|
||||||
|
打機以往總是令人感覺玩物喪志，但其實不少國家已將打機列為esports（電子競技）；外國知名的職業打機好手，年薪更以百萬元計。 四十四歲的陳永基，是全港首支專業打機隊伍的班主，真金白銀贊助o靚仔打機橫掃本地賽事，成功替其網吧i-one提升知名度外，更惹來不少特許經營者加盟，成為全港最大規模網吧，年賺逾三千萬元。 「兩個二樓，一個大堂……大房一個，右邊殺入去，左邊Cover，Action！」話口未完，立即傳出兩聲巨響槍聲，「砰！砰！」 千萬不要誤會！這裡絕非真實戰場，只是陳永基的「戰略培訓室」，槍聲和對答，均來自選手們玩網上射擊遊戲的定期操練。 這 間「戰略培訓室」，雖然只有百多呎地方，但設備卻相當揼本，每名隊員均配備頂級電腦，兼有私家鍵盤滑鼠，而座椅更是直接從外國訂做，務求令各人長期打機也 不覺疲倦。身為班主的陳永基笑說，這隊人是靠金錢堆砌而成，「成隊人用嘅滑鼠墊，每塊至少要五百元，計勻全身裝置及電腦，每人差不多過萬元。」 原來，這支由他成立的打機隊伍eP（意思為extreme players），至今仍是全港唯一有全資贊助的打機隊伍，專門參加本地各大打機比賽，雖然隊員沒有薪金，但曾贏得的六位數字獎金及獎品，全數由隊員平分，陳永基分毫不落袋。 由於隊員全屬後生仔，無可避免有時懶於訓練，故他搵了經理人睇實，平時每星期操練一日，每逢比賽前更一星期練足七天，每日約四小時，因此經常贏盡香港比賽；他更親自帶隊到韓國，代表香港參加世界電子競技大賽，贏得全場亞軍。 他一直講eP以前如何巴閉，直到記者問到最近成績，才尷尬說冇眼睇，表示今年公開比賽連場敗北，「今年有舊隊員退役，新人未曾磨合，成績唔好。」由於打機講求反應，不少選手二十多歲便要退役，故此eP自○一年成立以來，隊員已換了好幾代。 陳永基檔案 44歲已婚育有一子一女 80年代：台灣淡江大學市場學畢業 89年：東方紅市務經理 94年：父親賣掉東方紅，舉家移民加拿大 99年：回流香港開設i-one 01年：成立eP打機團 05年：i-one搞特許經營 打出名堂 陳永基出錢出力贊助打機，無非與他是網吧老闆有關；其創辦的i-one，是全港最大規模的網吧，有三十四間分店，每年賺逾三千萬元。他笑稱大多數的eP選手，皆從其網吧裡發掘出來，年紀最輕的只有十六歲，「而家隊中有名成員，係我創業時第一批客仔。」 熟 客仔阿松亦說渴望加入打機團，所以才經常幫襯i-one，「我知道eP經常在i-one挑戰其他玩家，從中吸納新血，所以我周不時落場，如果俾佢哋發現我 打得叻，分分鐘召我入隊。」陳永基亦坦言公司能夠急速擴展，確實與打機團響朵有關，「呢隊人每年花我十幾萬元，不過贊助打機係大勢，外國贊助商投放嘅宣傳 費每年過百萬美元。」 贊助打機團除惹來大批玩家幫襯外，還吸引有意經營網吧的門外漢加盟，陳永基在○五年開始批出特許經營權，令他毋須大額 投資，便能擴充版圖。現在眾多分店之中，除銅鑼灣四間分店由他全資擁有外，其餘皆屬加盟店，有部分鋪他甚至連一成股份也沒有，他笑笑口說，「我哋係一條龍 搞開業服務，由搵鋪裝修到買機都幫晒你，最啱新手創業。」 有不願公開名字的加盟者表示，加盟i-one是貪其名氣，「遊戲界有咩新搞作，i-one都仆到去參加，連專業打機隊都有，見到佢樣樣搞作都咁大手筆，就知跟佢搵食實有得賺。」