|
||||||
|
呢日到四季酒店 吃午飯，在升降機碰到一位攝影記者與幾位既講普通話又講美式英文嘅行政人員，聽而知係海歸派分析師，基金經理嗰類。問攝記：「有乜活動呀？」攝記答：「影 IPO介紹會呀，呢排有好多。」睇吓手機，當時仲未到十二點半，見到四季「波廳」外已經人頭湧湧，可見有不少證券、投行、傳媒中人已在十二時半前開始到 場。 以前左丁山曾不時參加呢類聚會，時間通常係由十二點半到兩點半，共二小時，但好多人客（證券界人士）到咗二時十分或早一啲就紛紛離座， 趕回公司準備下午二時半交易所開市。而大部份人士就要等到十二點九個字先至到齊，當然係在上午收市後先至趕嚟參加之故，時間如此緊逼，搞IPO推介會嘅場 地離不開中環與金鐘三間酒店，去遠啲呀？人地想畀面亦有心無力。好彩香港金融界寫字樓集中於中環、金鐘，步行，搭地鐵或電車，五至十五分鐘內可以到達，十 分有效率，此乃香港競爭成為世界金融中心之優勝條件之一。其他城市譬如曼谷呀？中午食餐商業應酬飯都要預備塞車起碼一個小時，淨係呢樣已經冇希望成為甚麼 世界中心。 後來碰到在證券界打滾近四十年嘅經紀H，佢對一張報紙單打本地華資經紀吃午飯要長時間，「反映了一些行業中人由交易所前的四會打 拼到如今，經過二三十年間的拼搏，早已盤滿缽滿，故此才戮力反對這項早已談了好多年的延長交易時段建議」，經紀H甚為不滿咁話：「我地今日唔搏殺？講笑 咩，容乜易冇碇企？實際上我地每日八點前已經返到公司開會，檢討昨天，預備今天，下午四時收市後你估即刻鬆人去桑拿呀？此乃二十幾年前之事，今日仲有好多 事要跟，睇吓倫敦做成點，香港有好多生意係在午飯時間傾嘅，如果得一個鐘頭食飯，大行就話人多，可以調配啫，華資中小型證券商比較少人，得一個鐘頭食飯， 老闆邊度有時間出去應酬客戶拉生意呀，或者聽IPO推介呀！」睇嚟延長交易時段，勢所必行，但照顧吓本地習慣，中午有個半鐘頭吃午飯就差唔多。 |
||||||