ZKIZ Archives


中環在線:歐智華唔住滙豐大班屋 李華華


2011-1-12  AD




 

畀基金界形容為「魅力非凡型領袖」嘅滙豐控股(005)新任行政總裁歐智華,果然真係與別不同,直情型到爆!

呢 位炒樓出身嘅新揸fit人,年頭(即係幾日前)已經履新,佢向來行事唔多鍾意高調,熟識佢嘅中環人都知,佢緊張集團盤數同股價多於一切,做人實實際際,所 以,華華側聞,食慣大茶飯嘅佢,已經鐵定住番自己喺麥當奴道嗰間豪宅,破格唔住喺山頂中峽道19號嘅大班屋,或者返工會近啲啩!

住屋要實際,講到返工,歐智華仲實際!話說舊年初集團CEO辦公室搬返香港之後,前任行政總裁紀勤將辦公樓層升上一層到35樓,當時除咗鄭海泉同霍嘉治兩位滙控執董,同步搬上35樓之外,其他亞太區高層留守34樓,極有君臨天下feel。

讓畀王冬勝住快將入伙

不過,慣咗同團隊並肩搏殺嘅歐智華,決定將CEO辦公樓層「歸位」去返34樓,同亞太區行政總裁王冬勝、亞太區風險總監Rhydian Cox等「平起平坐」!有咩事吹雞做嘢,行過隔籬點都快過上落一層嘅,歐智華咁實幹,華華真係替滙控啲小股東開心!

咁滙豐中人幾時先可以一睹新任CEO嘅風采?據聞上星期,佢曾經喺滙豐中環總行入面閃過,但由於佢個office仲裝修緊,所以佢真身仲未「定點」曝光。

講 番間大班屋,傳統上獅子行駐港最高負責人,就享有入住大班屋嘅光榮,74至90年期間,大班屋係雄踞山頂嘅天比高,遷冊前,主席浦偉士亦曾經住過。直至 90年,滙豐將佢賣畀八佰伴嘅和田一夫,大班屋先至改由中峽道豪宅接棒。天比高其後輾轉落入大廚坤之手,被分拆成5間獨立屋,04年再由星爺夥菱電合作重 建。

聽聞歐智華將間大班屋讓畀王冬勝住,佢短期內會正式入伙。

間大屋正就正,之不過,屋內商務應酬終年不息,冬哥放工後係要前舖後居,係咪咁盞到時真係要問問佢喇!

李華華

LiWaWa@AppleDaily.com


中環 在線 智華 唔住 大班 華華
PermaLink: https://articles.zkiz.com/?id=21349

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019