|
||||||
|
香港人喜歡搵錢，除了股票、外匯、物業外，連史諾比公仔、鐘錶等，總之能搵快錢便炒作一番，甚至學生哥也加入行列。今期訪問了五十位人士，細說其投資故事。
後悔唔信太陽陳
蔡素玉，現任立法局議員，曾在新鴻基證券工作。 「投資我都算最失敗，八二年買樓不成，拿住百五萬元唔知點用，於是學人炒股，我都唔記得買咗乜，總之噏過堆數字，又賺過吓錢咁。 「八二年大跌市前一日，個市跌得好緊要，於是打電話問喺新鴻基做的陳新燊（太陽基金創辦人）意見，佢講咗個行頭術語就掛線，好似斬纜啩，總之我蠢到聽唔明，又打去問佢，可能佢好忙，大聲叫我賣哂佢就cut 線，咁我咪聽佢話沽貨囉。 「個市尾段又升番，我唔敢再打俾佢，怕俾佢鬧，於是打俾另一朋友，佢話啲別墅都係賣三百萬左右，我一時貪心想要層別墅，就無沽哂啲貨，搏個市反彈。點知第二日真係黑色星期五，個市跌哂，累我蝕幾十萬。」 一夜變光棍
董偉，七十一歲，證券經紀業協會首任主席，現為眾利證券老闆，由上海至香港，縱橫股壇逾半個世紀。 「我十五歲就入行做練習生，當時舊上海好繁華，我學人買鬼佬股票，好似怡和啤酒，然後趁高沽貨，賺到唔少錢，差不多晚晚上餐廳。 「點知四九年解放後，中共政府認為股票投資係投機倒把的行為，但我無諗過上海交易所會停市結業，揸住的藍籌股唔捨得放，結果一夜間變得一文不值。五二年隻身來港，光棍一條，要由頭做起。」 愈知情愈死
余志明，宜高科技主席，博學堂創辦人。 「八一年我喺獲多利做，包玉剛宣佈將旗下隆豐併入九倉，我哋幫佢做文件嘅，兩間公司老細都係同一個人，收購應該十拿九穩，便大手追貨，攞咗大部分資產來買隆豐股份，搏套戥獲利。好衰唔衰，包Sir 突然終止收購行動，搞到我輸咗十幾萬，差不多係我當時大半年的人工。」 最激氣管理層無義氣
歐陽伯權，信安國際亞洲區行政總裁，去年接受本刊訪問時，曾表示不會買科網股。 「都話科技股係泡沫，買股要搵大藍籌，點知揀咗電盈，佢扮藍籌原來係網股，累我蝕錢，十五個幾買入一萬股，跌到兩個幾，睇嚟真係要長期放在櫃桶底。 「股價低都唔緊要，最激氣就係管理層無義氣，個個高位套利，小股民就接晒蟹貨。」 累父母輸錢
顧承浩，周生生證券電子商貿部經理 港大畢業五年。 「我九六年買過明珠興業，五亳子買入，三元沽貨，心雄起來學人炒輪，點知一個金融風暴，連阿爸阿媽交給我投資的本金都蝕埋，足有六位數字。 「我最記得有隻六八八的輪，買入一元二角，諗住在一元四角走，點知第日朝早要開會，無時間睇，結果一朝早便跌至六亳，當時仍然不肯放，希望搏反彈，最後跌剩一仙。」 一元賣樓
藺常念，五十歲，富昌證券總經理。 「我八十年代在非洲尼日利亞一間搪瓷廠做經理，年薪過百萬，當地無消遣，三年後儲到數百萬，於是返香港炒哋產。九二年斥資八百萬人民幣，在鄉下湖南起樓， 當時住宅樓賣三千元一平方米，寫字樓就賣一萬元，兩者的建築成本相差不過每米幾百元。但九五年新廈落成後，商廈供應太多無人要，一直丟空，我無眼睇，唯有 用象徵式一元蝕讓比鄉里。」 股票變廢紙
