美國消費者信心數字意外地低迷，對未來六個月的商業及就業狀況預期亦轉差，投資者擔心全球經濟復甦動力放緩，資金再度尋求美避險工具，美匯再創八個月新高，大宗商品市場受壓，資源及原材料股受重創。消費者朝早公布後，杜指應聲下挫近100，其後在低位徘徊，以接近全日最低位收市。
杜指收報10282點，挫101點或1%；標普500指數收報1095點，跌13點或1.2%；納指收報2213點，挫29點或1.3%；羅素2000種小型股下滑1.1%。杜指期貨最新報10290點，比現貨高水8點。
港股美國預托證券大幅下滑，ADR港比指數收報20209點，比香港收市低414點或2.1%。匯控收報83.64元，比香港收市低2%；中移動收報75.52元，比香港收市低1.9%。
令美股急回的意外消息來自諮商局公布美國2 月份消費者信心指數，指數下跌至46，創了十個月新低，遠低過市場預期的55.5。諮商局警告，「企業盈利能力和就業情況都處於緊張狀態，這將削弱消費者 的購買能力。」而消費者支出佔了美國GDP的六成幾七成，對整體經濟影響好大。從昨日多家零售巨頭公布的季度業績報告中，看到同店消費增長並不理想，反映 出普遍消費者都不大願意消費。
Home Depot多家零售商宣佈業績，都有不錯增長，開市後零售股紛紛上漲，但在消費者信心指數公佈之後迅速轉跌。Home Depot業績好過市場預期，並自2006年首次提高5%紅利。股價逆市漲1.4%，不過Sears及Targets盡管亦有所增長，但股價下挫逾1%。
消費者信心指數下滑使美國經濟增長前景再度蒙上陰影，美元指數跳升0.5% 至80.99的八個月新高，原油跌穿每桶80美元水平，黃金亦下跌10美元至每安士1103美元。原材料、金融及工業股普遍下挫。杜瓊斯UBS商品指數下 跌逾2%，其中美鋁(Alcoa) 下挫2.7%，係表現最差嘅杜指成份股，美鋼（US Steel）及弗裏波特-麥克莫蘭銅金公司(Freeport-McMoRan Copper & Gold) 分別下滑4.5%及3.4%；金融股跌幅尤為顯著，杜瓊斯金融指數跌1.5%。其中美銀挫1.7%，美國運通及摩根大通齊挫逾2.3%，係繼美鋁之後表現 最差嘅杜指成份股。
美股本來走勢幾好，但比個消費者信心指數打到窒咗一窒，呢個壞消唯一好的一面，係話俾大家聽，美國消費未得、就業未得、通脹未上，無咁快可以加息。美股後向要睇呢浪回到幾深，最好唔好破早前的低位，咁就可以維持一個反覆向上的走勢。
有單新聞值得一提，有個調查話09年本港千萬富翁人數回升至39.4萬人，按年增13%，人均流動資產達380萬元，亦較08年多12%。調查又發現，31%萬富翁看好樓市發展，但受樓價高企影響，約60%表示並不傾向於今年置業。
調查又發現，隨著經濟回穩，千萬富翁的儲蓄額減少了21%，他們多數將投資集中於股票、外幣及物業。贊助調查的銀行話每年出現富翁的人數和恒指成正比，佢地估計去年富翁致富的秘訣係投資股票和物業。
我估呢度啲網友好多人都想做百萬富翁或千萬富翁，好多人以為做千萬富翁要好識搵錢或好識炒，我估計實情唔係咁。我認為人人都有機會做千萬富翁，即使你只有中學畢業，月入幾千一萬，都有機會做千萬富翁，關鍵要儲錢投資，同埋盡量唔好輸錢。
香港在70 年代中開始經濟起飛，那二十年買樓的人，只要買兩間樓，揸到而家都變千萬富翁。香港第二個富貴期由2003年前後沙士香港衰到貼再開始，阿爺放自由行、放 國企來香港上市，造就第二個爆發，呢次個市發咗啲做富貴生意的人。香港經濟進入高原，樓價唔平，唔好盲信而家買樓20年後可以做千萬富翁。
但儲錢、投資，還是致富的不二法門，如果你夠後生，另一個關鍵是唔輸、少輸，即使唔可以一朝發達，但累積下去，而家有幾萬銀投資，每年增加投資額，一年有10幾個巴仙回報，捱20、30年，有過千萬資產，一啲都唔奇。但你炒到好勁，又贏又輸，今年10萬變50萬，明年50萬變番5萬，搞上搞落，咁就唔係咁易富貴啦。
陸羽仁