結果他亦如願以償，去年更添食，開了第二間加盟店。 東方紅太子爺 陳 永基直言自己愛玩，以前在台灣留學愛鬥電單車，更因交通意外縫了十多針；而他做生意亦要好玩，故此無心打理家族生意。他父親陳學良是參茸海味店東方紅的創 辦人，八八年東方紅上市後不久，陳永基在台灣畢業返港，父親立即安排他到內地做東方紅開荒牛；並準備將生意交由兒子接棒，可惜陳永基無心戀戰，做了數年便 辭職不幹，陳學良遂於九四年將全部股份賣予羅兆輝，舉家移民加拿大。 陳永基隨父親移民到加拿大後，又嫌當地生活節奏慢，每天靠玩實彈射擊過日辰，「初初以為燒槍貴過燒銀紙，打過先知子彈只係四、五元一發，打一轉五十發，都係使幾百元，我高峰期試過日日打足幾百發。」 如此玩了三年，靜極思動的他回港找老友敍舊，其間玩了紅極一時的射擊網上遊戲《Rainbow 6》，立即令他欲罷不能，「現場感十足，好似真嘅槍戰一樣。」 當時正值九七前後，香港仍用56K撥號上網，他忽發奇想，如在香港搞一門租借電腦讓人打機的生意，絕對有睇頭，遂想長期回港創業，但其父卻堅決反對，「當時我提出要返香港搞生意，爸爸已經唔鍾意，聽到搞網吧，佢根本唔明係乜，就更加反對。」 他後來懶理父親，傾盡自己的積蓄六十萬元，在銅鑼灣租了一個千呎單位開樓上網吧，「我到呢一刻都可以驕傲咁講，我創業完全冇用過爸爸一毫子。」記者指他在加拿大生活時不是靠父親嗎？他聽後馬上解釋：「當時我炒股票都有收入，最多話我食同住係爸爸俾。」 外傭救命 陳永基憶述當年全港只有兩家大型網吧，一間在銅鑼灣，一間在旺角，i-one是全港第三間佔地千呎的網吧，「第一日有個學生入嚟，佢根本唔知網吧係乜，但玩咗一陣發現網吧電腦快過屋企好多，第二日就帶了很多同學嚟打機。」 由於他起步早，首年已收支平衡，不少人見網吧大有可為，遂一窩蜂加入市場，導致○一年全港有多達五百多家網吧，不少行家惟有劈價搶客，陳永基憶起亦覺好笑：「當時劈價到四元一個鐘，仲要任食菠蘿包。」 話雖如此，起初他亦曾跟風劈價，但人客仍不斷流失，他漸覺長此下去是死路一條，遂把心一橫，將以前賺到的，全押注租下銅鑼灣另一更大單位，全場更添置每個五百多元的Web Cam，並企硬不肯減價。 不過，此舉亦難留貪平的打機客，但意想不到卻惹來留港打工的外地傭工幫襯，利用Web Cam以視像會議與家人見面，「你唔好以為外傭冇消費能力，佢哋為見屋企人，假期响網吧傾足成日，我收十幾元一個鐘，平過打IDD多多聲，仲可以面對面傾。」 多 得這批外傭，令他捱過一關，但陳永基卻表示鬥劈價的行家，為了慳錢，不肯買新機提升速度，最終亦遭玩家嫌棄，「愈劈價嘅網吧，環境就愈差，無耐就會執笠， 好彩我反其道而行，企硬唔減價，寧願鬥長命，慢慢就愈來愈多人返嚟我度。」當年網吧下跌至三百多間，但陳永基卻在○三年逆市開多兩間分店。 經此一役，i-one在行內嶄露頭角，加上贊助打機令更多玩家慕名而來，曾經營網吧的阿偉說，i-one大灑金錢的做法，令行內人很難和他競爭，「i-one幾年就完全換過晒啲機，連打機滑鼠都要最靚，邊夠佢玩？」 對於i-one，陳永基雖說仍未「玩厭」，但也坦言毋須再花太多心力，每日返工只是行行企企。他最新玩意是下廚，今年四月更開了新公司準備進軍飲食業，「你睇我身形，就知我鍾意飲飲食食啦！」 |
||||||