林少陽，曾任財經記者，現為寬網研究部主管。 「九六年同女友夾錢，入咗二千股百富勤，由十二個半升到十八個半，開心過一排，點知間公司最後執笠。我當時無諗過，股票可以變牆紙，而女朋友即係依家我太太，就為咗呢件事足足哦咗我三年。 「我仲記得大概在九七年六、七月個陣，已經傳百富勤唔掂，但梁伯韜、杜輝廉出來否認，十月仲出聲明指公司財務狀況良好，叫人唔好信謠傳，我見出得聲明內容都應該可信，點知全部流料。倒閉嗰日，我做緊財經記者，仲要採訪梁伯韜，質問咗佢三次財務問題，佢都唔肯正面回答，真係嬲到想講粗口。」 蝕了半層太古城
謝志文，四十六歲，寶途集團企業發展董事。 「我第一次投資賺大錢是八三年，拍拖無乜好去處，我就同女朋友去睇樓，當時太古城開始賣，有句口號，『住太古城，係好家庭』。女友鍾意，我就用七十萬買入一個千一呎大單位，後來結埋婚，愛巢至今唔捨得賣。 「至於第一次投資蝕大錢，就是後來用四十萬入咗八萬股真善美，當年間公司好巴閉，揸好多成衣配額，我仲收到風話有土耳其財團擬高價收購，點知無幾耐間公司執笠，埋單計我輸咗半層太古城。」 幫阿爸報仇
黃瑋傑，輝立證券董事。 「我老豆七三年股災時輸咗差不多兩層樓，我細細個就諗住同佢報仇。十六歲開始炒股，但成績麻麻。至八七年個市升得急，期指長期維持三百點高水，較合理價五十點高很多，我見唔對路，於是做期指淡倉，沽出五張，個市第二天就大瀉，淨賺廿五萬，算係光宗耀祖。」 無端啃佳寧
朱頌田，七十歲，朱頌田證券老闆，六○年代入行，七二年開股票行，最近清理公司夾萬，發現有一大堆佳寧股票，怒氣未消，逐張撕掉。 「在七十年代尾，陳松青打骰的佳寧借殼上市， 唔夠三個月轉炒金門大廈賺七億，佳寧愈做愈大，股價也由亳子升到十七元，吸引很多客追貨，仲用孖展來炒。我已勸啲客見好就收，點知俾人鬧，話阻人發達。到 八二年傳出唔掂，股價係咁跌，由十蚊跌到五蚊，我又猛叫啲客要止蝕，但佢哋唔肯，後尾跌到得番幾亳子，我無迫的客斬倉，自己啃咗批貨，點知八三年公司清盤，無端端揸咗三萬股。」 叻就唔使講股
葉尚志，第一上海研究部經理。 「六年前，我試過一日買十幾次期指，覺得佢會升就做好倉，跌就做淡倉，考下自己入市時間準不準，玩了十幾日，試過一日賺了七倍，但過了幾日連本都蝕埋。 「無咗咁多錢，都係買番的穩陣藍籌股算啦。我雖然做講股呢行，叻就唔使出嚟講，一早收山啦。」 平均成本法牛皮市唔掂
林堅，結好投資董事總經理。 「我去年九月開始玩定期買藍籌碎股，雖然股市反覆，百幾萬本都賺到三、四十萬元。今年年頭開始玩，成績差得多，股市一直跌，而我持有五、六十萬元的貨，賬面虧蝕七萬元。雖然平均成本法穩陣，但在牛皮市都會蝕，若跌到萬一點，我打算清貨。」 信自己唔供強積金 黎展鵬，40 歲，卓柏斯產業顧問董事總經理。 「我唔係唔信投資，只不過唔信俾人去投資。我自己開測量顧問公司，本來屬於自僱人士，但我專登唔出糧俾自己，咁樣咪可以唔使供強積金。睇番轉頭，呢個決定好啱，事關今年第一季強積金的基金大多數輸錢，但我自己就將投資擺在毫無風險的產品，做咗好多份零存整付，每月供少少，好似小蜜蜂儲蓄咁，有啲五年前做的存款計劃，足足有九釐息添。」 以為分析真係唔同咗
