不知曾幾何時，CKM001長線持有的股票都被統稱為「點穴股」，言下之意，即係話間公司在股票市場上掛牌的股價定實，無升無跌，投機賭徒同 你講，炒股賺快錢先係硬道理，股價定實，咁點賺錢? 股價一時定實的全貫以「廢股」之名，散戶唔識當然被佢嚇死，識嘅真係被佢笑死，散戶經常比人老點，以為買股票與賭波、賭馬或買六合彩無異，下注過一、兩日 就要開彩定輸贏，唔知道買股票原來就係等於同人夾份做生意，只要公司年年賺錢，現金流年年正增長，分紅自然年年增加，資產自然年年升值。
老實講，本人絕對唔介意手上股票的股價被人點穴，就以剛買入的中國動向為例，如果股價在$3.51永遠定實，現價都有5厘息收，如果每年派息有一成 增長，我已經好滿意，起碼好過存錢入銀行做定存，又或是買樓收租，唔通投機賭徒連咁簡單嘅道理都唔識? 正途賺唔到錢當然要使橫手，收輪商水幫推窩輪牛熊證，同某券商打龍通，幫客戶瘋狂炒單，教散戶炒出炒入輸佣金，幫無良莊家推莊股呃錢。
本人持有二、三十隻股票，香港大藍籌有中人壽(2628)、平保(2318)、建行(0939)、匯豐(0005)、中銀香港(2388)、中移動 (0941)，全部以實物股票持有，隻隻都賺錢，而且定時定候派發股息，除非有更好的投資目標，沽出手上優質股票，等同殺雞取卵，自斷米路。中銀香港揸最 耐，8年股價升三倍，兩保揸了五年，股票升幅6、7倍，還未計算股息收入，就算投機賭徒認為最無運行嘅中移動，未來一樣生機處處，試想想一盤壟斷經營的生 意，手上客戶達6億，未來每個客戶的手機增值服務賺多一蚊，你話中移可以賺多幾個億? 大家唔好忘記，中移賺的是人民幣，派息以人民幣計價，就計算每年收三厘幾息，已經好過揸人民幣債券。
好奇怪，本網誌近來瀏覽人次節節上升，證明點穴股原來咁有市場，可能散戶經常被財棍老點，買的都是坑人莊家垃圾股，輸錢已經預咗，買點穴股起碼點使輸錢，實在輸少當贏，呵呵!!