ZKIZ Archives


飛天朱:「我愛國招牌好硬淨!」

2016-07-07  NM

闊別傳媒十幾年的前人大代表兼立法會議員朱幼麟,本週日晚飛返三藩市,無獨有偶,佢選乘「行李門事件」中,梁頌昕乘搭的同一班機CX872,佢鍾意坐呢班夜機,上機就瞓,順便向空姐「收料」,進一步調查行李門的真相,佢三藩市間大屋喺山上,能遠眺史丹福大學,咁咪日日目及實梁頌昕?

臨飛前,飛天朱不忘向小宗釋明,要求梁振英早落台:「佢破壞得香港夠啦,要佢在任期內step-down,即使做四年零十一個月都要落台,個message才夠strong。」飛天朱呢幾個月喺香港咁出位,咁有冇被人勸吓要有所避忌呢?佢話:「我愛國招牌好硬淨,我冇有怕!」飛天朱返美後,不忘與各路英雄保持聯繫,至八月廿日又返香港喇,到時臨近立法會選舉前夕,大家擔定櫈仔。

中環寸嘴:飲酒好似吸白粉咁……

工廈大王楊耀松長子,游走高級酒店、銀行,及知名食肆,與各路人士打交道,自認有jet set生活方式,透過美酒佳餚,察看人生百態,把「生平絕學」不吐不快與粉絲分享。

早排去新加坡踩線,個老友介紹任職基金經理嘅香港朋友我識,睇吓佢對新加坡有幾了解,就「一」佢,叫佢訂間新加坡最貴嘅餐廳,我請!嘩,個基金經理再問清楚:「是真的嗎?」哈哈,一餐半餐我都仲頂得住,卒之去咗Orchard Road法國餐廳Les Amis,喺正Shaw Centre地鋪,側聞係邵逸夫個孫女婿開,佢係新加坡最大紅酒入口商。唔好睇個廿一歲侍酒師係仔,佢來自吉隆坡,網上自學德文,又自費上堂學俄文,都有啲high German口音;佢唔係一下子隊啲貴酒你啃,介紹咗支德國紅酒,個葡萄園位置靠近法國Burgundy邊界,天氣土壤差不多,個風格似Burgundy,其實飲酒嘅嘢,蝕頭注先,等你飲得開心再追落去,好似白粉咁,第一口唔使錢,第日先知味道呀!

酒唔係淨係識飲,仲要有心思去「挑」嘅,我贊助貴刊服務第壹大獎支白酒,唔係話好貴,但有古講,係我「捽」個老友幫我去搵o架,酒莊個Thienpont家族同樣揸住Le Pin個酒庄,Le Pin 1995之後喺大陸炒到貴晒,因為譯音似李鵬,飲「李鵬」呀!做嘢要impress到人,梗要花心思,近排見各界悼念消防員,令我諗起美國九•一一時,香港煙草何伯個孫David Ho(何定國)就夠心思,嗰時我有個則師,做我wing-man(嗰時未有資格有頭馬),佢喺史丹福讀工程,再喺哈佛讀建築,條友係David Ho拔萃同學仔,聽佢講David Ho為向九•一一喪生紐約消防員致敬,搵個名家畫幅消防帽加埋徽章,送俾紐約消防局,幾乎紐約榮譽市民都有得撈。

巴基之星馬主澳門捉蟲

唔好以為「巴基××」就係江湖花朵,都可以係勵志人物。七•一回歸賽馬日,在馬場搶盡風頭的新馬王「巴基之星」,本來大落後包尾,最後發力逢馬過馬,跑第一名揚威馬圈,正正是輸在起跑線,贏在終點線。其實馬主Kerm Din,仲有匹「巴基小子」,而「巴基之寶」、「巴基之威」和「巴基勇士」均已退役,Kerm Din係巴基斯坦裔商人,說得一口流利廣東話,仲改埋中文名叫丁志強,佢老哥九一年搞咗間滅蟲公司,專接寫字樓、家居滅蟲服務,近十年更撈得風生水起,事關在澳門賭場接咗唔少滅蟲生意,經常港、澳兩邊走,親自去督工,其中銀河娛樂都係佢大客,呢啲咁靠勞力嘅生意,又點可以冇鄉里嘅支持呢。

【壹週圖片】大班又如何

前滙豐大班艾爾敦早上十一時半到歷山大廈間Cova同友人歎茶,傾吓中東金融業,市道艱難,前大班都冇面俾,十二時半夠鐘都要交枱,餐廳要做番轉晏仔先有肉食,難得艾爾敦冇托手踭,順攤夠鐘起錨,俾着國內老總可能就……乜乜乜了。

飛天 愛國 招牌 好硬 硬淨
PermaLink: https://articles.zkiz.com/?id=204041

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019