郭思治，平和集團營業部董事。 「我炒股廿幾年，見過不少股災，玩得好小心，豈料去年科網股熱，和黃賣橙賺這麼多，盈科又可鯨吞電訊，以為計公司的方法不同了，於是試吓買科網股，揀了榮文科技，業務成績都算不錯，三亳子買入一百萬股，豈料跌到變仙股。 「我在證券行這麼多年，沒想過股票會變仙股，例如酒店股差極都有實質資產，但這些科網股的資產都是無形，又話商譽、客戶關係網絡很值錢，任佢講。日後睇科網股，還是用回傳統基本因素分析。」 炒匯炒到做副總裁
沈世捷在福建漳州財經學校唸經濟系，十多年前由大陸來港，從事中國貿易，閒來為消磨時間，就到英皇金融參加外滙講座，結果由「客仔」變成炒匯專家，現為英皇金融集團副總裁。 「我試過炒外匯兩日賺廿四萬港元，結果外匯公司猛邀請我加入，由客人變為炒匯專家。當時是九八年十月七日，我睇圖表見日圓跌了好多，相信會有技術反彈，於是在一二九水平揸YEN ，其間仲加碼，咁啱日本央行話唔會俾日圓持續積弱，短短兩天內，美元兌日圓由一二九反彈上一一六，令我賺大錢。」 執條襪帶累身家
胡永健，宏陸證券行政總裁。 「我以前打工的證券行，九六年送了百萬股Option （認股權）給我，初時無意行使，但九七股市升到㷫烚烚，公司股價不斷升，又宣佈派輪給持股人，諗住不如連汁都撈埋，攞埋佢隻輪，於是行使了認股權，但無即時沽貨。 「除了花筆錢去換正股，因為行使咗認股權，繳交了一筆達六位數字的薪俸稅，點知個市跌番落嚟，我就做咗蟹。」 六四一鋪清袋百萬元
蔡國強，香港證券投資——理論與實踐作者，現任盈泰證券董事兼策略顧問。 「八九年六四那次政治市，我百多萬流動現金一鋪清袋。 「當時股市因局勢混亂變得波動，我覺得是大好時機，於是拿大部分資金去入貨，部分更是玩孖展及在證券行篤手指。萬料不到真會開槍，股市兩日由二千八跌到二 千一，幸好數天後有報章傳李鵬遭行刺，個市升番少少，我才不用抬錢贖身，但所有資金無哂。從此以後，炒股賺了先抽起本金。」 不熟不買
薛珍納（Janet De Silva ），加拿大永明人壽（國際）有限公司主席，今年來港工作。 「我以前不懂炒股，五年前跟朋友，用五千元加幣買了一隻煤礦股John Paul ，豈料由廿五仙跌至二仙，而我的朋友則把那隻煤礦股股票鑲起，框架比那張股票還貴。 「從此以後，業務不熟悉的股票我不會買，保險股至少知道那個時機最好，例如宏利九九年九月上市，股價升得不錯，我在十八元加幣買入，在三十九元半沽貨；永明人壽去年三月也上市，我知情況會跟宏利差不多，便在十四加元買入，現時都升上三十一元加幣。」 不要信專家
余先生，沙田南洋商業銀行散戶。 「我湊完個孫返學便嚟呢度，呢度很多女人盲舂舂，聽專家講就嚟入貨。 「我以前都好似佢哋咁，聽晒股壇專家話，在九七年有過百萬退休金，於是用來入貨，輸咗一半；上海實業買咗六七萬股，四十多元買入，而家得番十二個幾；北京控股又係四十幾蚊買入，而家得番七個幾。 「有次在電台聽到陸叔六十幾蚊叫人入中移動，佢話有買貴無買錯，我忍唔住要打電話去電台鬧佢。」 行完天橋股價全變樣
