|
||||||
|
古語有云：「大炮一響，黃金萬兩。」現今國際政治動盪，除了中東局勢持續緊張，近期南北韓又開火，加上通貨膨脹厲害，導致金價屢創新高。 黃金捍衞者之中，富邦銀行第一副總裁兼投資策略及研究部主管潘國光，肯定屬經典。他擔憂打仗，幾乎全副身家押注黃金，深信銀紙會大幅貶值，只有黃金才可對抗超級通脹，就算爆發第三次世界大戰，黃金還可當銀紙使用。 我信會打仗，甚至第三次世界大戰亦有機會發生！ 你睇睇世界各地好唔穩定，去年泰國騷亂，南北韓又開火，美國仲有兩場仗未打完，阿富汗同伊拉克都未完全抽身。你知嗎？國家打仗，好多時都因為國內經濟失控，民生受影響而發生騷動，政府惟有搵個理由去打場仗，分散人民的注意力。 別人笑我太瘋癲 每逢打仗，金價必升，這是金科玉律，以往好多人都帶住金條走難。黃金是戰爭中的法定貨幣，因此我八成資產買了黃金，大部分買實金，方便隨時到保險箱提走，其中最多係金條同金幣。 我買的金幣，是最普通的袋鼠和富格林金幣，唔揀炒味重的主題金幣，因為真的打仗，限量主題金幣亦唔會特別值錢。到時金條就是儲蓄，金幣就是我的散紙，拎住啲金幣去買漢堡包，都唔怕人哋唔賣俾你！ 我知好多行家都覺得我很傻，認為我的睇法天方夜譚，邊有咁誇張。但你唔好理，就正如最初全世界都冇人相信有黑天鵝存在一樣，到發現時先知道相當震撼。何況 我買金的看法至今沒錯，○八年開始買金，當時金價每盎司七百幾美元，翌年已經向外界呼籲叫人買金，唱好金價升穿一千二百美元，結果好快就到位，依家更加翻 了一番，我估未來會破一千六百美元。而且就算百年一遇的金融海嘯，我都無任何損傷，所以好多最初唔認同我嘅人，後來都問我去邊度買金磚。 超級通脹來臨 其實金價呢幾年狂升，還有另外一個因素，歐美各國不斷印銀紙，銀紙購買力下跌，導致柴米油鹽樣樣加價，但我認為依家情況未算最惡劣，有朝一日超級通脹出 現，才是真正災難！你有數得計，二○一五年之前，美國發債的利息支出，會等同稅收，換句話說赤字相當嚴重，呢個氹愈踩愈深，返唔到轉頭。美國肯定無力還 債，技術上已經破咗產，最終全世界唔信美元，爆發貨幣信心危機，而港幣與美元掛鈎 ，肯定首當其衝。 他日超級通脹來臨，貨幣價格會跌九成，通脹可達百分之幾百，大家可能要抬一擔銀紙去買嘢，我就可以攞個金幣就搞掂。由於銀紙持續貶值，所以我盡量唔留現金，只會保留三個月開支以備不時之需，其餘嘅錢定期買金條，你不要小看這條金條這麼小，其實有五兩重，值六萬多元！ 我這種緊張神經，早在入行時已經開始。九○年入行，在花旗銀行的盤房工作，負責做外匯交易員，梁錦松當年是花旗的司庫兼香港區行長，有份面試請我，佢揸盤出名快狠準。 响炒房工作，就好似在壓力煲中度過，每日返工好似癲咗，記得坐我隔籬年資較長嘅同事，有一日做做吓嘢，突然㩒住自己個心臟，可能刺激過度，要幫自己做心肺按摩。 未老先衰 其實我都好不了多少，每日早上七點半開工，如果當日未做夠數，可能要坐到深夜；就算返到屋企都無覺好瞓，有時會緊張得發噩夢。試過有次發夢唔記得落止蝕盤，一路輸到爆晒煲，好得人驚，我覺得每個交易員，都發過呢個噩夢。 嗰兩年的確賺到錢，但壓力太大，頭髮亦甩咗一半。當年我廿五歲，人哋覺得我似三十五歲，最後生理上真係頂唔順，儲夠錢到英國讀MBA，便辭職進修。 讀完書返港，真係唔敢再沾手炒房，情願搵少啲做分析員。人係好極端，當你之前成日經歷大起大落，你會好想靜落嚟，坐喺度慢慢做研究，每個星期打網球，否則好容易死。 潘國光檔案 四十多歲 07年至今︰現於富邦出任第一副總裁兼投資策略及研究部主管 00-07年︰於花旗任職副總裁及投資策略及研究部主管 93-00年︰於恒生先後任職高級財資經濟師、財資策劃經理及外匯基金經理 92年︰赴英國蘭卡斯特大學修讀工商管理碩士學位 90年︰於花旗任職外匯交易員 何謂超級通脹 超級通脹是指物價突然急速增長，達至失控地步。經濟學者Philip Cagan於一九五六年，撰寫了公認為最早期研究超級通脹的書，將超級通脹定義為物價每月升最少五成。 史上最大型的超級通脹，是德國在第一次世界大戰後，物價曾在每四十九小時增加一倍；最近一次超級通脹則是○八年的津巴布韋，搭一程巴士便要三萬億元。 中大高級講師李兆波指超級通脹出現時，市民寧願持實物，拋棄銀紙，「舉例一個國家的通脹率，按年升兩成四，三年已經升一倍，已經係一個警號！」 |
||||||