隔代接班人 包Sir高招布局
2015-05-21 NM小宗手痕，將吳光正同阿仔吳宗權放上《How Old Do I Look》測試年齡網站，嘩！吳光正認真「正」，得56歲，較真實年齡後生12年噃。 男人有權力，人都後生啲，咁，又何故咁早將九倉主席個位交棒俾阿仔呢？聽聞，呢個係吳光正外父包Sir嘅悉心安排噃，同鄧小平一樣，包Sir要安排埋隔代接班人。其實睇吓九倉系母公司會德豐，多少都露咗啲端倪。包Sir得獅子銀行支持鯨吞九倉、會德豐，又點會唔幫襯HSBC信託處理身家呢？吳光正老婆包陪容實揸會德豐11.002%，另48.981%由HSBC Trustee（C.I.）Ltd.持有，由是吳光正與老婆屬聯繫人，估計兩夫婦在信託內有若干權益；因為老婆關係，吳光正叫做揸咗會德豐六成股權囉。包Sir智慧認真高，唔單只搵到個女婿湊住個上市王國，呢個半邊仔到時到候仲乖乖交棒俾擁有包氏血統嘅第三代吳宗權，到最後咁大盤生意都仍然牢牢握在包家手中！呢啲可能就係成立信託嘅好處啦。賭王大舅行先一步賭王何鴻燊同二房兄長藍鏵纓早排都喺養和，點知大舅行先一步，本週一出殯。 話說呢位鏵哥早年係賭王打江山時的得力助手，包攬葡京裝修、保安及手信鋪等瓣數，作風都幾強悍，同佢有偈傾嘅梗有關照，唔識佢嘅休想俾條生路你行，只不過老四嘅出現就改變咗遊戲規則，鏵哥手頭地盤冇咗一大截；其實兄憑妹貴嘅佢早已上岸「收夠籌」，冇你咁好氣。話晒都一家親，設靈當日，三太四太親自到來，連澳門前特首「鏵哥」都送他最後一程，足見此鏵哥有番咁上下江湖地位。慳佣有法游走於中港台併購、私募投資的金融多棲動物，現為多間上市公司主要股東及董事隔籬版面樓上位寸嘴楊，嘴刁口直，難得對世事又觀察入微，寸寸貢的口啓睇得人時有共鳴，咁有幽默感的富豪真是買少見少，真是中環又一真正逍遙客也。上期寸嘴楊提及zero cost option（又稱risk reversal swap），更是盡顯傳統富豪的投資理念。想賭又怕吃眼前虧，做番個「1call拖2 put」策略，為自己預留10至15%下跌空間，可保絲毫不損，向上則「一對一」粒粒肉，此策略攻守兼備，的確值得推薦。反觀一眾股蟻，不問fundamental，只望買落即升，恨不得轉頭double，投資下下赤膊上陣，刀刀見血，可以預期，結果總是以一場噩夢終結。其實選定一隻可靠股票，zero cost option並非大戶專利，成本肯定比楊公子在名牌銀行買的便宜。睇來楊公子食得精明，但投資卻偶然睇漏眼。皆因利用港交所期權交易，便可自製出一套risk reversal swap，名牌銀行筆佣就可慳番。散戶幾萬蚊也可交易，上千上億也只需一頭半個鐘就得，一般情形可省回2至3%。這2至3%正是嗰啲身光頸靚private banker的佣金。小數怕長計，楊公子慳番一單的錢，應該足夠送盒絕版雪茄嚟樓下俾逍遙客吧！補白：最近再傳前特區爵士會被控貪污；呢位前話事人年逾七十，被拍到與夫人在郵輪上神態落泊。這很易理解，此爵士一生平步青雲，在其當沙田政務官時，早聽過連雞鴨牛羊等小便宜也不放過，新界鄉民領教不少。早年參加某電台活動，也着負責人順便打包幾支名貴電子筆回家。官做大了，坐上富豪遊艇私人飛機，沒什麼出奇，三歲定八十放諸四海皆準。中環寸嘴奪命金工廈大王楊耀松長子，是各大有名食肆之VIP，喜歡研究已故及城中有錢佬對食之喜好，強調「貴」唔等如識食，自詡分享食經乃是提升讀者之水平。