ZKIZ Archives


只爭利益 左丁山

2010-11-15  AD




 

先父生前在中華 電力公司工作,每年梗有幾日在西裝戴上紅色罌粟花胸針,佢話係公司文化喎。記得小時候街上係有得賣嘅,不過近二三十年已不復見。我地睇英超足球直播,每年 十月尾,十一月,就見到每一隊嘅領隊(例如費格遜、列納)都戴罌粟花胸針,中環街頭亦間中見到英國人戴。此乃英國傳統,係紀念十一月十一日第一次世界大戰 結束,悼念死難人民及士兵。

碰啱呢個時候,英國首相金馬倫率領龐大代表團到中國訪問,人人戴上罌粟花胸針,觸動中國神經,通知佢地唔好戴。 罌粟就係鴉片,今年係鴉片戰爭一百七十周年,中國官員對罌粟花有感冒。但英方官商民代表亦有為難之處,全英國都在此時候戴上罌粟花胸針,英國領袖到咗北京 就唔戴,莫非向中國叩頭?所以一於堅持。搞外交,碰上呢啲問題,十分濕滯,金馬倫訪華日期正好與G20首長峰會配合,唔遲唔早,提早或延遲,都有不便之 處,英國人眼見胡主席訪法,簽訂二百億美元貿易合約,起晒痰,但金馬倫到北京,簽約銀碼少咗幾倍,最大宗就係近日飽受質疑嘅勞斯萊斯飛機引擎,值七億五千 萬鎊而已,其他就係賣生豬到中國,及註冊Scotch呢個字為蘇格蘭威士忌,甚為濕碎。

就係為咗呢啲生意,金馬倫到北京絕口不提劉曉波與人 權(北京更唔畀面,在佢訪問期間整多單趙連海寃獄)。英國首相如是,一啲本地議員要求中國人特區行政長官為劉曉波表態,實在太過天真或故意強人所難。 BBC記者在北京特登講:「三年前的反對黨領袖批中國沒有人權,沒有言論自由,沒有互聯網自由,但今天他是英國首相,到北京只談生意,其他一概不理會。」 假設明年英國保守黨自民黨聯合政府垮台,金馬倫下野,咪又會誇誇其談,講中國係警察國家囉。國際政治十分現實,國與國之間只有永久的利益,沒有永久的敵人 朋友,相信美國英國會支持中國人爭取民主化、香港人爭取直選嘅,實在太過天真,不如返幼稚園再讀過書。

 


PermaLink: https://articles.zkiz.com/?id=19363

Next Page

ZKIZ Archives @ 2019