楊崢，香港著名模特兒。 「我經常不在香港，股市跌都無辦法。好像在九七年我買太古A 、中信泰富及中國海外，但做完嘢返香港隻隻跌哂，而家跌剩三分一，搞到我唔敢入市。 「力不到不為財，無時間還是找理財專家幫忙。」 表象迷惑我
雷賢達，寶源投資董事。 「七十年代在外國讀書時，見到飛機航班多了不少，航空公司生意應該不俗，於是買了一隻美國航空股，豈料甫買入，股價即跌了五成。原來航空公司就算業務不前，航班只得小貓三、四隻客，都會照開，不可能即時縮減航班，外界哪知道。」 沽上實賺二百五十萬
蔣有衡，上海人，現任嘉洛證券董事。 「九六年我在香港工作，我家鄉的紅籌公司上海實業來港上市，公司做貿易業務。香港很多物資都要靠中國入口，而上海又是鄧小平重點發展城市，便在七元半買入十萬股，在二十元沽，之後又在廿二元買入，四十多元沽，前後賺過二百五十多萬。 「我最後一次沽貨，主要是因為市盈率高過一百倍，而我曾經問過鄉間親友，他們都說上實的百貨店，生意只是普普通通，我想沒有理由股價會好得這麼厲害，於是立即沽貨，果然紅籌國企泡沫爆破，我算是幸運吧。」 入貨前問行家
岑偉納，新世界證券研究部主管。 「買股最緊要業務夠生活化，例如我的愛股微軟，幾乎個個識電腦的都用Window ，有次我去微軟對手Linux 的講座，都是用Powerpoint 來講解，連對手都用其出品，微軟仲唔掂？ 「我持有價值五十多萬元的微軟股票，雖然未有什麼錢賺，但我很有信心。正如以前我有個在塑膠廠做的朋友，加班幾個月做忍者龜，負責製造的彩星玩具，半年股價就由幾亳子升到七個幾。買股之前，問問做那行的朋友，你就知道是否買得過。」 要入職請賣樓
許沂光，五十一歲，許沂光投資控股董事總經理，專攻圖表分析。 「九六年我睇chart （圖表），見樓價蛇形咁升，覺得死梗，出席講座時，猛勸人唔好買樓，但樓價仲升，搞到俾人鬧。不過，我請伙記一定要他們先賣樓，因為明知樓市遲早跌，好易變負資產，供唔起層樓。 「我最記得九六年中有個應徵者想入來做投資顧問，面試時他指在將軍澳有層樓，五百萬買入，月供三萬五，我給他的月薪最多只是四萬，還有一個條件是『要賣樓才請』，他照做，結果避過九七金融風暴，事後好感激我。」 華置最無義氣
吳亮，八十一歲，永安祥證券行董事。 「七三年香港地產市道開始蓬勃，聽到鄧肇堅話發展地產，咪慕名買佢隻九龍建業，當時以十元五角買入二千股，年年收七八釐息，又有股送，在前幾年更一拆一百，埋單賺咗一百八十萬元。 「最衰就是華人置業，八元三角買入，股價跌到六毫九，還經常叫人供股，買中環娛樂行賺了三十六億，都唔益小股民，最無義氣。」 Benjamin Graham 打救我
Burch Kealey ，四十歲，城市大學會計系副教授，來港近五年。 「我廿五歲開始投資，但最初八年的回報可能比銀行利率還差。直至七年前修讀博士，認真的看Benjamin Graham （價值投資之父）的書，方醒覺從前一味聽信報章股評，追捧熱門股，是多麼的蠢。」 九七租樓住工人都變臉
