iPhone 7廢除傳統耳筒插口嘅設計，引發好多討論，有人話蘋果為咗防水，無得唔廢除傳統耳筒插口。又有人話蘋果為咗AirPods嘅銷量，而廢咗傳統耳筒插口。呢啲講法都言之成利，但依家蘋果唔係超級完美主義者Steve Jobs主政，Tim Cook如果計唔掂盤數，照計無理由推出啲咁激進嘅做法得罪消費者。話雖Note 7係咁爆炸嘅情況下，iPhone 7應該無乜對手。
但中環客聽到一個陰謀論，驟耳聽起嚟，應該呢個至係蘋果廢咗傳統耳筒嘅理由，呢個就係廢咗Paypal等公司利用手機收錢應用程式嘅武功，最終迫人用商戶版嘅Apple Pay服務嚟賺錢。
喺香港，大家唔覺用手機嚟收信用卡過數係重要，因為一般商戶都會租條電話線（係香港至落後，用傳統果啲電話線），再加部大大部銀行俾嘅POS機收信用卡數。但喺美國，甚至歐洲，己經有唔少商戶，甚至的士佬，將小型磁帶讀卡機插入iPhone耳筒度，然後利用小型讀卡機經PayPal或其他類似服務攞信用卡數，由於外國啲提款卡多數都係Visa或Mastercard嘅扣帳卡，勁方便，所以呢個市場其實幾龐大。
由於Paypal果部手提讀智能信用卡嘅機太大部，所以外國好多小商戶都係鍾意用Paypal早期細果部讀卡機，如果蘋果iPhone 7一旦帶起呢個潮流，廢咗耳筒武功，啲商戶又唔想用果部又食電又大部嘅流動讀卡機，好大機會投向Apple Pay商戶版懷抱，屆時蘋果唔只食消費者果筆，仲要食埋商戶果筆。
呢個陰謀論成唔成立，大家可以放長雙眼睇，但以Tim Cook嘅數口，以及Apple Pay嘅野心，中環客對呢個陰謀論嘅可信性，都有相當嘅信心。
中環客