|
||||||
|
消費者委員會與 一啲議員，大概抱有父母官心態，以保護消費者權益自居。其實香港人精過鬼，買棵菜都會格價，爭取最佳服務。惡佬明平時到街市買魚，魚販會係咁意同佢打鱗， 點知最近打鱗打得好落力，好乾淨，服務有進步噃。返到屋企同老婆講起，老婆話：「最近街市不遠嘅超市賣埋鮮魚，打鱗打得好徹底吖嘛，你唔見我呢排多數去超 市買魚咩？」 一啲師奶消息都唔知幾靈通，邊度駛倚賴消委會打價、教路吖，買魚買菜都咁精，一啲市民用兩百萬買個上車盤，一千萬買個豪宅區域 嘅細單位，會唔會俾人誤導呀？或者會嘅，成數好低囉。用一千萬買個威水地區細單位（七百幾呎），絕非受瞞騙，而是有意如此，係要住高尚地段呀。如果唔係， 做乜有人要用近千萬買西九凱旋門嘅五百呎與河內道名鑄嘅細單位？以同樣價錢，兩三年前在沙田設施、環境最好嘅駿景園，可以買千六呎向馬場大單位啦，難道買 樓人士唔知道咩？一上網稍作搜尋就知道全港物業價格，銀行網站立即提供估價資料o忝。 花千萬元買干德道細單位，左丁山絕對唔會，但香港有好 多人鍾意城市生活，鍾意干德道近有行人電梯直達中環街市，夠晒方便，晚上到蘇豪區玩樂，話都冇咁易，在IFC返工又好盞啫，行路返工放工都得。所有價格都 反映晒市場心理、居民偏好，消委會唔會搵到有人揸住支槍逼人買樓嘅啫，業主就係業主，聰明到極，絕唔會係苦主──尤其是係有能力交幾百萬元首期去買干德道 單位嘅業主。
一位編輯本想做大The Icon嘅新聞，佢對左丁山講：「我睇過你寫I Con，拆字拆得幾幽默，於是派人查田土廳業主登記，睇吓冇乜人被Con。做齊之後，發覺The Icon有六十八個單位，賣咗六十個。賣出六十個ABCD單位之中，買家有45間係公司業主，只有15個係以個人名義登記，首先向陳淑莊議員投訴嘅19D 單位，亦係以公司名義買入嘅。你知啦，買樓用公司名義，肯定係有經驗之買樓人士，作投資用途者多，未必全部自住。諗諗吓，佢地識得用公司買樓，好可能叻過 施永青啲中學未畢業嘅夥計o忝，受誤導嘅機會比較細，既然係咁，單新聞冇乜業主變成被騙苦主嘅角度，唔得juicy，人有我有就算咯！」 |
||||||