黃錦康，美聯物業策略規劃董事。 「我九二年買入加州花園一個千八呎單位，但見九七年負利率變成正利率，銀行都有五至七釐利息，樓宇供應又出現過剩，於是急急腳放盤，五千元呎出貨，賺到五百四十多萬。 「當時話俾朋友聽我放樓，個個以為我唔掂，我租樓住，個工人知道是租的而不是買的，臉色都變埋，這些就叫做群眾壓力了，要嬴錢真係要對抗這種羊群心理。」 殼股無得炒
劉昇昂，信誠證券董事總經理。 「九七年的紅籌熱，不少紅籌國企來港集資，部分更在香港買殼。我看中業務一直無甚起色的新福港輪，當時輪價大約一元三角，而新福港又被中旅國際看中，股價由四元四角炒上九元五角，帶動輪價上升，最後在四元五角沽出。賺了多少錢？費事咁揚啦！總之賺到而家間中環鋪。 「不過而家啲殼多籮籮，要上市只要招股書加減無錯，又無打錯字，就可以在創業板上市，唔使買殼上市，殼股無得炒啦。」 聽朋友話渣都無
May ，小學程度的散戶，九七年中退休後跟朋友學技術分析。 「我最衰得慘就係佳寧嗰鑊，當時個個朋友都叫我搏吓，於是將死慳死抵儲起的錢，八個半掃一萬股。 「點知後來公司又話欠人數，又話被人告。我最後因為返咗工，唔知消息無沽到變晒廢紙。有個專家講得啱，賺錢係指沽咗袋咗入袋才叫做賺，否則都係一場數字遊戲。」 無睇新聞真蝕底
譚紹興，太平洋興業研究部董事。 「九○年在加拿大讀緊書時，用亳幾子買入一隻地產股二十萬股，點知間公司後來財政唔掂，又話倒閉又話有債權人追數，股價跌了很多，我諗都無乜希望，就將佢擺埋一邊大覺瞓。點知聽電視報價話升到二亳半，以為自己發夢，咪再打去證券行問，我見係真嘅就好開心咁放咗。 「好衰唔衰當時無睇新聞，原來當日個價升，是因為傳出有注資，結果隔日還升上一元水平。所以買股票，一定要跟得貼，之後我就即刻裝有線電視。」 點跌都唔放
戴太，六十五歲，家庭主婦。 「第一次買的股票是鷹君，八九年六四時，以一元八角掃了一萬股，我當時諗大陸每日放少少人落嚟，香港都迫爆啦，果然在九三年升上六、七元，於是沽貨，賺好多。 「之後我買入孫福記，兩元買入一萬股，但見個價位有跌無升，於是在幾亳子時斬倉，點知隻股第日傳被收購，股價升番。如今我買股票唔捨得放，去年很難才抽到新意網一手，今日跌極我都唔放。」 為感情買金
胡經昌，立法會議員，已故金王胡漢輝之子。 「我鍾意買金，因為有感情價值，你諗吓我買一個金牌，擺十多年留俾自己個仔或孫，老實講金都不會值錢得去邊，但至少包含了我咁多年嘅心意，好過送股票，至少是實物。 「我每年平均入六、七兩，雖然不至於像部分二、三線股跌到一文不值，但都蝕了四分一左右。」 愈搏愈輸 愈輸愈搏
肥仔榮，曾在證券行工作，現轉行在電腦公司任工程師。 「我爛賭，乜都賭一餐，九九年底剛剛未有工作，去證券行搵朋友，見佢玩緊黑期篤篤吓幾過癮，自己又跟住篤，買咗六張，初時賺到四、五萬元；不過我見個勢好加碼，到頭來輸了四、五萬元，搞到要問朋友借錢贖身。 「原本無輸咁多，但由嬴變輸時，自己諗住橫掂唔夠錢找數，不如搏一搏，結果越輸越多。好彩間行跌過六百點就幫我斬倉，如果唔係輸得仲甘。」 以後唔掂報價機
