|
||||||
|
左丁山反對保留 中環街市，贊成拆建中區政府合署西座，因此有啲老友以為左丁山係反環保、反保育嘅盲目發展派，其實世界上冇咁多非黑即白，非此即彼嘅二分法，好多時我哋站 在灰色地帶，要尋找現實與理想間之妥協，妥協過程會幾痛苦，好難受，但如果各方不同意見之人都唔肯妥協，堅持己見嘅話，社會就會停滯不前，代價好大。 中 環美景，具歷史文物意義嘅建築物，早已拆得清光，餘下一座立法會，算係鎮港之寶，其他仲有乜真正具備特色嘅古典建築物呀？搵唔到，即使係法國傳道會，幾十 年前亦係幾普通啫，現在先至話係好。置地公司曾辦過一個中環建築物百年圖片展，左丁山參觀咗好耐，覺得一九三○年代之中環核心地段如果冇拆到，如上海外灘 咁樣保存落嚟，一定係今日亞洲之建築物寶藏，每年可以吸引遊客無數。但係當年之建築物，在戰後一一拆建，最後一幢滙豐銀行，亦在八十年代消失，好可惜。若 然滙豐、木球會、香港會、太子大廈不拆，配合立法會，中環會是何等美景。
但係認真啲諗，假使當年英國人立例永久保留中環核 心地段建築物，香港又如何發展成為大城市、國際金融中心呢？今日香港有錢嘞，可以講得口響，價值觀念完全唔同。左丁山自細瞓慣冷巷木板碌架床，大學畢業後 第一份工就在中環，第一日上聯邦大廈（今改名為永安集團中心大廈），已覺得間大廈好宏偉，好靚，好先進，今日自然就覺得呢間大廈比較落後啦。當年冇地就填 海，見舊樓就拆，於是郵政局、華人行、告羅士打大廈等一一倒下，無人有異議，現在我哋知道填海已到極限，不能再填，剩番嘅土地來源，就係拆建舊廈，以求地 盡其利。在發展與保留之間，要有妥協，一九七五年嘅三十歲人物係戰後第一代，佢哋嘅思維與二○一○年嘅三十歲（八十後）人物完全唔同，以今日之思維嚟鬧當 年人士唔識保育，猶如今日我哋笑一九九五年嘅報紙唔識用互聯網！學劉勵超話齋（信報二○一○年2月25日）：「（七）政府勾地表裏的新供應土地，特別是在 搶手的市區，多為舊政府或公共用地（如政府合署、公務員宿舍、公共屋邨），賣一幅少一幅，若海不能填、山不應移、樹不宜伐、村不可遷、集體回憶不該毀，在 未來數年，新的市區住宅用地供應要倚重東南九龍啟德機場舊址，之後是否還可以長賣長有？」點止住宅用地呀，中環寫字樓都搵唔到新地皮啦！ |
||||||