早排同老友舂入去IFC間酒鋪ENOTECA，見佢被逼遷，睇吓有冇筍嘢執啦，個僆妹（銷售員）都識嘢，介紹支1982 Chateau Montrose St. Estephe，雖然唔係名牌酒莊，飲得過吖！三千銀，抵呀，第二度起碼五六千，有時名牌呢啲嘢攞嚟「大」人嘅啫！最緊要實質嘛。呢，好似而家啲銀行佬，唔好以為名牌大行就好呀，上頭叫佢推隻基金就淨係識推隻基金俾你，十足《奪命金》套戲咁，以前買落啲嘢坐咗艇，就唔識得度吓橋搵decumulator同你兜番，開乜價都要目及到佢實，銀行佬梗係想愈快knock out愈好，等我又開多張，佣金就到手！啲銀行佬成日叫我搬多啲錢去佢度，超！我搬多啲錢嚟，你識做咩？唔好話我唔分甘同味，今期我送出一支喺名牌高級珠寶店GRAFF開張時「攞」嘅sparkling wine；係我fans就電郵來
[email protected]，寫幾隻字評論吓我欄目，講得啱我聽嘅，咪送俾佢囉！左丁山變皇帝女左丁山發公告，話《GG細語》開始喺友報倒數。消息一出，迅即引起諸般猜測，佢老哥個專欄如何為人關注，不在話下。無論點解要倒數都好，消息見報，左生馬上搖身一變成為皇帝女，即刻有三張報紙搶住搵佢寫、掟埋合約俾佢簽；仲有擁躉當街截住同佢講：「你去邊，我去邊。」睇吓今後邊個仲夠膽話印刷傳媒唔掂吖啦！所以話呢，無論乜嘢時勢，至緊要係有料。有料就可以任何時候、任何地方、以任何理由倒數而冇有怕矣。洋參浸酒變「偉哥」潮流興飲威士忌，不up少人拿來炒賣賺番筆，恒發洋參（911）老闆楊永仁都唔執輸，拿來浸洋參。 不過，楊老闆就同小宗講，浸酒唔係咩新橋，皆因佢十幾年前，已經用洋參浸干邑、白酒。最近，他就同日本清酒公司合作，發明咗清酒洋參，七月就有得賣，只此一家咁話。楊老闆賣花讚花香，話洋參浸酒，唔單只唔燥，仲有助提升男性性能力。中國人愛「補」（身），恒發就打算同大陸出名嘅白酒公司合作，實行內地生產內地賣，慳番好多稅。呢招洋參浸酒扮「偉哥」，真係試過先知。金牙大狀講嘢劫消費者濟銀行攞命•陳德霖果然攞命。金管局連出七招打擊樓市，銀行少咗好多生意。為咗交數，由是各出奇招拉客，符弗之一係現金回贈按揭客戶，實則即係減價優惠，優惠高達按金額1.6%，都咪話唔和味也。銀行咁做，對客仔嚟講，係好事定係壞事，你懂的。對此，攞命陳是何取態？佢明示銀行將着數由按金額嘅1.6%削為1.0%，即係減少近四成。姑勿論此舉所為者何，實質結果形同逼銀行發達，而利潤則由按揭客戶奉獻。咁對消費者又公唔公平先？為咗保護消費者權益，港英先是設立消委會；過渡後，特區政府又成立咗競委會。今趟攞命陳強行搶走消費者嘅既得着數、逼銀行發達，無論消委會或競委會有冇出過聲？唔見噃。攞命陳劫消費者濟銀行，保護消費者有責嘅機構淨係識得扮鵪鶉。尸位素餐，天理何存？中環人語迷你版“想我落火坑？”估中邊個中環人講呢句說話，送你plantronics. Voyager Legend Signature Black藍牙耳機一個有意參加者，請於五月二十日（星期三）下午一時後，將答案、姓名及聯絡電話電郵至
[email protected]小宗只接受電郵，郵寄免問。本刊員工及直系親屬不得參加。為求公平及杜絕偷步搶答起見，請於每個星期三下午一時後來電郵競猜答案；在此之前發出之電郵作廢。超過一位讀者估中，先到先得，恕不接受上訴。答案及中獎者姓名將於下期本欄揭曉。