無咁賺錢嘅商場，雖然唔少位置或設計都係豬頭骨嚟，但正因為佢豬頭骨，俾唔同嘅小地產商有辦法擁有商場，唔係令商場風格更多元化，大家唔駛再去啲倒模嘅商場，呢種打破壟斷局面嘅做法，乜唔係一件好事嚟嘅咩？
由於領展依家賣商場，都係賣俾好多唔同買家，變得令香港商場唔再單一化，或者有新公司可以殺出一條血路。所以領展賣商場，大家應該好歡迎至係。
中環客