最近有個球迷間嘅笑話，都成為中環人嘅話題，就係意甲勁旅AC米蘭嘅中資買家，竟然用假POF，雖然中資買家口硬話自己有能力買球隊。只不過，正常嚟講，呢單deal都係凍過北極啲冰。
其實假POF呢樣嘢，歐洲佬或者見得少，但香港中環融資界就見得多。所以依家買證監會牌又好，做配股又好，買殻又好，甚至買成棟大廈都好，基本要求就係你要有香港銀行POF。一方面，費時因為匯唔到錢嚟香港，搞到單deal炒咗粉，另一方面，大陸啲假POF多不勝數，而且大家都知強國啲造假術水平去到煉金術士嘅地步，單憑肉眼都難分文件真假，為免中伏起見，用香港銀行POF係穩陣啲。
一般嚟講，如果啲土豪堅有錢喺香港，出到份香港銀行POF，就要出埋授權，賣家就攞份POF去自己用開間往來銀行，透過銀行對銀行嘅溝通過程驗份嘢真假，所以唔會搞到好似AC米蘭咁膠，單deal公布埋至發現買家出份流嘢POF。而且香港銀行POF仲有一個好處，就係慳咗驗黑錢嘅功夫，香港啲銀行係見到筆錢乾淨至發POF，如果筆錢有問題，香港啲銀行都唔敢隨便攞自己嘅聲譽嚟賭，所以香港銀行POF係依家做中港交易嘅行規嚟。
如果歐洲佬下次做好似買賣球會呢啲deal，不妨要求全部要出香港銀行POF，搵香港啲律師、會計師做交易，依家英國未脫歐，話曬香港仲有好多持歐盟國籍人士喺個行頭度。香港人睇慣中國啲古惑嘢，唔會學意大利佬中伏。或者咁講，香港人乜伏都中過，無人比香港人經驗豐富。
中環客