吳太，黃埔區散戶，去年移民返港。 「我去年移民返港，見個市咁旺，咪自己買啲藍籌玩吓，當時都係諗住買滙豐和黃咁，點知去到股票行，又堆個頭去睇報價機，隻腳就開始不受控咁，衝入去掃貨，一買買咗六隻添。」 「輸得最傷都算係中移動，成六十八元入，之後跌到六十元溝貨，五十幾元又再溝，而家得番三十幾，我仲有成百萬元蟹貨，你話死唔死。 「以後買股票，一定唔會去掂部報價機，費事俾佢迷住。」 最衰炒多轉
林偉邦，CMG 商業發展部經理 「九九年底個個驚千年蟲，很多人都唔敢掂科技股，但有日荷銀基金經理同我講一定無問題，電腦供應商又話訂單多到接唔晒，仲缺貨，咁我諗買科技股都沒錯，於是買科技基金。 「原本基金單位價格五個月後，已由百一升到百九元，我跌番落百六嗰陣沽咗，賺咗啲錢。但我以為個浪仲會再上，又在百五入貨，點知科網爆破，訂貨的互聯網公司都執笠，影響電腦供應商生意，隻基金就咁跌番落嚟，最後百二元沽貨，原本賺嘅都蝕咗一半。」 搞網損失百萬
陳思恩，37 歲，財經網站寬網（Quamnet ）的創辦人之一，持有寬網股權不足一成（如今寬網成功借殼華富上市）。 「去年四月我籌辦資訊網CDL ，無耐新世界話入股八成半，總投資三百萬元，諗住可以大搞，仲構思賣新聞資訊俾新巴，好似今日九巴分拆上市的多媒體公司Roadshow 咁；還獲得結好證券行等客戶幫襯，非常開心。點知網站在八月正式推出時，科網股熱潮已退，兩個月後新世界話想唔玩，我到處搵創業基金注資，但對方一聽到個網字都驚，在資金緊絀下，唯有在十一月被迫把公司結業，自己投資的一百萬輸晒。」 減壓變減身家
曾智華，47 歲，香港電台中文台節目發展總監。 「我在電台工作，長期處於緊張狀態，搞到血壓高，但行出嚟見人唔可以頭耷眼濕，為咗減壓，一得閒我就抽時間炒股票，以鬆弛神經。八七股災前我好似盲俠咁， 專啄細價股，以為容易賺到錢，又愛聽消息，仲好信名人搞生意的眼光，好似見黃創山搞精工隊波咁成功，於是用三元掃華基泰，股災後跌至兩、三毫子斬纜。 「八七停市四日，我差不多日日廿四小時在電台趕新聞，無理自己的投資；其後埋單計數，才知手揸廿隻股票，共蝕廿多萬，當時我每月的積蓄只是一萬元。交了寶貴學費後，如今我一股不持，只把投資放在債券與現金，最緊要穩陣。我仲有八年就退休，投資絕不容有失。」 靠滙豐賺三層樓
曾淵滄，城大管理科學系副教授，也替報章寫專欄。 「九○年滙豐突然高調宣佈該年虧損，令股價由七、八元跌到四元五角，我覺得很奇怪，因為滙豐一向會動用內部儲備掩飾業績失利。 「那時有消息指波斯灣戰爭影響滙豐業務，又話中銀取代滙豐地位，於是我推測，滙豐管理層故意質低股價，以便日後向米特蘭提出以股換股作全面收購時，米特蘭這些英國自己友可換多些滙豐股份。 「我於是在四元多、五元多大手入貨，不久滙豐和米特蘭合併，股價即勁升，在九三年升上百元時沽貨，賺了差不多當時三層樓的錢。」 炒郵票三日搵十萬
