ZKIZ Archives


證監會突訪南華


2003-10-30  NM




吳鴻生旗下間南華融資,近日風雨飄搖,喺雙十節那日,證監會一隊人馬突然「造訪」,要調查一下佢哋早前保薦一間叫搜豹嘅公司上市事宜。呢間搜豹話自己喺珠海生產保健食品,南華幫佢申請在Gem掛牌,點知不斷被港交所上市科質疑,指間公司得十丁友,既無廠房、又無R&D設施,唔多似有兩年營運歷史;仲話招股書內容有誇張成分。最後,港交所喺十月九日回覆,reject唔俾搜豹上市。跟住第二日,證監會就殺到,搵處理呢單deal嘅陳姓董事,及負責响上面簽名嘅吳鴻生頭馬,Howard Gorges傾傾偈。證監今次效率咁神速,除咗因為今年四月開始生效嘅dual filing外,SFC對中小型嘅財務顧問特別留意,而南華早與SFC交過手。事緣南華系分拆Jessica及《資本》雜誌上市時,都巧妙咁運用財技,繞過上市條例,激到SFC生蝦咁跳。《Jessica》及《資本》,本來屬於已上市嘅南華集團旗下,根據上市條例PN15,要分拆一間公司上市,母公司最低限度要喺過去五年內,有三年共有五千萬嘅純利紀錄,但係人都知南華經常蝕到嘔,梗係唔符合分拆條件。南華於是先將Jessica及Capital嘅股份,派發給吳鴻生及其他揸住南華集團嘅小股東,咁呢兩間公司就可以獨立於南華集團,然後自己招股上市。兩公司總共集咗二千七百多萬!吳鴻生本來還打算分拆埋南華裡面,喺瀋陽生產藥物嘅津昌上市,SFC今次及時發覺,即刻落閘唔放,最後先分拆唔成。自此以後SFC亦加倍留神。


PermaLink: https://articles.zkiz.com/?id=22178

Next Page

ZKIZ Archives @ 2019