| ||||||
| 保誠想娶AIA，但就要求岳母 AIG減禮金，由於AIG態度強硬，分分鐘令呢頭婚事告吹。就係呢單刁，搞到AIA同保誠兩邊兵荒馬亂，AIA總裁麥智信（Mark Wilson）仲揚言，如果保誠真係吞咗AIA，佢就立即劈砲，以示誓死效忠。 其實，早喺去年海嘯期間，AIA已開始大量流失前線經紀。 舊年單係前線經紀就走咗二百幾人，今年第一季，又走咗百幾人，如果以每個經紀有一百個客為例，舊年至今已經有三萬幾個客嘅保單變成孤兒單。而澳門嘅情況亦 不遑多讓，單係一個豐盛區朱姓區頭旗下嘅經紀，就由一百七十幾人走剩四十幾人，人手緊絀，當地連被保監處除牌嘅阿頭，都獲挽留。幾個月前開始，AIA經紀 跳槽保誠嘅「過檔費」已經取消，所以呢批逃亡員工，有唔少選擇過檔國衞。 為阻止員工「逃亡」，有AIA離職經紀被扣起強積金，甚至被保安鎖 起辦公室房門，連私人物品都唔俾執走，又話跳槽者有機會收律師信云云。行內更加盛傳，如果收購成功，整體會裁走後勤三百幾人，由AIA過檔保誠做行政總裁 嘅容佳明，到時唔知會咳保誠定AIA嘅人，所以搞到兩間公司嘅後勤都人心惶惶。 金 沙試業趕客 獅城嘅賭場近月相繼落成，其中大馬雲頂集團投資嘅聖淘沙名勝世界，農曆年初一已開業，花旗過江龍蕭登‧艾德森嘅濱海灣金沙，雖然 話六月廿三日正式開幕，但其實四月底起已靜雞雞試業。當地人入賭場要交一百蚊坡紙賭稅，單係近三個月，新加坡政府喺金沙同聖淘沙兩個賭場，就收咗七千萬坡 紙賭稅。 獅城金沙賭場環境同澳門金沙差唔多，佔地約四層，其中兩層係中場同角子老虎機，試業階段賭客唔算多，好多賭枱都仲係吉嘅，入場嘅大 多以新加坡同大馬華人為主。金沙整個項目大部分已經起好，但最有噱頭嘅空中花園就未開放，博物館同商場部分亦沙塵滾滾趕緊工。雖然未完工，但金沙上月初已 急不及待接生意，幫泛太平洋律師協會搞活動，但會議期間又停電又停『車立』，搞到對方扣起場租兼揚言追討賠償，但金沙反過來入稟追討場租，家吓雙方更要對 簿公堂。正式開幕在即，金沙唔想得失客仔，就要快啲搞掂個場啦。 金牙大狀講嘢攞命陳唔識拆彈？ 攞命‧陳德霖話歐元先天設計有 問題，十六國既欠有效機制督導其財政，更冇辦法制裁違規國家，佢老哥直情好似發現新大陸咁嘅款。咁識放馬後砲，抵佢成世人坐衙門。 何以話攞 命‧陳所言係馬後砲？外匯基金有近兩萬二千億港元資產。港元同美金掛鈎，其中超過八十二 個巴仙係美金資產，呢個做法完全可以理解。此外為咗方便營運，基金有七個巴仙係港紙亦屬 正常，因為基金喺本地有使費，同時政府亦可能要錢用。有港元資產，一啲都唔出奇。咁剩低 之十個巴仙又點呢？ 冇錯啦，就係放咗喺歐元為主之資產，為數達兩千三百四十億港元。歐元唔好話跌得多，跌五個巴仙好未，咁香港人就唔見咗近 一百廿億港元矣。呢個數目比全年房屋預算仲要大。若果似得攞命‧陳咁講，歐元設計先天有問題，當初點解又買入歐元資產呢？做呢個決定之時白頭任冇錯係總 裁，但攞命‧陳都係冧把吐噃。唔通佢一啲責任都冇？ 果如攞命‧陳所言，歐元先天有問題，咁兩千幾億歐元資產點先？兩千幾億差唔多係成個政府 全年預算啦大佬！一年收成一千萬人工唔通唔使諗吓點拆彈？ 超人李用太座名義「首置」 對後生仔置業困難，超人李早前同大家分享 經驗，指自己出社會做事後十幾年先買第一間樓。睇返超人李嘅陳年舊事，四○年佢十二歲時由潮州逃難來港，舉家投靠開「中南鐘錶」嘅舅父莊靜庵，之後做過鐘 錶學徒、五金廠及塑膠廠推銷員，廿歲仲升為工廠總經理，到五○年創業，以利中實業有限公司名義，開設長江塑膠廠。 六一年時仲同叔父同住薄扶林道七十三號嘅佢，六三年先同 表妹莊月明（莊靜庵之女）結婚，同年即斥資六十五萬買入深水灣道七十九號大宅作新居。但係當年呢間屋嘅登記業主，係佢表妹莊月明而非超人李，到九○年莊月 明去世後，大宅登記業主才變為超人李個大名。唔通佢口中嘅「首置」，係另有其屋乎？ 富豪第二代搞地產 最近地產界現新血，兩個 三十來歲嘅後生仔，喺○八年以五千多萬元，購入上環荷李活道二百二十六號全幢四十年樓齡舊樓，準備全幢改建翻新為豪宅，向進身發展商邁出第一步。呢兩個後 生仔，原來都係富豪第二代；一個係「電池大王」、金山工業老闆羅仲榮嘅公子羅揚傑，佢係幾間餐廳如上環The Press Room、灣仔和昌大押舊址新餐廳The Pawn等嘅老闆。另一個係「金王」胡經昌嘅姪仔胡建邦。兩個喺上環已有多個商鋪收租，佢哋話一直鍾情呢區嘅老舊情懷，亦睇唔過眼好多新樓嘅設計。雖然項 目僅涉及五伙，但兩人信心十足，並已搵到私募基金投資，預計十一月發售，且看呢兩個後生 仔可否反轉地產界。 房協專攻銀髮市場 原本起開夾屋嘅房協，近年專攻中產銀髮市場，興建「富貴長者屋」俾中產老人住，好似將軍 澳樂頤居、牛頭角彩頤居就係啦。銀髮一族只要一次過俾幾十萬就可以長期租住直至百年歸老，由於屋苑有醫療配套，單位早已全部租出。 因應呢類 屋供不應求，房協近年加快興建筲箕灣、北角丹拿山同天水圍合共一千七百伙「富貴長者屋」，部分樓盤高層可享海景，租金估計會用市值計算。其中筲箕灣項目用 混合式設計，高層會出售俾私人，低層就租俾銀髮族，如果後生一輩買呢個盤，父母仲可以優先租住樓下單位添。除咗起長者屋，房協連針對老人嘅義工服務都照顧 埋，佢哋由員工發起嘅義工隊，近年就四出探訪老人院，同老人家剪頭髮、唱粵曲、表演魔術咁，一於起樓、醫療、慈善一條龍！ | ||||||