ZKIZ Archives


坡佬要食余仁生

2016-05-26  NM

新加坡政府胃腩一向唔細,完香港多間銀行後,最新目標係老字號「余仁生」,旗下淡馬錫聯同基金及余東旋的後人,提出以每股六毫坡紙收購在星洲上市的余仁生股權,估值十五億港紙,雖然余仁生九六年已在香港除牌,二千年在星洲上市的余仁生持有香港唔少資產,包括上環總店及元朗廠房,余仁生即將易手,唔少客仔趕忙去新加坡唐人街牛車水掃倉底貨,據聞嗰間總店貨式先夠正宗,小宗早前託老友特別在牛車水搜羅「鎮店之寶」蛇膽陳皮,因為只有牛車水這間余仁生才有一塊塊嘅蛇膽陳皮賣,不過就大跌眼鏡,打開一睇,來自香港馬百良而已,余仁生只是做買手,早知又使乜山長水遠去入貨,仲要蝕埋新加坡7%銷售稅,應該支持本土消費!

余東旋(上)的孫兒余義明(下)持有余仁生14.57%股權,與淡馬錫牽頭的財團聯手收購余仁生。《蘋果日報》圖片

余仁生在各地搜羅中成藥產品,此盒購自新加坡牛車水余仁生的蛇膽陳皮,竟是來自香港的馬百良。

中環寸嘴:自己同自己搭雞棚

工廈大王楊耀松長子,游走高級酒店、銀行,及知名食肆,與各路人士打交道,自認有jet set生活方式,透過美酒佳餚,察看人生百態,把「生平絕學」不吐不快與粉絲分享。

之前食唔到「黯然銷魂飯」,有個老友係都要請我去六國酒店間粵軒試一試,我又唔得閒食咯,吹咩!不過六國酒店咁樣marketing都吸引到人幫襯嘅,我都講o架,幫佢promote咗又唔知,上個禮拜同個賣殼專家食飯,吖,原來佢係美國加州名酒莊Robert Mondavi Society嘅會員,喺六國酒店搞annual dinner,其中一道菜就係嗰個「黯然銷魂飯」。其實啲乜乜Society,都係自己同自己搭個雞棚,搏有人尊敬,等自己有台型,又話自己識飲酒,超!我有錢不如自己買啲靚酒飲吓,無謂為咗一棵樹而放棄成個森林,不停發掘新元素先得,飲酒最緊要係同邊班人飲啫,靚酒攞嚟冧鬼佬生意人就最「值」,啲酒靚啲,至少講啲料過我都堅少少吖,因為佢都驚你搵唔到錢,驚你下次冇得俾佢飲嘛。另外,飲酒最緊要有古講,要去神化支酒,好似我老友代理美國酒咁,梗係要好似美國紅酒大使上身咁,請埋個鬼婆嚟香港,同啲客仔講吓Napa Valley、Robert Mondavi同埋Opus,介紹吓有乜好餐廳,咁先發揮到飲靚酒嘅化學作用,如果唔係,同樣價錢,點解唔飲法國酒呢,話晒美國釀酒人才嘅人工貴過歐洲嘛。咁先所謂有「卡士」。

死得人多好辦事

祖籍福建華僑陳嘉庚創辦的集友銀行傳出易手,持有該行70.49%嘅中銀香港(2388)有意把手頭股份賣俾廈門國際銀行及廈門市政府,其實當年中銀把旗下十三行合併,唯獨是南商和集友最棘手,事關兩間銀行有其他海外華僑股東,唔係咁容易首肯被中銀起,不過持有唔少碎股嘅陳嘉庚後人,散落新加坡、加拿大,都一個一個咁仙遊,收購過程易話為啲,而且中銀搵到福建廈門國際銀行呢個啱河車嘅好人家,相信同是福建幫大家啱嘴型好多,呢單交易好事近矣。

處長戀戀大宅

民航處處長羅崇文被揭任內拍板斥資廿億建奢華民航處新總部大樓,於上週四開始退休前休假,咁識歎嘅羅崇文,相信最捨不得係住開嘅山頂大宅,中峽道十二號嘅公務員宿舍,與附近的富豪為鄰,雖然羅崇文都有投資吓東涌嘅海堤灣畔、九龍站擎天半島及深井海韻花園,但純粹炒作,有賺即走冇持貨,而且對生活有要求嘅處長又點會「降呢」住apartment呢?冇有怕,仲有老婆吖嘛,其實羅太梁婉雅亦是公務員,在民航處任職,聽講羅崇文退休後冇得住山頂,羅氏夫婦都可以靠政府房津,搬去舂坎角做其上等人。

PermaLink: https://articles.zkiz.com/?id=199715

Next Page

ZKIZ Archives @ 2019