莊劍然，二十六歲，集郵二十年，原在酒店打工，九七年趁集郵熱入行炒賣郵票，現為莊氏錢幣郵票公司老闆。 「九七年三、四月我從電視上看到內地炒賣香港郵票的熱潮，受到啟發，便照辦煮碗。 「我看好當時剛推出的回歸郵票（香港特區成立紀念）、小全張和第十輯經典郵票，故在好旺角商場大量入貨。那幾天，清晨六時便起床趕火車到深圳，然後轉車到 廣州，再乘的士到達人民公園，已經十時了。甫踏進公園，就看見很多售賣古物的小攤檔；從袋裡抽出郵票，會有很多人圍觀、主動出價要買。四萬套郵票，不消一 小時就售光。 「如是者三天，我便賺了十萬；也算是第一桶金。」 中巴失專營權帶挈我
郭炳華，八年前開巴士模型鋪80M 。 「炒巴士模型最瘋魔都係九七年，當時中巴喪失巴士專營權，很多市民便一窩蜂搵中巴紀念品。 「炒得最好是第一部中巴，九五年出廠賣二百多元，現時已賣到千二元。另外九鐵接駁巴士、中華巴士都城嘉慕及九巴都城嘉慕款都抄得唔錯。 「其實它們質素麻麻，又無錢箱，又無倒後鏡及bumper ，炒得上只因當時出產商幾個月才出一部車，讓發燒友有時間儲錢買。但後來生產商一個月出四、五款，發燒友哪能一次儲這麼多錢買，搞到我很多貨都銷不去。」 俾次機會小小超
莫小姐，在凍肉公司任職。 「我九九年開始炒股，睇中得信佳，在五元七角及六元七角買入六萬股，電訊及盈動合併後，股價從廿八元回落至十八元沽貨，雖然並非在最高位放，但賺到七十幾萬，開心到瞓唔着。 「當時揀這隻股係因為信得過小小超，佢話哂都係李嘉誠個仔，班手下唔識科技都識財技。 「電盈合併後股價猛跌，累到很多人坐艇，我後來在五個幾入咗二萬股，一樣要坐艇。不過我無鬧小小超衰人，我覺得應該俾多次機會佢，唔好一沉百踩。」 我有三百隻Swatch
盧耀輝，Swatch 炒家，持有三百隻錶約值卅萬。 「九四年朋友送第一隻Swatch 給我之後，就愛上它，靚之餘又可保值，依家有成三百幾隻，以上年Swatch 出的天書（即市價表）計算，我批錶市值已由成本十萬升值到三十萬。 「以九一年出的Asetra 為例，四十美元買，沒多久就以三千七百港元賣出，賺逾十倍，我打算年尾飛往瑞士，參與歐洲一年一度的Swatch 拍賣會，價錢適合，可能整批錶賣出。」 民國舊勞賺到笑
高向勳，復興古董錶店老闆，收藏古董錶廿五年，特別鍾情勞力士。 「其實初初自己並不太喜歡勞力士，嫌它太俗氣；但十六年前偶然以九百元買下一隻『棺材仔』（泡泡背手錶的俗稱），戴着跟朋友飲茶，朋友一看即出價二千元求讓。那時我便想，這門生意有得做，於是開鋪。 「那時中國還未開放，有很多民國時候剩下的又殘又舊的勞力士賣，全是瑞士機械的。外國人不會相信那些貨來自中國，我卻頻頻北上上海、天津、廣州等大城市入貨，百多元一隻，每次買二、三百隻回來修理，再以十數倍價錢賣出，利潤好厲害！」 英國股票多優惠
何富國（Stewart Aldcroft ），英國人，天達資產管理董事總經理。 「八四年在英國，選中了一隻餐廳股名為Garfunkels ，它以快餐形式推出意大利菜，較為少有，最重要是我喜歡這間餐廳的食物，做這間公司的股東有八折優惠。 「航運公司Peninsula and Oriental 更筍，我在八零年買入三百股，每股一英鎊，便享有終生橫渡英倫海峽的船票折扣優惠，一張票正價（一架車包四個人）要一百鎊，但公司給我們七折至八五折，我持有三年，每年去兩、三次法國，都值回票價啦。」 史諾比坐艇記
