相信每位錫車的車主，也會定期為愛驅清潔，可惜來到炎夏，不少車主為免洗到滿頭大汗，都會選擇找人代勞，令洗車公司經常大排長龍，隨時等成個鐘先至輪到你。已是軟件開發公司掌舵人的Leo，本身都是車主，前年住宅遷往沙田後，便立即遇到洗車屋排長龍的問題，於是靈機一觸，開發了《洗車俠》這個O2O模式洗車app，改變了傳統洗車業的營運模式。 《洗車俠》app的運作模式，類似時下流行的call貨車app，透過app預約到會洗車服務，不受時間、地點限制，只要有人肯接order，你想找人凌晨洗車都可以。Leo說：「《洗車俠》嘅目的係想提高洗車服務嘅機動性，希望吸引一啲日理萬機嘅車主，基本$95車身清潔只需用app就處理到，車主唔使出現，只要通知我哋架車泊咗喺邊，唔使泊喺有水源嘅地方，洗車同事會到場洗車，仲即時用app影埋事前事後相匯報，令車主更加放心。車主唔出現，只限車身基本清潔，如果需要吸車籠，車主就要出現開門，所以我將呢項價值$250嘅服務，加入連埋$450用水同泡泡嘅傳統深層次洗車服務一齊做。」 每年都有fun project 今年33歲的Leo，8年前在香港科技園創辦了軟件開發公司，除了為客人寫app外，每年也有一個fun project，他採用同事的idea來開發有趣的app，當中有不少為人所熟悉，包括09年的《衝廁》及13年的《求偶大作戰》。Leo說：「14年，我搬到沙田第一城，諗住weekend去附近油站洗車，點之有廿幾架車排隊，隨時等個幾鐘先洗到，當時即刻諗，如果有個平台可以叫人到會洗車就正啦！於是就萌生咗《洗車俠》嘅念頭。最初諗住當fun project玩吓，後來做research，發覺本地仲未有相關洗車嘅app，好似幾有潛力，最終15年中寫咗《洗車俠》app同開埋公司，睇吓可唔可以殺多條血路！」 親自落場2個月 現時《洗車俠》擁有千多名用戶，每日約有100個order，Leo表示有這成績已經不錯，雖然一方面希望有更多生意，但另一方面又怕人手應付不來，「最初起步時冇人識我哋，亦未有人手接order，要自己落手做，先幫身邊嘅朋友洗車，維持咗2個月。15年，我加入香港科技園嘅『網動科技創業培訓計劃』，由科技園幫手宣傳，後來開始多order，就搵咗耆康會嘅退休人士嚟幫手，接受1小時嘅培訓，就可以洗車。」現時《洗車俠》的基本車身清潔收費$95，每次Leo都會分$65給洗車的同事，「比出面停車場洗車每架分得$10好好多，所以反應都幾好。而家約有700人登記做洗車同事，約100名完成訓練成為真正嘅『洗車俠』，當中有80%嚟自耆康會，20%就係揸開車嘅車主，呢個比例暫時應付到每日需求，希望兩方面都穩步上揚，人手同需求最難控制。」 翻手做防失準 洗車雖然簡單，卻非常講心機，但別以為Leo會花很多心機在QC之上，例如為每位「洗車俠」評分，其實Leo簡單出一招便見效，「我哋呢個洗車方法較易處理，所以暫時都未有整花車咁壞嘅情況出現。最壞嘅情況都係洗得未夠乾淨，我哋收到投訴就會叫負責嘅『洗車俠』翻做一次，多程車錢同時間，其實已經搞到白做，所以大家都會醒目做足先走。」本地O2O營銷模式最成功例子，大部分只屬call車及上門維修服務，洗車app到現時仍只有《洗車俠》，沒有前人參考，幸好Leo有軟件公司做後盾，無論技術、成本都可以省回，「如果要寫一個好似《洗車俠》嘅app，成本約50萬，我有開軟件開發公司，慳到呢筆支出；另外，我仲準備咗5萬現金，預算應付清潔用品入貨同電話線、租伺服器、payment gateway等每月開支，不過我哋採用買代幣嘅預付交易，所以嗰5萬蚊都冇乜郁過，暫時每月盈利保持$40,000左右，都算唔錯。」 推貴價服務 除了洗車外，《洗車俠》最近更伙拍了一家貨車call台，挑選一些貨車司機參加汽車美容訓練，為《洗車俠》提供到會打蠟、鍍模服務，「呢個合作可以令《洗車俠》服務更全面，當然服務愈複雜，收費愈貴，一張鍍膜單至少2至3千，老實講，推出新服務點都賺多啲啦！不過仍然有一定難度，就係點話到俾人知，我哋做複雜嘢都ok，暫時方法都係慢慢做好口碑，冇得懶！」 「洗車俠」任先生（68歲）：上年7月透過耆康會加入咗《洗車俠》，諗住時間夠彈性，退休後當郁吓都好。我一個月接20張單，每個月多千幾蚊用，時間、地點啱先接，自己有得話事。其實洗車唔難，只係出吓汗辛苦啲，有時室內停場好焗最難頂，不過唔係日日做都ok嘅，最難洗係車頂，因為唔夠高，所以我會自備凳仔，企高啲先搞得掂。 客人 Eddie：我經常出入環保大道，加上白色車，每星期都要洗一次車。用咗《洗車俠》半年都幾方便，一般都係order喺停車場洗，仲有人喺app update通知我搞掂未，夠晒互動。另外，最近仲試埋做鍍膜，雖然收費同質素都同街冇乜大分別，但勝在唔使等。 洗車俠實測 記者都是一名車主，每日都出入出名污糟的環保大道，為了感受一下「洗車俠」的服務，筆者決定在公司寫這份稿的時侯，落order試給大家看。 洗車俠做啲乜？ 想成為基本的「洗車俠」，首先可以下載app登記，先付$50按金，再接受簡單訓練，合格就ok，過程約花半至1小時。之後Leo會免費提供洗車水及工具予洗車同事，用完可返公司補充。該$50按金最後會落到洗車同事的出糧戶口，每次賺夠$500便可過數出糧，每單job，洗車同事起碼收$65，好快就出到糧！ 開業成本 軟件開發及收費系統：$500,000器材：*$200,000總投資：$700,000 每月支出 營業額：*約$340,000 (以每日100單交易計算)伺服器租用：$4,000電話線租用：$600清潔用品及行政費用：約$10,000 (每月不定)人工：約$250,000 盈利：*約$45,000(*包括洗車服務及汽車美容) Android/iOS@洗車俠 撰文：黃德禹攝影：葉偉豪 | ||||