美股連續第六日上 漲，再輕微上升至近19个月以来高位。杜指早段走勢反覆，午後才發力向上，不過升幅有限。杜指微升21點或 0.2%至11145點，標普500指數升1點至1212點。杜指期貨指數最新報11082點，比現貨低水63點。
港股美國預托證券跟 隨大市造好，ADR港比指數收報22286點，比香港收高128點或0.6%。匯控寿現強勁，收85.33元，比 香港收市高1.2%，中移動靠穩，收報80.82元，比香港收市高0.2%。
美國4月份紐約州製造業指數為31.9超預期，費城製造業指數連續八個月上漲，推動Caterpillar等工業股造好，UPS業 績遠好過預期，股價急升近5%，帶領大市向上。不過由於就業市場仍然唔多爭氣，首次申請失業救濟人數較上月增加2.4萬，創下了兩個月來新高，總人數增至 48.4萬。希臘總理又急Call歐盟開會救亡，令投資者唔敢放胆入市。壓住大市升勢。
希臘總理George Papandreou前日要求與歐盟、歐洲央行及IMF召開會議，相信係如何落實歐盟同IMF上周承諾嘅450億歐元的貸款細節。會議已定於下周一在雅典 舉行。之前各方的協議係，希臘需在5月底前籌到116億歐元。不過，Papandreou表示，以現在這樣高市場利率借錢，實在係頂唔住得幾耐 （unsustainable）。希臘10年期債券當日急升至7.319厘，仲高過援助計劃宣布前的水平。Capital Economics 公司嘅首席歐洲經濟師表示，「希臘經濟在幾年內仍將維持衰退狀態，會好難實現其減債計劃。給予援助的金額最終可能會超過原定的450億歐元。」
歐盟領袖相信唔可以 見死不救，唔伸出援手。原因係保住希臘，至可以維持歐洲這個單一貨幣基制。歐洲央行董事成員Juergen Sark昨日在馬德里與歐盟領袖開會時警告，希臘債務危機可能預示了新一輪的金融海嘯。佢話，「我尤其憂慮公共財務正戲劇性地惡化，因這需要多年時間和具 有非常進取的財政政策才能加以整合。」有專家指出以意大利、西班牙、葡萄牙和愛爾蘭同樣面對財務整合的困境，由於缺乏競爭力，經濟出現嚴重問題，由於佢地 經濟規模大得多，同希臘的問題「完全有得比」（broadly comparable）。簡單一句，歐洲問題「未解決」，只不過唔係咁快爆啫。
昨日講起朋友A俾太太詐型的問題，惹起不少迴嚮，其實我只想講一句，無論男男女女，都要知足，或者而家你的家庭狀況或財務狀況唔係咁理 想，但比上不足比下有餘，唔好要求太高，特別對另一半，否則好易擦出火花，外國有研究顯，男女開始相愛18個月後，熱情開始退卻，可以好科學化咁用女仔抬 高腳同男仔接吻的高度來量度，即係話相愛18個月後，男女的熱情都減退，女仔接吻時連隻腳都唔會抬咁高(男仔都一樣)，慢慢變成交功課，這是男女感情生變 的生物原因，就係對得耐開始無火花，相識後18個月已經係咁，結緍18年又點計? 所以在家庭要營造happy氣氛，大家開開心心就好啦，唔好咁多要求，否則搵交嗌，相識3個月大家熱情如火時會就住就住，相識3年，13年，30年後會 點? 真係好似對待自己阿爸阿媽咁，大家咁熟，唔使咁相就，一言不合，就會惡言相向，搞得幾搞，無論男女，都唔想返屋企。所以知足係必要的，營造家庭良好氣氛係 必要啲。
不過我今日又想講一個相反的例子，如果處境都ok 啦，一定要知足，否則就唔快樂啦，但係有啲處境又真係好差，唔可以知足，呢個就係網友Mya的例子，佢自稱「一個大洗的中年人」，佢咁講，「本人都覺陸 sir 的文章發人深省 ! 而且他的網友回應也都發人深省 !看完stockinvest的回應後很慚愧， 因本人也有月薪三萬且打工也有十多年，但每月也入不敷支，除了自己大洗外，兩個小孩的開支也不少, 現在人到中年差不多五十，只有十萬元儲蓄。想投資買股票也無從入手，想請教陸 sir 指點一下。」
唔係呀嘛，網友stockinvest做咗10幾年嘢，而家月入3萬，佢每月使5000元，而家儲蓄加投資有580萬，但Mya亦係月薪3 萬，但到而家只有10萬儲蓄? 聽完呢個個案，首先要恭喜stockinvest，你比上不足，比下好有餘，你識過一班好似Mya咁樣「窮」朋友(睇外表我估分唔出)，你就會開心好多 啦!
但係Mya咁o既個案，真係好惡搞，50出頭，只有 10萬積蓄，我唔知你有無自己的物業，如果有自住物業都好啲，無就更大鑊，如果你係25歲時有10萬儲蓄，咁就唔同，普普通通節儉少少投資有道，50歲時 都應該有幾百萬，甚至過千萬資產，唔係10萬。
花費太多無得救，子女 開支可以係無底深潭，而且一使開就停唔到，係經常開支，讀公家學校，差唔多唔使錢，但讀直資學校少少地每月都要3000 元以上，讀好啲讀私立學校要7000、8000元，多多都唔夠。30年前細路學琴好大件事，而家不少私家學校根本不當學琴係學一種樂器，要你學多一種，你 話花幾多錢至夠?咁如果錢唔多係唔係根本唔使俾個女學琴？另外，自己買嘢，出街食飯，旅行，都可以係好大筆消費，一唔節制，多多錢都無哂。
我有一個理論，叫 「頭帽合拍論」，無咁大個頭唔好戴咁大頂帽，人只能做合自己身份的消費，每月至少有25%收入可以儲蓄，勁一啲是 「大頭戴細帽」，只作低自己身份一兩級的消費，人地會話你滑稽，笑你孤寒，但咁樣隨時有50%的收入可以儲起投資，長線來講複式增長效果好勁。
Mya你年紀略大， 比較難救，但無得救都要救，只能從節儉啲開始，如果無法增加收入，就要減少開支，增加現金流的滾存，唔係你老來都幾大鑊，我估你如果打工，只可以做多10 年，到60歲就要退休，但香港人長命世界數一數二，有錢老啲無所謂，無錢老來都幾辛苦，生活質素會不斷下降，如果你係男人，可以活到80以上，女人隨時見 90，即係退休後要生活30年，仔女理唔理你又唔知，唔儲埋一啲，難保將來想食多個生果，都要先落街執多兩件紙皮盒去賣先要夠錢噃…………
陸羽仁