| ||||||
由惠理基金孖住盛寶資產發行嘅價值黃金ETF(3081)噚日喺港交所(388)掛牌,唔知係咪驚啲投資者對ETF(交易所買賣基金)仍然陌生,所以惠理孖寶──謝清海同葉維義(兩個惠理創辦人)都花咗唔少時間向大家唱雙簧「硬銷」! 謝清海、葉維義唱雙簧 咁 佢哋隻ETF有幾咁架勢堂呀?惠理(806)主席謝清海話,呢隻係全球首隻以實金作後盾、仲庫存響香港國際機場貴金屬儲存庫嘅黃金ETF。而葉維義就繼續 補充話,市場上以實金作後盾嘅ETF,啲實金都係放係紐約、倫敦同瑞士,萬一全球又再動盪,亞洲投資者想話將黃金ETF換番實金,除咗要搭成廿個鐘頭飛 機,仲要有埋當地Visa先可以入境,閒閒哋至少搞一頭半個月,極之唔方便…… 之不過華華暫時都係得個聽字,事關據黃金ETF管理人介紹, 唔係一般散戶可以隨意將ETF換回實金,投資金額至少要900萬港紙先可以有資格換實金!話時話,兩位係咁硬銷,華華越聽越覺得似曾相識……係喇係喇,夜 晚宣傳易「麥包」都係咁sello架:「買金要買中國金!」難道佢兩個係抄人橋嘅? 李華華 | ||||||
| ||||||
財爺回水6000蚊畀大家,成為噚日晏晝中環人討論嘅焦點,究竟點樣用呢筆意外之財?華華噚日見到啲大孖沙,個個都話收到嘅話,會捐出去,但唔係個個有錢佬都係咁諗。 未諗退稅點樣使 小超人李澤鉅又點呢?噚日喺長江基建(1038)業績記招,有人問佢會點用,佢竟然答呢排忙到連水都無時間飲,所以未諗到點用。 話時話,一向鍾意板起塊面對住傳媒嘅小超,雖然投唔到英國電網,但心情勁靚,仲罕有俾人任影兼提供意見。之後仲同記者硬銷長建旗下生產、香港唔係好多地方有得賣嘅英國進口礦泉水ICENI……唔通,佢驚細佬分手單嘢霸晒報紙嘅版位,所以即刻做嘢? |