| ||||||
| 就其洗頭水驗出有二噁烷一事，敝刊記者走上廣州，試圖參觀霸王廠房、睇睇其生產流程而不果。事隔三日，記者再次造訪廣州之霸王廠房，雖然同樣不得其門而入，但今趟赫然有所發現。 發現咗乜？霸王自拆招牌也。三日前仲喺廠房頂之「霸王國際集團」之大招牌不復見矣。冇錯，其間颱風康森確係作勢來襲，風勢稍有加強，但個風卒之都吹咗去越南啦，咁大塊鐵架招牌，冇理由咁豆泥o架。 於此可見，「霸王國際集團」招牌之消失，非事出天然而是人為者也。上市集團，何事自拆招牌，而且仲係咁大塊者？費解也。 郭台銘亦上終南山 眾所周知，四叔篤信道教，年前更好似陳廷驊出錢印佛經咁，印咗唔少《道德經》通街派，道人無為而治。今趟天匯犯官非，佢又豈可以唔搵高人指點迷津呢？ 有。佢已經去過陝西終南山樓觀台，向任法融道長請益。道長俾咗個乜嘢錦囊四叔，在此且賣個關子，唔使幾耐大家就會知任道長之法力如何矣。 任道長聲名遠播，四叔固然要向佢請益。即使號稱超人之城中首富，亦唔例外。甚至早排為十二跳困擾之富士康，其老闆、台灣首富郭台銘一樣要搵任道長幫手。 台港兩地之首富都要搵任道長，足見終南捷徑之說，確實有料到也。一句到底，總之要出名。 魯連城食檸檬 蒙 古能源主席魯連城喺大浪西灣買咗幅近廿萬呎嘅農地，打算闢之為私人農莊。事為環保之徒覺察，喺Facebook整咗個群組反對其事，有近四萬人響應，唔少 人更附加「問候」。「大浪西灣之友」發言人文家傑話：「雖然成件事無人犯法，但係成個社會都唔鍾意有錢人，好難講理性。而且social media嘅威力好大，無人控制到個campaign。」 為咗息事寧人，魯連城主動接觸長春社公共事務經理，希望同佢溝通其農莊構思，點知對方話要同九個環保團體達成共識先再傾。正是形勢比人強，睬你都傻啦。睇嚟魯連城都要開番個Facebook戶口以便同班綠色分子聯誼吓。 李官頭上長草 終審庭李官榮休卸任，一眾門徒到炮台里紅磚屋歡送；敝欄中環特派專員不敢瀆職，走咗去湊高興。 唔湊高興猶自可，一湊則俾佢老人家（親暱之稱謂，絕無年齡歧視之意，平機會林官還請放心）發覺終審庭紅磚屋之煙囱生滿雜草。觀乎堆雜草之茂盛景況，則佢哋喺度生根有年矣。喺特區最高司法權威之李官頭上長草，認真攞膽也。負責維修政府衙門之建築署又豈可以咁疏忽者？ 現今李去馬來，仲唔速速為終審庭剷草 —— 千祈、千祈記得除根 —— 又更待何時？馬道立無疑禿頂，頭上長堆咁嘅草都唔係咁雅觀噃。 《維城通志》卒之面世 紅毛初佔香江，以Victoria, BCC為新殖民地命名，此即係唐人所稱之維城也。今屆書展，有好事之徒依照古時地方誌之舊例，出咗本《維城通志》，詳為論述維城之人物掌故以為誌記，並以通志之人物、動物、風物等雕製麻雀一副，供讀者耍樂。 翻過通志，發覺內裡不乏可堪玩味之條目。譬如「河蟹」，按通志考證，則大量湧現於○八年京奧前夕，自後南徙，經深圳河進入特區；通志預言「十年後河蟹將會變成香港最大單一動物品種」。 又如鵪鶉一條，通志確定，過渡後本地鵪鶉DNA異變，較紅毛治下更易受北風驚嚇，「經常疑神疑鬼」。曾特首北上述職，例牌必恭必敬、櫈坐半邊、低頭疾抄筆記，由是贏得「鵪鶉特首」之稱云云。 《維城通志》所記所述未必完全經得起科學考證，但要應付通識科考試之學生哥熟讀之，要攞個pass應該唔難噃！ 中環人語迷你版 “咁早，點飲呀？” 估中邊個中環人講呢句說話，送你DYMO Letra Tag中英文電子標籤機一部 有意參加者，請於七月二十六日24:00前將答案電郵[email protected] 小宗只接受電郵，郵寄免問。 本刊員工及直系親屬不得參加。 為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。 超過一位讀者估中，先到先得，恕不接受上訴。 答案及中獎者姓名將於一○年七月二十九日本欄揭曉。 上週人語揭曉 “點解淨係針對民主黨？” 答案︰何俊仁 得獎者︰K.C.Lee 中獎時間︰1:00pm 14/7/10 金牙大狀講嘢 攞命陳冇做嘢 都係八爪魚啫，人哋保羅八連貫，威震全球；我哋隻Octopus八達通則搞到要低低地躀一鋪，承認將客戶資料同第三者「分享」。何以同係八爪魚而唔同命也。 咁樣同第三者「分享」客戶資料，是否有違私隱條例，且留待中年怒漢吳斌專員去聖裁；然而不可不知者，八達通並非普通一間發咭公司。佢哋接受客戶存款，故此係受金管局監管之銀行也。銀行如何使用客戶資料，從來受銀行條例守則規限，唔可以亂嚟者。 咁 銀行守則又點講法？金管局頒布之Code of Banking Practice講得好清楚，未得客戶同意，不得向第三者透露其姓名、地址（守則8.4(b)），即使銀行自己要用呢啲資料作市場推廣，亦必定要首先得客 戶同意方可。八達通既為銀行，佢哋有冇得到客戶同意就同人「分享」其個人資料，則唔使問阿桂矣。 八達通違規，金管局係其監管機構，咁有冇做過嘢呢？唔覺噃。銀行違規而唔制裁，莫非金管局認為八達通為地鐵擁有，而地鐵則係特區之國企，由是官官相衞、刻意縱容？攞命陳，唔好淨係識得開記招做騷至得o架。做吓嘢啦，成千萬人工o架！ | ||||||