美股昨日反覆向上，全日波幅只有60點。券商上調多家藍籌股評級，以及許多零售商2月份銷售好過預期，吸引資金追捧，消費類股份走高，不過，好壞不一嘅宏觀經濟數據，令投資者對經濟前景無所適從，打擊投資情緒，好多投資者在等待今日公布嘅非農就業報告，睇定啲至郁手。
美股三大指數收高，杜指收報10444點，升47點；標普500指收報1123點，漲4點或0.4%；納指收報2293點，升12點或0.5%；羅素2000種小型股漲0.5%。杜指期貨最新報10432點，比現貨低水12點。
港股美國預托證券微升，ADR港比指數收報20665點，比香港收市高89點或0.4%。匯控收報81.28元，比香港收市高0.3%；中移動反彈，收報73.42元，比香港收市高0.8%。
美國一些主要的零售商昨日公佈業績，反映近期嘅零售業表現唔錯。折扣零售商Family Dollar 2月份同店銷售額增長3.6%。季節性商品、家居裝飾品與食品的銷售最為強勁。最近四週銷售額增長4.9%至20.9億美元。Family Dollar還上調了第二財季盈利預期。雖然受到冬季暴風雪的影響，賣高檔消費品嘅Macy’s百貨公司2月份同店銷售增長3.7%，遠高過市場預估的 1.4%，網上銷售大幅增長了38%。
另外，由於業績表現強勁，多家大行亦上調了多家藍籌股嘅評級。美銀美林將迪士尼評級由「中性」調升至「買入」；瑞銀同樣將可口可樂評級從「中性」調升至「買入」，波音公司的評級則從「售出」上調一級至「中性」。
公司業績理想，只欠宏觀利好消息配合。而至目前止，已公布的業績嘅美國企業有超過七成的業績都好都好過預期。但宏觀經濟數據始終未能跟上，總係好壞參半，壓住大市的升勢。昨日公布首次申請失業救濟人數下降，而持續申請失業救濟金總人數亦降至2009 年1月以來最低水平。但1月份工廠訂單數字較上月增長只有1.7%，差過預期的2.5%；同期二手房簽約銷售數字較上月大幅下降7.6%。不統一嘅經濟數 據令投資者憂心經濟是否真正在復蘇之中。只好等待較有說服性的宏觀經濟數據，今晚公布嘅非農就業數據就係重要指標之一，美股未來升跌要睇睇呢個數先。
早 幾日講「唔輸做富翁」時，網友myself有此回應:「今朝同公司散友食早餐，散友想當年，佢話佢A level英文作文攞B，小弟問佢有咩秘訣，佢話方法好簡單，就係「唔好錯」，佢話方法係將一句好長好複雜既句子，拆成幾句簡單既句子，最緊要make sure冇錯，唔錯就扣唔到你分，自然攞高分。用係股票場上，一般散戶太在意股價上升時可以賺幾多，忽略了股價下跌時可以輸幾多。要做到『唔輸』就係要控 制風險，買入股票，風險就係股價下跌，要控制呢個風險，方法可以係只買好股，就算買完跌左，好股長期有盈利，有好既派息，股價此終會浮上水面，再創新高， 呢個係『投質的我』，以質素控制風險；爛股唔係唔可以買，但只能短炒，買前先定好『硬守一成止蝕』，又或者『本來打算買十萬，就只買二萬』，以注碼控制風 險。」
Myself 總結得好好，英文作文唔錯就攞B呢個例子係好例子，我都學到嘢。我又講個例子，有兩個人打工夫，一個後生仔(用而家的潮語講就係80後或90後)拳風虎 虎，又起飛腳，一副生人勿近咁款，打到身水身汗，但一個老坑(而家興叫長者)慢慢行埋去，好滋油咁叉住後生仔條頸，後生仔竟然擋唔到，老坑呢招唔知係大極 定係乜，總之好實用，好直接，但係唔好睇，當台下觀眾好期望後生仔打贏，最後見到佢咁簡單被人打低咗，大家都好無癮，掌都唔拍，一哄而散。
呢 個就係一般人自己人格分裂做「投機的我」和「投資的我」比併的結局，投機快上快落，好易贏，亦好易輸，就如後生仔打工夫咁，好過癮，好好睇，但未必好實 用，打擂台打10次贏9次，結果係9比1，都係贏，炒股即使炒10次贏9次，都會輸，因為你愈賭愈大，最後1舖輸番哂。８０幾歲的巴菲特打贏N咁多個又睇 得又打得的對沖基金後生仔，就係上述打擂台故事的真實版。
睇雜誌有個故事幾得意，有個村屋發展商，之前一路都好成功，但一個大浪打過去，佢最後財政都唔掂，以為要破產之際，老婆有錢俾佢，原來佢過去每發展一個村，都會俾10分1單位俾老婆，最後自己唔掂時，老婆就攞番呢10分1單位出來救佢命。
投 機太過癮，我建議大家唔好唔做，但要控制風險，同埋投機贏得多時，如果唔想抽啲錢俾老婆老公的話，最好自己抽自己水，攞一、兩成，兩、三成出來，抽走佢， 做一些穩陣投資，買中電股票又得，買間三四線區域的地舖收租都得，總之係有穩定收益的投資，兼且係唔會短期大升的投資(無大升就唔會大跌)。投機贏錢唔 難，最難係唔輸，最難長勝，最難保住賺到的利潤，所以抽水係一個方法。巴菲特一年賺10%、20%就巴巴閉閉，你搵港股10大升幅榜，求其搵一隻去跟，又 唔止蝕，都有50%機會跟到一隻爆升股，一係唔升，一升1個月升20、30%一啲都唔奇，你呢一刻超過巴菲特一年的回報，但點解炒細股的人做唔到巴菲特， 因為佢賺完之後，好快又輸番出去，所以投機除咗要諗如何大贏之外，亦要諗如何小輸，贏間廠，輸粒糖，你就可以贏，那怕是輸咗3、4粒糖後才贏到間廠。
至於投資，就如上述的老坑出招，只係一招，但要非常直接，候低買入好股，長揸唔沽置富。切忌太多花巧，甚至換出換入游水都唔適宜，因為游兩游好易唔買番，騰訊、比亞迪好多人買過，不過賺少少就走咗。
我鐘意既投機、又投資，長短兼備，我覺得投機難過投資，因為對手太強，他好像『1984』書中的老大哥一樣，總是操控大局，所以我投機主要目的，是為了掌握市場的感覺，唔係博命。