ZKIZ Archives


睇清雨潤三斤釘

2016-04-07

雨潤(1068)剛公布一五年全年業績,睇到小宗眼瓊瓊,核數師畢馬威扱咗個Qualified Opinion「豬仔印」俾雨潤,即係話對雨潤盤數「無法作出意見」!

以往雨潤賺錢有法,唔係靠賣豬肉,而係「負商譽」,話說公司管理層「叻叻」經常執到平嘢,因而產生「負商譽」再撥入賬目變成公司收入,加埋地方政府醒俾雨潤嘅「補貼」,令雨潤上市頭幾年由賺幾億變每年賺幾十億。但醜婦終須見家翁,剛公布全年業績就穿晒煲,單是廠房、物業及預付租賃減值就十二億;公司已經資不抵債,揹住七十五億債,有六十五億一年內到期,上月中有五億九千萬短錢到期都還唔到,畢馬威都講得好白,對於雨潤能否經營下去「存重大不確定性」。咁惡劣,梗要加速賣嘢套現,睇到呢度仲嚇死人,雨潤賣嘢套現,原來係要撇賬o架,例如三千萬賣走家凍肉公司,要撇千二萬,仲有一欄預付租賃(Lease Prepayment),呢個item真係雨潤特有,以往公司以好筍嘅價向地方政府取得land use right土地使用權,嗱,係使用權咋,唔係擁有權,雨潤年年搵人秤吓呢啲land use right就年年升值,但今鋪賬睇到呢啲土地使用權一轉手賣出去,就撇咗六千九百萬,即係話接手買家都唔信咁值錢囉。咁以前嘅估值,有冇「吹脹」咗呢?正所謂愈窮愈見鬼,雨潤套現愈急,撇賬撇到氣咳,公司叫做有成三十億預付租賃款項、一百四十七億物業、廠房,又有三十一億應收賬,雨潤現市值二十二億,有人以為爛船有三斤釘,想刀邊嚐蜜糖,究竟係三斤釘定三分釘,股東自己諗。小宗俾多個錦囊大家,二○一四年星展銀行(香港分行)仍然係雨潤嘅主要往來銀行,二○一五年中期都抽咗身,剩低中行、農行、中信、工行同招行等中資銀行風雨同路,雨潤股東,你懂的。

中環寸嘴:對住個G點插埋去

工廈大王楊耀松長子,游走高級酒店、銀行,及知名食肆,與各路人士打交道,透過美酒佳餚,察看人生百態,讓讀者「嗒」落有味。

Rating Agency一步一步逼埋嚟,繼穆迪後,標普將香港主權評級降至負面,人哋都講晒理據出嚟,理由係中國評級展望被調到負面,中港關係密切,唇亡齒寒,但係香港啲官到底feel唔feel到有幾危急?點解仲好似鴕鳥政策咁,傻強(財經事務及庫務局局長陳家強)仲喺度講一帶一路,國家轉型大把機會,咁講都得,仲以為自己喺大學教緊書,啲學生坐喺度聽你噏求合格呀?睇埋有線《Money Cafe》,自認金融精英嘅林奮強,成日都話香港有好多精英,求其喺中環返工都自認金融精英,講啲嘢帶人遊花園,雖然我只係游走中、上環、灣仔mid-town,不過就經常出入中環酒店、中西會所(唔係尖沙咀會所)見吓朋友,交換吓投資心得,但行出嚟講嘢係要畫龍點睛,梗係要狠狠地對正G點插埋去,咁先有效益,大家聽落去都happy到震!

返加拿大時,到Whistler走咗轉update一下,呢度都有唔少香港人腳毛,百樂酒店創辦人許讓成family曾經喺度搞過Tennis Clinic度假村,以瑞典網球手「波格」為名,蘭桂坊之父盛智文仲keep住間度假屋喺Whistler嘅Blackcomb,成班黃柴(指中國人)喺山腳shopping,cafe爆滿,好在我知窿路,同老友開車殺上去Four Seasons Resort歎番個下午茶,三條友有cocktail、咖啡、小食,擺到成枱都係,都只係七嚿幾水港紙,啲「黃柴」梗識湧嚟加拿大買嘢,使乜去香港買啫!

四叔捐五球鄉里食粉絲

貴為順德「籮友」老友,四叔對順德聯誼會出錢出力。上週聯誼會舉行就職禮,四叔豪捐五百萬予該會,會員有餐食仲有禮物包拎走,其中一份小禮物係「日清即食粉絲」。咦!日清近排推出豪華魚翅味杯麵,香港賣17蚊一杯,送呢款先符合四叔身份喎,魚翅點都貴過粉絲嘛!有順德口痕友說:「俾四叔知道,我哋冇亂使佢捐嗰五百萬嘛。」

只許州官走資不許百姓保本

自習大大上場後,背景神秘的安邦保險在國內的生意路路暢通,聽講安邦董事長吳小暉霸氣十足,可直踩入中國保監會辦公室傾偈;呢間「超級」保險巨頭威震海外,但中資金融界人士都私底下gossip,安邦近幾年大舉到海外掃貨,單單以十億美元計;安邦掃的貨都是有穩定收益嘅磚頭,說穿了都係怕人民幣貶值,但就美其名叫做「走出去」,唔係走資,但百姓想買保險避開人仔貶值風險就分分鐘落閘;陰謀論係等到幾年後人仔貶到咁上下,安邦挾住海外資產印印腳,到時又返回祖國掃平貨。

PermaLink: https://articles.zkiz.com/?id=191658

Next Page

ZKIZ Archives @ 2019