| ||||||
| 賓架Ｗ請吃晚 飯，不在中環設局，改為到銅鑼灣，等大家坐地鐵，行幾分鐘路。坐的士唔得咩？黃昏時份，坐車去銅鑼灣？無謂講笑嘞，貪塞車咩。銅鑼灣嘅目的地就係日本會， 以前設於三越頂樓，三越離港，大廈拆卸重建後，日本會搬咗去富豪酒店隔籬間大廈，當然冇咁方便，三越就在地鐵出口之上噃，現在就要行路到天橋迴旋處，行三 層樓嘅樓梯先至過到對面，比較麻煩。以前左丁山去到銅鑼灣，心思思就上咗三越頂樓日本會食壽司，睇吓海景，現在冇咯，算係白交會費。 吃過魚 生壽司，請教地產專家基金Ｆ，問佢對中港調控樓市有何高見。基金Ｆ話：「香港好易睇，中國唔識睇。香港嘅所謂九招十二式，係規管賣樓方式啫，與樓價全無關 係，要樓價跌，最有效方法就係增加樓盤供應與提高利率，或者遇上一場金融風暴，例如一九九七。但目前冇風暴，少供應，不能加息，你叫樓價點跌呀，政府做吓 騷，叫發展商唔好使出咁多心理招數，營造銷售氣氛啫。在座各位幾時曾經俾經紀講兩講就入票買樓呀？至於中國地產，就複雜得多，中央明令暗令房價（即樓價） 不可上升，只准下跌，於是除咗加息之外，乜嘢行政命令都出齊。分析中國地產，有一個數據係好難搵得到嘅，就係樓房嘅真正空置率。最近深圳咪有一段消息話一 位私人業主竟然持有六百層樓，要推出市面嘅？一個人揸住咁多個單位而又唔係全部租出，在任何其他地方，都係不可思議，而在中國有幾多呢類人呢？冇人知道。 中國大城市有好多落成住宅到咗晚上仍然烏燈黑火，無人居住，但已經全部賣晒。呢類售出而無人居住嘅樓幾時會推出市場？比例有幾高？一旦推出嘅話，市面供應 量大增，房價怎能不跌？唔推出嘅話，業主又無租金收入，究竟可以等幾耐？故此，我唔識睇中國房地產之真正風險，一旦下跌，殺傷力會好大。」內地人買樓唔租 出，擺喺度等升值，確實係難以理解嘅投資行為，可能與內地稅項繁多有關。 | ||||||