| ||||||
| 恒隆老闆陳啟宗 「健談」係行家都知，餐餐講嘢都講到滔滔江水連綿不絕，經過噚日之後，相信連佢細姪「細細劉」劉鳴煒都應該同我哋一樣，知道高佬陳功力有幾深厚！ 「香 港明天更好基金」啱啱出訪完花旗國，執行委員會主席高佬陳就帶埋理事委員「細細劉」同大家分享吓所見所聞，經傳媒再三「呼籲」，先「唔嫁又嫁」入正題講番 啲關香港人嘅事，當然，佢梗係講番自己最熟嗰瓣地產啦！ 叫政府恢復賣地 對於近日香江地產嘅風風雨雨，官府層出不窮玩花式，高 佬陳有好多偉論發表，不過由於佢所講嘅真係太多太多，多到不能盡錄，華華即管幫佢用9個字做個總結先──「政府恢復賣地咪得囉」。 事實上， 同行如敵國，高佬陳完全唔怕得罪人，成日高談闊論講行家，噚日佢又嚟一招暗寸嘞，當講到香港政府採取高地價政策係咪驚俾人插話賤賣土地嗰陣，高佬陳就話： 「我響香港做咗十幾廿年，未見過政府賤賣過一忽土地……呀，有一忽……」邊忽呀？「冇經拍賣或者option個忽囉！」睇番香港開埠以嚟嘅歷史，似乎係講 緊數碼港兼貝沙灣啦！ 至於「細細劉」呢，由於同場有叔父輩響度表演，搞到佢無得好好發揮，不過咁，佢都算係咁多個「富二代」之中最有為嗰幾 個之一。華華都衷心希望，將來有機會聽吓佢講做生意嘅心得！ 為亞視打官司蔡衍明：迫不得已 真係不禁要講一句：「亞洲電視如此 多FUN！」股東爭權單嘢仲喺法律程序之中，但係兩位當事人都仍然唔封嘴。「被告」查懋聲昆仲前晚澄清高院預審結果自己未輸得晒，又話自己對亞視都係真 心，噚日即刻輪到「原告」旺旺老闆蔡衍明極速還擊。蔡老闆發表鄭重聲明，話近日種種紛擾影響到亞視，並唔係佢想見到嘅，但係單嘢搞到要變訴訟，歸根究柢係 邊個引起先？社會大眾自然會有公斷（應該係話公正判斷），而佢只係響自己權益受到嚴重侵害之下，迫不得已先至訴諸法律尋求公道、還原事實嘅真相，而查懋聲 唔應該怪人尋求法律正義係傷害亞視……老實講，「公斷」對華華嚟講並唔係重點，「蔡查配」不如話畀華華知，呢單嘢諗住幾時「了斷」仲好喇！ 高 層過檔光匯BP漏油兼漏人 「福無重至，禍不單行」呢句說話，原來唔係中國人先啱用o架。你睇吓英國石油（BP）響墨西哥灣漏石油漏到一發不 可收拾，用灌漿法封油井都搞唔掂，唔見錢之餘，連人都唔見埋。 路透社噚日引述4位行內人話，BP啲員工係咁「漏」走，仲漏到去亞洲o忝！報 道話，BP一批上個月劈炮唔do、駐紮亞洲同花旗國嘅原油交易員，已經轉投光匯石油（2910）嘅懷抱嘞，佢哋包括咗前環球業務阿頭Quek Chin Thean，同埋前亞洲區阿頭Edmund Lau，而其他人亦會加入光匯……「井漏更兼連夜雨」，咁漏法，BP會唔會漏到滅頂o架？ 李華 華 [email protected] | ||||||