身為廠二代的Kason及Betty，希望完成父母的心願，建立起自家的手袋品牌，在12年時，兩姐弟合力創立品牌RBRK，但起步並不順利，其後主力擺市集成為轉捩點，得到林子萱、唐詩詠、小花等藝員名人使用，亦累積到一定人氣，讓他們重新出發，除了進駐K-11外，最近在朗豪坊亦開設新分店，讓品牌慢慢得以建立。 RBRK是一個本地的手袋設計品牌，設計師Betty表示：「我哋嘅手袋主要係畀人出街及返工兩用，設計靈感來自city girl嘅形象，近年潮流偏向簡約風，所以今季嘅collection用咗純色皮革，配以利落剪裁嘅外形，加個小猄皮吊蘇作點綴。」今年33歲的Kason與Betty是姊弟，父母是經營皮革廠，為各大手袋品牌代工，Kason說：「我哋有4兄弟姐妹，我係最細，中學畢業後就返咗屋企幫手，會計、入布、跟頭跟尾，一做就7年，見到父母一直希望建立自家嘅品牌，於是想諗吓點完成佢哋嘅心願。」07年，Kason去了美國進修市場營銷及英文，而二家姐Betty去了紐約深造設計，2人於10年先後學成歸來，然後便着手籌備成立品牌事宜，最後在11年正式創立RBRK，「個名係用我哋四兄弟姐妹Rita、Betty、Rock及Kason英文名嘅第一個英文字母嚟改，屋企人有廠，有一定優勢，首先對布價會好熟悉，唔會俾人呃；另外，我哋啱啱起步，生產嘅貨量唔多，出面未必有廠肯接，可以搵屋企人落訂單。」同年，他們租下了尖沙咀DMA商場作起步，「手袋原先主打OL返工用，用嘅係真皮，款式成熟啲，價錢定係$800以上，之後發現嚟行嘅客人多數係後生女，同埋好多客會反映，想買啲出街都用到嘅手袋。之後我哋改設計，用料上用多咗人造皮，定價上變到$400起，希望可以吸引到客人。」 頭幾年蝕錢 經營RBRK兩年，生意並沒有太大起息，Kason說：「1年後，商場轉咗手，要我哋搬走，冇咩點考慮之下，我哋租咗金百利頂樓個鋪位，但估唔到人流唔多，由九龍區搬去港島區，舊客流失咗唔少，做咗2年幾時間都未收支平衡，中途諗過放棄，但始終都想堅持落去。」當13年租約完結時，Kason與Betty決定作出新嘗試，「頭幾年都係蝕錢，我哋知道要做好一個品牌唔容易，當時興擺市集，租金負擔低好多，就去試吓。有擺過PMQ、K-11、糖廠街等，估唔到生意好好，2日嘅營業額已有$20,000，等於之前1個月，對我哋嚟講係一支好大嘅強心針，證明袋款係有人鍾意，當時嘅心情真係好興奮。」 擺市集識明星 擺市集讓RBRK累積了不少人氣，Kason說：「喺唔同地方認識到好多志同道合嘅人，擴闊人脈，令我哋之後搵人合作都易好多；另外，喺擺市集時認識到Kiki(林子萱)，佢覺得我哋嘅手袋設計唔錯，變咗我哋嘅常客，仲介紹身邊藝人朋友唐詩詠等，用我哋嘅袋，令到唔少人認識我哋。」15年，Kason得到機會，在K-11再次開設實體店，「K-11不時會主動接洽啲本地品牌入佢哋商場，上年6月，佢哋問我哋有冇興趣入去，我哋之前參加過K-11嘅短期市集，見人流唔錯，但租金始終係一個考慮因素，於是我哋搵埋本地眼鏡設計品牌Genic Eyewear一齊夾份，K-11嗰邊都接納我嘅建議，最後開設咗Recognition作為我哋嘅店名。」 找尋寄賣點 除了自家店外，Kason亦有找尋不同的寄賣點，讓更多客人接觸到RBRK，「而家大約有8個銷售點，包括銅鑼灣及太古城嘅Log-on、灣仔設計廊等，寄賣點約佔生意額1至2成，多啲地方有得賣係有一定嘅幫助。」今年7月，Kason再與在另一品牌合作，進駐朗豪坊開設新店，「前排朗豪坊接洽我哋，呢個場多年輕人行，於是決定試吓喺度開鋪，今次除咗Genic Eyewear外，仲搵咗本地飾物品牌FABcessories合作，想令間店賣嘅嘢豐富啲，今次個店名叫MULTQUE，意思就係有唔同品牌嘅店，嚟緊想令個品牌更進一步，搵多啲合作嘅方案。」 RBRK新一季的系列剛在6月時推出，設計走簡約風，純色皮革搭配俐落的剪裁，加個小猄皮吊蘇作點綴，簡單又有點巧思。 開業成本： 租金(2按1上)︰$75,000裝修︰$65,000 入貨︰$15,000總投資︰$155,000 每月收支： 營業額︰$185,000租金︰$25,000人工︰$50,000（2名老闆+2名員工）入貨︰$46,000盈利︰$64,000 RBRKhttp://www.rbrk.hk 撰文：曾志恒 攝影：劉宇軒 圖片：部分圖片由被訪者提供 | ||||