| ||||||
| iPhone4 一出，誰與爭鋒，目前智能電話係手機產品主流，仍然佔市場最大份額嘅諾基亞，自蘋果推出iPhone之後，股價不斷下降，上月發出盈警，前景不樂觀，前星 期又見南韓LG因受手機產品所累，發表嘅業績不如理想。呢日碰到電訊W，佢話手機係競爭激烈市場，好多牌子已經淘汰出局，無論一間公司有多大，牌子有多 響，一樣被踢出擂台，目前只有四大品牌競爭，就係蘋果iPhone，南韓三星，台灣HTC，加拿大RIM（黑莓），芬蘭嘅諾基亞如果在智能手機方面唔能夠 有突破，就會繼續出血，陰乾。佢話十年前威盡一時嘅PDA（電子手帳），而今安在？Palm曾經獨領風騷，今日不能獨立生存了。 唔怪得有話 hi-tech揩嘢，高科技產品係英雄地，叻到喬布斯咁，就有用武之地嘞，但喬布斯身體不佳，蘋果公司冇咗佢，會唔會變成Palm第二？左丁山呢輪學習 iPad，換咗部iPhone4，玩吓玩吓，幾乎想連屋企部桌面電腦都轉換成iMac。蘋果產品最突出之處，就係極之user friendly，好容易上手，其他公司點解總係學唔到呢樣嘢呢？電訊Ｗ話iPhone嘅接收效果唔夠諾基亞好，因為呢部電話係電腦公司設計出嚟嘅，但呢 樣小缺點就俾其他優點掩蓋晒，特別係Apps之多，令人愛不釋手，情願袋住兩部手機出街（如左丁山），唔怪得有報道話，微軟經連場挑戰蘋果失敗後，總裁 Ballmer好憎恨iPhone，開會時見到下屬手持iPhone，嬲到要佢擲機落地，踩到爛為止！ 寫稿人有咗iPhone、iPad之 後，發現新方法傳稿。李純恩教路，寫好稿，用iPhone拍照，以SMS方式送畀副刊編輯，去到外地就唔駛周圍搵傳真機，但左丁山做過實驗，發覺相片太 黑，編輯可能睇唔到喎；查小欣教路用iPad手寫板寫稿，跟住用電郵送出，十分方便。呢個方法，左丁山正在學習，不過最方便嘅，就係即使在咖啡室寫稿要查 資料，搵iPhone上網查一查，快夾妥，真係要講一句"don't leave home without it"（套用二十幾年前運通卡宣傳口號）。 | ||||||