Tina Wong ，古粧店老闆，賣收藏品超過十年。 「我儲咁耐嘢，未見過麥當勞換史諾比嗰次咁墟冚，原本我喺泰國訂咗廿套來賣，唔使一小時就賣清，後來入多三十套，又係一日賣晒。嗰陣炒得好利害，旺角有人 連盒連公仔炒到一萬元。後來泰國攞貨來價由二百幾升到五百幾元，我見這個炒風千載難逢，焗住咁貴都入一百套，點知就出事。 「因為麥當勞見咁多人排隊，便改變策略，叫人換唔到可以申請換領，供應多咗，變相打擊我哋這盤生意，最後史諾比銷得唔好，好多而家仲擺咗喺度。」 炒鴕鳥蝕大本
呂先生，九六年移民澳洲，現已返港居住。 「做移民成日投資都係開餐廳，但我想融入當地社會，就試下同人夾錢投資鴕鳥農場，我出咗三萬港元。當時市場幾旺，因為爆發瘋牛症，個個唔敢食牛肉，同時鴕鳥肉又話營養價值高，個個咪炒鴕鳥，一隻可以賣到二千澳元㗎。 「不過我養大鴕鳥後，個市場供應多咗好多，一隻僅賣二百澳元，連飼料錢都蝕埋，結果做咗兩年，最後都改養番牛算勒。」 宏觀調控害了我
高廣垣，惠澤按揭行政總裁，九十年代初在新協城市建設任董事總經理，偶然要往返大陸處理土地發展及建樓業務。 「我在九三年花了二百萬元人民幣，在北京買了寫字樓，位於商業中心區，租金回報有二、三十釐，但自己不是經常上北京，又以為寫字樓有升無跌，沒有招租，豈料大陸突然宣佈宏觀調控，市道一落千丈，足足空置了八年，如今仍蝕了四分一。」 大學生兼職炒手機
Rockman ，城市大學電腦系高級文憑二年級學生，兼職炒手提電話 「炒手機其實都要講門路，又要識散貨，炒風得一兩個月，真係手快有手慢無。 「好似前排炒諾基亞8250 ，走貨一隻賺兩、三百元，如果炒返上大陸，隻手機又有中文顯示，仲可以賺多數百元，一部機賺六百元都唔錯。 「舊機都炒得㗎，在拍賣網上執平貨然後走上大陸賣，每個賺八十至一百五十元左右，當然有中文字又可以賣貴的。」 升極無我份
李太，在中環娛樂行附近擺檔賣香煙超過三十年。 「十幾年前買過幾千股滙豐，六個幾之嘛，買咗無郁，跟住滙豐供股，咪放咗佢，點知佢有日會升至百多二百元。七七年買入一萬股怡和，十幾元唔上唔落，又沽咗佢，點知一年後又傳李嘉誠收購，股價升又無我份。如果唔放，而家印印腳啦。」 股災令我反思
梁柱國，八○年從北京來港，八七年股災後開始整理投資筆記，目前珍藏十三本。 「我以前買股票都係亂咁聽人講就買，但八七股災後令我反思，唔明點解個市變化咁突然，於是每次去講座就做筆記，每次投資時就翻筆記，睇公司年報，有時更去圖書館睇年鑑。 「在九九年，我去圖書館翻查中國機械工業年鑑，書中提到東方電機，指該公司可以提供水力及火力發電等，我見其在深圳A 股的股價與香港H 股差一大截，一個九個半人民幣，一個六亳幾港元，於是買入五萬股H 股。結果升得唔錯，前排在近個三沽貨，賺了三萬多元。」 |
||||||