2010-1-4 AD
前輩Ｃ千金叫左丁山得閒放假就去馬尼拉行吓，參觀Fort Bonifacio，唔少跨國機構在當地租用甲級商廈，業主嘅租金回報唔錯，香港人唔肯去睇吓，就失諸偏頗。不過當地貪污盛行，有水放水，冇水冇水嘅喎， 點搞？Ｃ千金笑笑口話：「在祖國投資，咪又一樣。一位朋友亦在私募基金工作，在上海與馬尼拉同樣有投資，一間上海investee公司（即受投資之公司） 嘅財務主管未經公司討論、審批，居然就用公司錢買咗一架寶馬七系畀自己用，朋友查出之後，指財務主管違規，主管辯稱係以公款買公司車之嘛，有乜唔妥，其他 職員都可以用o架，講到面不紅，眼不眨，好似大把理由咁。同樣事情發生在馬尼拉，當事人被揭穿違規之後，立刻向朋友道歉，話兩個月內還錢畀公司。」
呢 個故事幾有味道，大家可以嗒真吓其中文化差異，Ｃ千金雖然年紀輕，但去得外地多，視野不同，比一般只識打機嘅八十後香港男成熟得多。前輩Ｃ嘅大千金以前係 投資銀行家，做咗幾年朝七朝一嘅生活後，覺得都係條命比花碌碌花紅更好，辭工不幹，唔要幾百萬年薪，回爸爸嘅公司，受爸爸每月支付每月薪水萬幾蚊，又聽爸 爸話去咗德國海德堡讀印刷，讀完就返嚟做家族印刷廠嘅未來接班人；其實私營印刷廠在努力經營之下，全年純利未必及得上一位投行執行董事嘅薪酬及花紅，前輩 Ｃ個女願意回巢，算佢有福氣。新人事新作風，立即引入新思維，大搞數碼印刷與網上書。前輩Ｃ呢日就對左丁山講：「嗱，你要出書威一威嘅話，我可以同你數碼 印刷五十至一百本，等你叫做有著作面世，另外你可以將專欄電子版交畀我，同你上網入apps，在網上及iPhone畀讀者下載，收到錢我地可以拆賬。o依 家已經有名氣作家同我地簽咗約嘅嘞！」人地上網睇，咪影響文字書本及報紙銷路？前輩Ｃ話：「你錯了，據我地研究，買書、買報紙與上網上手機下載文稿嘅人 士，係不同嘅一批人，鍾意下載嗰班客，平時唔會去書局買書，亦都唔多睇報紙嘅！」
咦，咁講法，有新市場喎，暢銷作家如陶傑、蔡瀾、李純恩，可以開拓多一條財路，至於左丁山呢類，大概只會得個做字啫。