|
||||||
|
唔知係咪世界越來越難撈，華華覺得近年多咗好多財金界星級人馬選擇急流勇退，好似之前有不敗基金經理之稱嘅德魯肯米勒（Stanley Druckenmiller），突然決定拉閘唔做，因此震驚全球基金界。 噚日《金融時報》又話，內地最大嘅私募基金、由前高盛高華董事長方風雷（圖）打骰嘅厚樸投資（Hopu Investment），都已經決定逐步淡出，唔會再集新資金，而原因係3個始創合夥人當中，有兩位已經決定唔玩，意味呢間曾經名震四方的私募基金，正在慢慢拉閘…… 何潮輝話想嘆世界 咁到底係邊兩個唔玩呢？市場傳聞話，就係曾經做過畢馬威中國及香港業務主席嘅何潮輝（Dominic Ho），同埋前高盛亞洲投行業務聯合主管王忠信（Richard Ong）。 聞說何生想退休嘆世界好耐o架喇，而王忠信就好似話會去佢細佬任職嘅淡馬錫度繼續做嘢，而王忠信回覆《金融時報》時就話，自己「呢一刻仲係厚樸既CEO」！ 根據華華行走江湖咁多年嘅經驗，呢啲issue但凡答得出「呢一刻」、「呢一秒」、「呢個moment」之後，咪即係好快反枱或者散band囉！ 李華華 |
||||||